ཆོས་ལུགས་སམ་དད་མོས་རང་དབང་སྐོར་ལ་སྦྱོངས།

ཆོས་ལུགས་སམ་དད་མོས་རང་དབང་སྐོར་ངོ་སྤྲོད།  

འདི་ནི་དུམ་བུ་བརྒྱད་ཡོད་པའི་ནང་གི་དང་པོ་དེ་ཡིན། དེ་ཡང་འགྲོ་བ་མིའི་བསམ་བློ་དང། རྣམ་དཔྱོད། ཆོས་ལུགས། དད་མོས་བཅས་ཀྱི་རང་དབང་ཚུད་ཡོད་པ་དང་། དེ་མཚུངས་གནས་སྟངས་གང་འདྲ་ཞིག་གི་འོག་རང་དབང་དེ་དག་བཀག་སྡོམ་བྱེད་པའི་སྐོར་ཡིན། ངོ་སྤྲོད་མདོར་འདུས་འདིའི་ནང་། སུ་དང་གང་ཞིག་འགྲོ་བ་མིའི་ཐོབ་ཐང་གི་འོག་ནས་སྲུང་སྐྱོབ་བྱེད་ཀྱི་ཡོད་པའི་སྐོར་དང་། དེ་བཞིན་ཆོས་ལུགས་དང་དད་མོས་ཀྱི་རང་དབང་ག་རེ་ཡོད་པའི་སྐོར་བཅས་ལ་བསམ་གཞིགས་བྱེད་ནས་འགོ་འཛུགས་བྱེད་ཀྱི་ཡིན།

ངས་དྲི་བ་ཞིག་བཏང་བའི་སྒོ་ནས་འགོ་འཛུགས་བྱེད་ཀྱི་ཡིན། ཆོས་ལུགས་གང་དང་གང་ཞིག་འགྲོ་བ་མིའི་ཐོབ་ཐང་གི་ཆོས་ལུགས་དང་དད་མོས་རང་དབང་གིས་སྲུང་སྐྱོབ་བྱས་ཡོད་རེད་དམ། ཁྱེད་རང་གིས་བྱས་ན། འཛམ་གླིང་གི་ཆོས་ལུགས་ཆེ་ཁག་དེ་ཚོ་རེད་དམ། ཡང་ན་ཆོས་ལུགས་ཆུང་ཁག་གམ། སྤྱིར་བཏང་མ་ཡིན་པའི་ཆོས་ལུགས་ཐེ་བའི་ཆོས་ལུགས་ཚང་མ་རེད་དམ། ཡང་ན། ཕལ་ཆེར་ཆོས་ལུགས་ཡོངས་སུ་རྫོགས་པ་དང་དད་མོས་ཀྱི་རིགས་ཚང་མ་ཡིན་ནམ།

དོན་དངོས་ལ་དེ་ནི་མགོ་འཐོམ་གཞིའི་དྲི་བ་ཞིག་རེད། ངས་ཆོས་ལུགས་གང་ཞིག་སྲུང་སྐྱོབ་བྱས་ཡོད་དམ་ཞེས་དྲིས་པ་ཡིན། མི་མང་ཆེ་བས་ཆོས་ལུགས་སམ་དད་མོས་རང་དབང་གིས་ཆོས་ལུགས་དང་དད་མོས་རྣམས་སྲུང་སྐྱོབ་བྱེད་ཀྱི་ཡོད་ཤག་བྱེད་ཀྱི་ཡོད། འོན་ཀྱང་དོན་དངོས་ལ་དེ་འདྲ་ཞིག་མ་རེད། འགྲོ་བ་མིའི་ཐོབ་ཐང་གཞན་རྣམས་དང་འདྲ་བར། ཆོས་ལུགས་སམ་དད་མོས་རང་དབང་གིས་ཆོས་དད་བྱེད་མཁན་རྣམས་སྲུང་སྐྱོབ་བྱེད་པ་ལས། ཆོས་ལུགས་སམ་དད་མོས་ནི་སྲུང་སྐྱོབ་བྱེད་ཐུབ་ཀྱི་མེད།

ཆོས་ལུགས་སམ་དད་མོས་རང་དབང་གིས། གནའ་བོའི་ཆོས་ལུགས་སམ་དད་མོས། ཆོས་ལུགས་གསར་པ། རྒྱལ་ཁབ་ཅིག་གི་ནང་ཡོད་སྲོལ་རྒྱུན་གྱི་ཆོས་ལུགས་ཡིན་པ་དང་སྲོལ་རྒྱུན་མ་ཡིན་པའི་ཆོས་ལུགས་གང་ཡང་རུང་བའི་ཁོངས་སུ་རྟོགས་པའི་མི་རྣམས་སྲུང་སྐྱོབ་བྱེད་ཀྱི་ཡོད། དེ་བཞིན་རྒྱལ་ཁབ་གང་དུ་གནས་སྡོད་བྱེད་མིན་ལ་མ་ལྟོས་པར། ཆོས་མེད་སྨྲ་བ་དང་། མིའི་འགྲོ་བར་སྨྲ་བ། ཞི་མཐུན་རིང་ལུགས་པ་ལྟ་བུ་ཆོས་ལུགས་ཀྱི་གཞི་རྩའི་གནད་དོན་ལ་དད་པ་དང་ཡིད་ཆེས་མེད་པ་རྣམས་ཀྱང་སྲུང་སྐྱོབ་བྱེད་ཀྱི་ཡོད།

ས་ལུགས་སམ་དད་མོས་རང་དབང་གིས། ཆོས་དད་རང་མོས་དང་ཐ་ན་ཆོས་ལུགས་ལ་སེམས་ཁུར་དང་དད་མོས་གཏན་ནས་མི་བྱེད་པའི་མི་དེ་ཚོ་ཡང་སྲུང་སྐྱོབ་བྱེད་དགོས།

ཕྱོགས་གཞན་ནས་བཤད་ན། ཆོས་ལུགས་སམ་དད་མོས་རང་དབང་གིས་མི་ཚང་མ་སྲུང་སྐྱོབ་བྱེད་ཀྱི་ཡོད། དེ་འདྲ་སོང་ཙང་ང་ཚོར་སྲུང་སྐྱོབ་དང་ཐོབ་ཐང་གང་དང་གང་ཡོད་དམ། དེ་ཚོ་ཤེས་པར་ང་ཚོས་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཡོངས་ཁྱབ་གསལ་བསྒྲགས་དང་སྤྱི་ཆིངས་ཁག་ལ་བལྟ་དགོས་ཀྱི་རེད། དེའི་ནང་ནས་གལ་ཆེ་ཤོས་ནི། མཉམ་སྦྲེལ་རྒྱལ་ཚོགས་ཀྱི་ཡོངས་ཁྱབ་འགྲོ་བ་མིའི་ཐོབ་ཐང་གི་གསལ་བསྒྲགས་དོན་ཚན་ ༡༨ པ་དང་། མཉམ་སྦྲེལ་རྒྱལ་ཚོགས་ཀྱི་སྤྱི་དམངས་དང་ཆབ་སྲིད་ཁེ་དབང་སྐོར་གྱི་རྒྱལ་སྤྱིའི་སྤྱི་ཆིངས་ཀྱི་དོན་ཚན་ ༡༨ པ་བཅས་གཉིས་ཡིན།

རྒྱལ་ཚོགས་ཀྱི་གསལ་བསྒྲགས་ཁག་ནི་ཆབ་སྲིད་ཀྱི་དམིགས་དོན་ཡིན། འོན་ཀྱང་རྒྱལ་ཚོགས་ཀྱི་ཆིངས་དོན་ཁག་ནི་གཡོལ་ཐབས་མེད་པའི་ཆབ་སྲིད་ཀྱི་སྤྱི་ཆིངས་ཤིག་ཡིན། ང་ཚོས་སྤྱི་དམངས་དང་ཆབ་སྲིད་ཁེ་དབང་སྐོར་གྱི་རྒྱལ་སྤྱིའི་སྤྱི་ཆིངས་ཀྱི་ཡིག་ཆར་བལྟ་གི་ཡིན།

དོན་ཚན་ ༡༨ པ། 

མི་སྒེར་སུ་ཡིན་རུང་བསམ་བློ་དང་། རྣམ་དཔྱོད། ཆོས་ལུགས་བཅས་ཀྱི་རང་དབང་ལ་སྤྱོད་པའི་ཐོབ་ཐང་ཡོད་དགོས། ཐོབ་ཐང་འདིའི་ནང་སོ་སོ་སྒེར་རམ། གཞན་ཚོགས་སྡེ་དང་མཉམ་སྦྲེལ་གྱིས་མང་ཚོགས་སམ། སྒེར་ངོས་ཀྱི་རྣམ་པ་གང་ཡང་རུང་བའི་ཐོག་ནས་སོ་སོའི་འདོད་མོས་ལྟར་གྱི་ཆོས་ལུགས་སམ། དད་མོས་ཇི་ཡིན་ལ་སློབ་སྦྱོང་དང་། ཉམས་ལེན། མཆོད་མཇལ། ཆོས་ལུགས་གོམ་སྲོལ་སྲུང་སྐྱོབ་བཅས་བྱེད་པའི་རང་དབང་དང་། དེ་བཞིན་ཆོས་ལུགས་སམ་དད་མོས་བསྒྱུར་ཆོག་པའི་རང་དབང་ཡང་ཚུད་ཡོད།

མི་སུ་ཡིན་རུང་སོ་སོའི་འདོད་མོས་ཀྱི་ཆོས་ལུགས་སམ་དད་མོས། ཡང་ན་ཆོས་ལུགས་གདམ་ཁ་བྱེད་པར་སུས་ཀྱང་བཙན་དབང་གི་སྒོ་ནས་གནོད་འཚེ་བཏང་མི་ཆོག

རང་ཉིད་ཀྱི་ཆོས་ལུགས་སམ་དད་མོས་རང་དབང་གསལ་སྟོན་བྱེད་པ་དེ་ཡང་། ཁྲིམས་ཀྱི་ཆ་རྐྱེན་འོག་ནས་གཏན་འབེབས་ཡོད་པའི་ཚད་བཀག་ལས་བརྒལ་མི་ཆོག དེ་ནི་སྤྱི་ཚོགས་ཀྱི་བདེ་འཇགས་དང་། སྒྲིག་ལམ། འཕྲོད་བསྟེན། ཡང་ན་གཞན་གྱི་གཞི་རྩའི་ཐོབ་ཐང་དང་རང་དབང་བཅས་སྲུང་སྐྱོབ་བྱ་རྒྱུར་ངེས་པར་མཁོ་བ་ཞིག་ཡིན།

སྤྱི་ཆིངས་འདིར་ངོས་ལེན་བྱེད་མཁན་གྱི་ཚོགས་མིའི་རྒྱལ་ཁབ་ཁག་གིས་ཕྲུ་གུའི་ཕ་མ་དང་། དེ་བཞིན་ཕྲུ་གུའི་ཁྲིམས་བཀོད་ལྟ་སྐྱོང་བྱེད་པོའི་རང་དབང་ལ་བརྩི་འཇོག་བྱས་ནས་རང་གི་བུ་ཕྲུག་གིས་ཡིད་ཆེས་བརྟན་པོ་ཡོད་པའི་ཆོས་ལུགས་དང་ཀུན་སྤྱོད་ཀྱི་སློབ་གསོ་དང་ལེན་བྱེད་རྒྱུར་འགན་ལེན་བྱེད་དགོས།

དེས་ན། སྲུང་སྐྱོབ་བྱས་པའི་སྐྱེ་བོ་རྣམས་ལ་ལག་བསྟར་བརྒྱུད་རིམ་གང་འདྲ་རེད་དམ་ཟེར་གྱི་ཡོད་ན། ང་ཚོར་ཐོབ་ཐང་ག་རེ་ག་རེ་ཡོད་དམ། ངས་སྔོན་ལ་ཆོས་ལུགས་དང་དད་མོས་རང་དབང་དང་འབྲེལ་བའི་རྒྱལ་སྤྱིའི་ཁྲིམས་ལུགས་ཁག་ནས་གསལ་སྟོན་བྱས་པའི་གནད་དོན་བདུན་གྱི་སྐོར་ངོ་སྤྲོད་བྱེད་རྒྱུ་ཡིན།

གནད་དོན་ཐོག་མ་གཉིས་ནི་ཆོས་ལུགས་དང་དད་མོས་རང་དབང་གི་སྙིང་དོན་ཆགས་ཀྱི་ཡོད།

ཆོས་ལུགས་དང་དད་མོས་ཡོད་པ་དང་། ཡང་ན་ཆོས་ལུགས་སམ་དད་མོས་གདམ་ཁ་བྱེད་པ། ཆོས་ལུགས་སམ་དད་མོས་བསྒྱུར་ཆོག་པ། ཆོས་ལུགས་སམ་དད་མོས་བྱེད་མཚམས་འཇོག་པའི་རང་དབང་བཅས་ཡོད་པ་དང་། ·ཆོས་ལུགས་སམ་དད་མོས་ཡོད་པ་གསལ་སྟོན་བྱེད་པའམ་ཉམས་ལེན་བྱེད་པའི་རང་དབང་།
·དེ་དག་གི་སྟེང་བཙན་དབང་བྱེད་པ་ལས་སྲུང་སྐྱོབ་བྱེད་རྒྱུའི་ཐོབ་ཐང་དང་། ·ཆོས་ལུགས་སམ་དད་མོས་བྱེད་པར་དབྱེ་འབྱེད་གནས་སྟངས།
·ཕྲུ་གུའི་ཕ་མ་དང་བུ་ཕྲུག་ཚོར་ཆོས་ལུགས་སམ་དད་མོས་སྐོར་གྱི་ཐོབ་ཐང་དང་། ·དད་མོས་དང་འབྲེལ་ནས་དང་ལེན་མི་བྱེད་པའི་རང་དབང་བཅས་སྲུང་སྐྱོབ་བྱེད་པའི་ཐོབ་ཐང་བཅས་ཡོད།

ཆོས་ལུགས་སམ་དད་མོས་རང་དབང་གི་གནད་དོན་གལ་ཆེ་བ་གཞན་ཞིག་ནི་ཐོབ་ཐང་སྤྲད་པ་དེ་དག་ལ་ག་དུས་ཚད་བཀག་བཟོ་སྲིད་དམ་ཞེས་པའི་སྐོར་གྱི་ཁྲིམས་སྒྲིག་ཁག་ཡིན།

དྲྭ་རྒྱའི་ཐོག་གནད་དོན་དེ་དག་གི་སྐོར་དང་། ལྷག་པར་ལག་བསྟར་བྱེད་པའི་བརྒྱུད་རིམ་ནང་གང་ལ་གོ་དགོས་པ་ཞིབ་ཚགས་པོ་གློག་བརྙན་སོ་སོའི་ནང་བལྟ་རྒྱུ་ཡོད།

སྐལ་བཟང་ཚེ་རིང་གིས་བསྒྱུར།
འབའ་བ་སྐལ་བཟང་རྒྱལ་མཚན་དང་། སྐལ་བཟང་ཚེ་རིང་གཉིས་ཀྱིས་ཞུས་དག་བཏང་།

ཆོས་ལུགས་སམ་དད་མོས་རང་དབང་མུ་མཐུད་བྱེད་ཆོག་པའམ། ཡང་ན་ཆོས་ལུགས་སམ་དད་མོས་བསྒྱུར་ཆོག་པ།  

ཆོས་ལུགས་སམ་དད་མོས་རང་དབང་གི་ཚད་གཞི་གཙོ་བོ་གཅིག་ནི། མི་ཚང་མར་རང་དབང་གི་སྒོ་ནས་ཆོས་ལུགས་སམ་དད་མོས་ཡོད་ཆོག་པ་དང་། ཆོས་ལུགས་སམ་དད་མོས་གང་ཡིན་པ་བདག་ཉར་ཆོག་པ། ཆོས་ལུགས་སམ་དད་མོས་བསྒྱུར་ཆོག་པ། དད་མོས་བྱེད་མཚམས་འཇོག་ཆོག་པ་བཅས་ཀྱི་རང་དབང་ཡོད། འདི་ནི་སོ་སོ་སྒེར་གྱི་ཡིད་ཆེས་བརྟན་པོ་ཡོད་པ་དེ་དང་འབྲེལ་བ་ཡོད་པ་དང་། དེ་ལ་ཆོས་ལུགས་དང་དད་མོས་རང་དབང་གི་ཐད་ནང་ཁུལ་གྱི་ཚད་གཞི་གཅིག་ཡིན་ཟེར་ཆོག སུ་ཡིན་ནའང་ཆོས་ལུགས་སམ་དད་མོས་ཡོད་ཆོག་པ་དང་བསྒྱུར་ཆོག་པ་ནི་ལྟོས་མེད་ཀྱི་ཐོབ་ཐང་ཞིག་ཡིན། དེ་གང་ཡིན་ཟེར་ན། རྒྱལ་སྤྱིའི་ཁྲིམས་ཡིག་གཞིར་བཟུང་ཐོབ་ཐང་དེ་དུས་ནམ་ཡང་བཀག་འགོག་བྱེད་མི་ཆོག དེ་ཡང་ཁྱེད་རང་ཡེ་ཤུ་དང་། མུ་སི་ལིམ། བྷ་ཧའེ། ཡེ་ཛི་དི། ཡང་ན་ཆོས་མེད་སྨྲ་བ་སོགས་སུ་ཡིན་དང་། དེ་བཞིན་ཁྱེད་རང་སིང་ག་པུར་རམ། སུ་ཝེ་ཌན། སུ་དྷན་སོགས་གང་དུ་སྡོད་ཀྱི་ཡོད་པ། གཞན་ཡང་དམག་འཁྲུག་དང་ཞི་བདེའི་གནས་སྐབས་ཡིན་ནའང་རེད། ཆོས་ལུགས་དང་ཆབ་སྲིད་འགོ་ཁྲིད་སུས་གང་ཟེར་མིན་ལ་མ་ལྟོས་པར། ཁྱེད་རང་དང་གཞན་སུ་ཡིན་ནའང་སོ་སོའི་དད་མོས་གང་ཡིན་བདག་ཉར་དང་ཉམས་ལེན་བྱེད་པ། དད་མོས་བསྒྱུར་བ། ཡང་ན་ཆོས་ཁས་ལེན་མི་བྱེད་པའི་ཐོབ་ཐང་ཆ་ཚང་ཡོད།

འོན་ཀྱང་སྲིད་གཞུང་དང་། ནང་མི། སོ་སོའི་སྤྱི་ཚོགས་ནང་གི་སྡེ་ཁག་བཅས་ཀྱིས་ཆོས་ལུགས་སམ་དད་མོས་རང་དབང་གི་རྩོད་མེད་ཀྱི་ཐོབ་ཐང་དེ་དག་ཁས་ལེན་མི་བྱེད་པ་མ་ཟད། མི་མང་པོ་ཞིག་ལ་ཉེས་པ་གཏོང་བ་དང་། ཡང་ན་འཐབ་རྒོལ་སོགས་ཀྱང་བྱེད་ཀྱི་ཡོད།

སྲིད་གཞུང་ཁ་ཤས་ཀྱིས་ཆོས་ལུགས་སམ་དད་མོས་བྱེ་བྲག་པ་དེ་འདྲ་བཀག་འགོག་བྱེད་ཀྱི་ཡོད། དཔེར་ན་རྒྱ་ནག་གཞུང་གིས་ཕ་ལུང་སྒོམ་སྒྲུབ་ཀྱི་ལྟ་བ་དེ་བཀག་སྡོམ་བྱས་ཡོད། ཕ་ལུང་སྒོམ་སྒྲུབ་ཉམས་ལེན་པ་ཚོ་བཙོན་འཇུག་དང་། མནར་གཅོད། བཙན་སྐུལ་གྱིས་ངལ་སྩོལ་བསྒྱུར་བཀོད་སློབ་གསོ་སོགས་བྱེད་པའི་སྒོ་ནས་རང་གི་དད་མོས་དོར་བཅུག་ཐབས་བྱེད་ཀྱི་ཡོད།

ཨཕ་རི་ཀའི་བྱང་ཤར་དུ་ཡོད་པའི་རྒྱལ་ཁབ་ཨེ་རི་ཀྲེ་རིཡ་ནང་། སྲིད་གཞུང་གི་ངོས་ལེན་ཡོད་པའི་ཆོས་ལུགས་བཞི་ལས་མེད། དཔེར་ན། པེན་ཀྲེ་ཀོ་སི་ཀྲལ་ཡེ་ཤུའི་ཆོས་ལུགས་དང་ཇེ་ཧོ་ཝཱ་ཡི་ཝི་ཊ་ནེ་སི་ཆོས་ལུགས་ལྟ་བུར་ཉམས་ལེན་བྱེད་མཁན་ཚོར་སྲིད་གཞུང་གིས་རྣམ་པ་འདྲ་མིན་གྱི་ཉེས་གཅོད་དྲག་པོ་དེ་འདྲ་གཏོང་གི་ཡོད།

ཆོས་ལུགས་སམ་དད་མོས་རང་དབང་གི་ཐོབ་ཐང་འཛིན་པར་མངོན་གསལ་མེད་པའི་གདལ་བཤིག་གཏོང་བའི་དཔེ་མཚོན་གཅིག་ནི། ཆོས་ལུགས་སམ་དད་མོས་བྱེ་བྲག་པ་ཞིག་འཛིན་པའི་རྒྱུ་མཚན་དུ་བྱས་ནས་དྲག་རྒོལ་འོག་མནར་གཅོད་མྱོང་མཁན་ལ་འཁོན་འཛིན་བྱེད་ཀྱི་ཡོད།

ཕ་རན་སིའི་ནང། ཕྱི་ལོ་ ༢༠༡༥ ལོའི་ནང་ཁ་ཆེའི་ཆོས་དད་པར་རྒོལ་རྡུང་བཏང་བ་དང་། བརྙས་བཅོས། ཡང་ན་ཉེས་དོན་གནོད་འཚེ་བྱེད་པ་སོགས་གནད་དོན་ ༣༣༦ ཐོ་འགོད་དང་འབྲེལ་བརྒྱ་ཆ་ ༢༥༠ ཐམ་པ་འཕར་ཡོད། དེ་བཞིན་འཇིའུ་སྤྱི་ཚོགས་ཀྱི་ཐོག་ཉེས་དོན་གནོད་འཚེ་གྲངས་ ༧༡༥ བྱུང་བ་ཐོ་འགོད་བྱུང་ཡོད།

མེཀ་སི་ཀོ་ཡི་གྲོང་གསེབ་ཁ་ཤས་ནང་། ཡེ་ཤུའི་གནམ་བདག་ཆོས་ལུགས་ཀྱི་པོ་རོ་ཀྲེ་སེ་ཀྲེན་ཊའི་ཆོས་དད་བྱེད་མཁན་རྣམས་ལ། ཀེ་ཐོ་ལིཀ་ཆོས་ལུགས་ཀྱི་སྲོལ་རྒྱུན་སྲུང་སྐྱོབ་བྱེད་མཁན་གྱི་སྤྱི་ཚོགས་འགོ་ཁྲིད་ཚོས་དྲག་རྒོལ་བྱས་པའམ། ཡང་ན། སོ་སོ་སྡོད་སའི་ས་ཆ་ནས་ཕྱིར་འབུད་བཏང་བ་དེ་འདྲ་བྱུང་ཡོད།

རྒྱལ་ཁབ་མང་པོའི་ནང་ཆོས་ལུགས་ཀྱི་ངོ་བོ་དང་། མི་རིགས་ཀྱི་ངོ་བོ། སྲིད་གཞུང་གི་ངོ་བོ་བཅས་ཕན་ཚུན་གཅིག་ལ་གཅིག་རྟེན་ལྟ་བུ་ཆགས་ཀྱི་ཡོད། གནས་སྟངས་དེ་འདྲའི་འོག།ཆོས་མེད་སྨྲ་བ་རྣམས་ཐེ་བའི་གྲངས་ཉུང་ཡིན་པའི་ཆོས་ལུགས་མི་སྣ་དང་། དེ་བཞིན་གྲངས་མང་ཡིན་པའི་ཆོས་ལུགས་ལ་དད་པ་བྱེད་མཚམས་བཞག་པ་རྣམས་རྒྱལ་ཞེན་མེད་པའམ། ཡང་ན་རྒྱལ་ཁབ་ཀྱི་བདེ་འཇགས་ལ་ཉེན་ཁ་ཅན་དུ་ངོས་འཛིན་བྱེད་ཀྱི་ཡོད།

དེ་འདྲ་ཡིན་དུས་ཆོས་ལ་དད་པ་བྱེད་དང་མི་བྱེད་པའི་རྩོད་མེད་ཀྱི་རང་དབང་ལ་རྡོག་རོལ་གཏོང་བ་ཡང་སེ་ཡོང་གི་ཡོད།

ཨིན་ཌོ་ནེ་ཤི་ཡར་ཆོས་དད་རང་དབང་གི་ཁྲིམས་ཡིག་ཅིག་ཡོད། འོན་ཀྱང་ཁྲིམས་ཡིག་དེས། ཁ་ཆེའི་ཆོས་ལུགས་དང་། ཡེ་ཤུའི་གནམ་བདག་ཆོས་ལུགས་ཀེ་ཐོ་ལིཀ་དང་པོ་རོ་ཀྲེ་སེ་ཀྲེན་ཊ། ནང་པའི་ཆོས་ལུགས། ཁུང་ཙེའི་ཆོས་ལུགས། ཧིན་དྷུའི་ཆོས་ལུགས་བཅས་སྲུང་སྐྱོབ་བྱེད་པ་ལས། ཆོས་མེད་སྨྲ་བ་རྣམས་སྲུང་སྐྱོབ་བྱེད་ཀྱི་མེད། ཁ་ཆེའི་ཆོས་ལུགས་ཀྱི་རྒྱབ་ལྗོངས་ཡོད་པའི་རང་ལོ་ ༣༠ ཅན་གྱི་ཨེ་ལེཀ་སི་ ཨཱན་གྱིས་ཆོས་མེད་སྨྲ་བའི་ངོ་དེབ་འགོ་འཛུགས་དང་ “དཀོན་མཆོག་ཡོད་མ་རེད།” ཅེས་བྲིས་པར་ལོ་གཉིས་དང་ཕྱེད་ཀའི་བཙོན་འཇུག་དང་ཨ་སྒོར་ ༡༡༠༠༠ ཐམ་པའི་ཉེས་ཆད་བཏང་ཡོད།

ཨཱན་ལ་ཆོས་ལུགས་དབར་འཁོན་འཛིན་སློང་གཞིའི་གནས་ཚུལ་ཁྱབ་སྤེལ་དང་། དྲྭ་རྒྱའི་ཐོག་ཆོས་ལ་སྐུར་འདེབས་བྱེད་པའི་གནས་ཚུལ་ཁྱབ་སྤེལ་བྱེད་པ། དེ་བཞིན་གཞན་ལ་ཆོས་མེད་སྨྲ་བ་བྱེད་རྒྱུར་སྐུལ་སློང་བྱས་སྐོར་གྱི་ཉེས་འཛུགས་བྱས་པ་རེད། ཨཱན་གྱིས་རང་ཉིད་ཀྱི་ངོ་དེབ་ཐོག་དགོངས་པ་དག་པའི་ཡོངས་ཁྱབ་གསལ་བསྒྲགས་སྤེལ་བར་ངོས་ལེན་མ་བྱས་པ་དང་། ཁོ་བོར་ཟིང་རུབ་བརྒྱབ་ནས་རྡུང་བརྡེག་བཏང་བ་དང་སྤྱི་ཚོགས་ནས་ཕྱིར་འབུད་བཏང་ཡོད།

ཨི་རན་ནང་ཁ་ཆེ་ནས་ཡེ་ཤུའི་གནམ་བདག་ཆོས་ལུགས་ལ་བསྒྱུར་མཁན་དང་། ལྷག་པར་དེབ་སྐྱེལ་མེད་པར་རང་ཁྱིམ་དུ་མཆོད་ཁང་བྱེད་མཁན་ཚོར་ཉེས་ཆད་དྲག་པོ་གཅོད་ཀྱི་ཡོད། ཕྱི་ལོ་ ༢༠༡༧ ལོའི་ཟླ་ ༧ པའི་ནང་ཆོས་ལུགས་བསྒྱུར་མཁན་བཞི་ལ་ “རྒྱལ་ཁབ་ཀྱི་བདེ་འཇགས་ལ་ཁ་གཏད་བྱས་པའི་” ཉེས་འཛུགས་འོག་ལོ་ ༡༠ རེའི་བཙོན་འཇུག་ཁྲིམས་ཐག་བཅད་ཡོད། ཁོང་ཚོའི་ནང་ནས་གསུམ་ལ་ཡེ་ཤུའི་ཚོགས་ཁོངས་སུ་ཞུགས་པའི་མཆོག་ཆང་འཐུང་པར་ལྕག་ཚན་ ༨༠ རེ་བཞུས་ཡོད། དེ་ནི་སྲིད་གཞུང་གིས་ཁོང་ཚོ་ཁ་ཆེ་ཡིན་པར་ངོས་འཛིན་བྱེད་ཀྱི་ཡོད་པ་དང་། ཨི་རན་ནང་ཁ་ཆེ་བ་ཚོས་ཆང་རག་འཐུང་ན་ཁྲིམས་འགལ་དུ་ངོས་འཛིན་བྱེད་ཀྱི་ཡོད།

ཆབ་སྲིད་འགོ་ཁྲིད་དང་ཆོས་དཔོན་ཚོས། རྩ་ཆེའི་དཔེ་ཆའི་ནང་དོན་གྱི་གོ་བ་ལེན་ཕྱོགས་དང་། ཡང་ན། སྲོལ་རྒྱུན་གྱི་ཆོས་ཁྲིམས་ལུང་འདྲེན་ནམ་བེད་སྤྱད་ནས། ཆོས་ལུགས་དད་མོས་བྱེད་མཁན་མང་ས་ནས་ཕྱིར་ཐོན་བྱེད་པར་བཀག་འགོག་དང་། ཚོགས་སྡེ་གཞན་གྱི་ཁོངས་སུ་གཏོགས་པ་རྣམས་ལ་ཉེས་ཆད་གཏོང་གི་ཡོད།  དེ་ཡང་སྲོག་ཁྲིམས་དང་། བཙོན་འཇུག ལས་གནས་ནས་ཕྱིར་འབུད་གཏོང་བ། ཡང་ན། གཉེན་སྒྲིག་མེད་པ་བཟོ་བ་དང་ཕྲུ་གུའི་ལྟ་སྐྱོང་བདག་དབང་འཕྲོག་པ་སོགས་ཀྱི་ཉེས་ཆད་གཅོད་ཀྱི་ཡོད། སའོ་དྷི་ཨ་རཱ་བྷི་ཡ་དང་པ་ཀི་སི་ཐན་གཉིས་ཐེ་བའི་ཁ་ཆེའི་ཆོས་ལུགས་གྲངས་མང་ཡིན་པའི་རྒྱལ་ཁབ་ཁག་མང་པོའི་ནང་། ཨི་སི་ལམ་ཁས་མི་ལེན་པའི་ཆོས་དད་རང་དབང་གི་གནས་བབ་ལ་ཁྲིམས་ཐོག་གི་བཀག་སྡོམ་དེ་ལྟ་བུ་ཡོད། འོན་ཀྱང་འདི་ནི་གཡོལ་ཐབས་མེད་པ་ཞིག་རེད། དཔེར་ན། སིར་རཱ་ལི་ཝན་ནང་མི་འབོར་གྱི་བརྒྱ་ཆ་ ༧༠ ཁ་ཆེ་དང་བརྒྱ་ཆ་ ༢༠ ཡེ་ཤུ་ཆགས་ཀྱི་ཡོད་པ་དང་། དུས་མཚུངས་རྒྱལ་ཁབ་དེའི་ནང་ཆོས་དད་ནི་ཧ་ཅང་གི་མངོན་གསལ་ཅན་ཞིག་ཀྱང་ཡིན། ཆོས་ལུགས་གཉིས་དབར་ཕན་ཚུན་བརྗེ་བསྒྱུར་བྱེད་པ་ནི་སྤྱིར་བཏང་ཞིག་ཏུ་ངོས་འཛིན་བྱེད་པ་དང་དེ་ཆབ་སྲིད་ཀྱི་གནད་དོན་ལ་བསྒྱུར་གྱི་མེད།

དཀའ་ངལ་དེ་རིགས་ནི་ཁ་ཆེ་མང་བའི་རྒྱལ་ཁབ་ཁག་གཅིག་པུ་མིན། ཨཕ་རི་ཀའི་དབུས་ཁུལ་དུ། བྷ་ལ་ཀར་ངོ་ལོག་པ་ཟེར་བའི་ཡུལ་དམག་གིས་གྲངས་ཉུང་ཡིན་པའི་ཁ་ཆེ་བ་རྣམས་ལ་དམར་གསོད་གཏོང་རྒྱུའི་འཇིགས་སྐུལ་འོག་ཡེ་ཤུའི་ཆོས་ལུགས་ལ་བསྒྱུར་འཇུག་གི་ཡོད། རྒྱ་གར་ནང་གི་མངའ་སྡེ་ཁ་ཤས་ཀྱིས་ཆོས་ལུགས་བསྒྱུར་རྒྱུའི་རང་དབང་ལ་དམ་བསྒྲགས་བྱེད་པའི་ཁྲིམས་གཞི་གཏན་འབེབས་བྱས་ཡོད། དེ་ཡང་དཔེར་ན། སུ་ཞིག་ཆོས་ལུགས་བསྒྱུར་དགོས་ན་གཞུང་གི་འབྲེལ་ཡོད་ལས་ཁུངས་ཁག་ནས་ཆོག་མཆན་ཞུ་དགོས་ཀྱི་ཡོད།

ཐོབ་ཐང་རྩིས་མེད་གཏོང་མཁན་ནི་སྲིད་གཞུང་ཁག་གཅིག་པུ་མིན། རྒྱ་གར་ནང་ཧིན་དྷུའི་ཆོས་ལུགས་རིང་ལུགས་པའི་ཤོག་ཁག་དེ་འདྲས་ཡེ་ཤུ་དང་ཁ་ཆེའི་སྤྱི་ཚོགས་ལ་དྲག་སྤྱོད་ཚབས་ཆེ་བཏང་རིགས་བྱུང་ཡོད་ལ། སྐབས་རེ་འཇིགས་སྐུལ་དྲག་སྤྱོད་འོག་ཆོས་ལུགས་བསྒྱུར་དུ་བཅུག་པ་དེ་འདྲའང་ཡོང་གི་ཡོད། གནས་སྟངས་ཁ་ཤས་འོག དྲག་སྤྱོད་འོག་ཡུལ་གྱར་བྱ་དགོས་བྱུང་བ་རྣམས་ཆོས་ལུགས་མ་བསྒྱུར་ན་སོ་སོའི་ནང་ལ་ཡང་ལོག་རྒྱུར་བཀག་འགོག་བྱེད་ཀྱི་ཡོད།

དཀའ་ངལ་ནང་ཚུད་མཁན་ཚོ་ནི་ཆོས་ལུགས་ལ་དད་མོས་བྱེད་མཁན་རྐྱང་རྐྱང་མ་རེད། ཆོས་ལུགས་ཀྱི་ལྟ་གྲུབ་བམ། ཡང་ན་ཆོས་ལུགས་དང་སྲིད་གཞུང་དབར་གྱི་འབྲེལ་བའི་སྐོར་ལ་སྐྱོན་བརྗོད་བྱེད་མཁན་གྱི་མི་རྣམས་ལ་ཉེན་ཁ་ཆེན་པོ་ཡོང་སྲིད་པ་རེད། ཉེ་བའི་ལོ་ཤས་ནང་། བྷངྒ་ལ་དྷེ་ཤི་ཡི་ནང་ཆོས་ལུགས་ཀྱི་ལྟ་གྲུབ་དང་ལག་བསྟར། དེ་བཞིན་སྲིད་གཞུང་ལ་སྐྱོན་བརྗོད་བྱས་པར་བརྟེན་དྲྭ་རྒྱའི་ཐོག་དཔྱད་དཔྱོད་པ་ཁ་ཤས་དྲག་སྤྱོད་པའི་ཤོག་ཁག་གིས་དམར་གསོད་བཏང་ཡོད། བློ་ཕམ་པ་ཞིག་ལ་བྷངྒ་ལ་དྷེ་ཤི་སྲིད་གཞུང་གིས་དྲག་སྤྱོད་ཤོག་ཁག་དེ་ཚོའི་བྱེད་བབ་འགོག་ཐབས་བྱས་ཀྱང་ད་བར་དོན་འབྲས་སོན་མེད། སྲིད་གཞུང་ཁ་ཤས་ཆོས་ལུགས་ཀྱི་ལྟ་གྲུབ་ལ་སྐྱོན་བརྗོད་བྱེད་མཁན་ཚོར་དྲག་སྤྱོད་ཡོང་གི་ཡོད་པ་རྣམས་ལ་ཉེས་འཛུགས་བྱེད་ཐུབ་ཀྱི་མེད། དེ་ཙམ་མ་ཟད་གང་ཡང་མ་བྱས་པར་ཁུ་སིམ་མེར་སྡོད་པ་དེས་དྲག་སྤྱོད་བྱེད་པ་དེ་དག་ལ་རྒྱབ་སྐྱོར་དང་བདེན་དཔང་བྱས་པའི་བརྡ་ལན་ཡང་གཏོང་གི་ཡོད།

ཆོས་ལུགས་སམ་དད་མོས་བརྗེ་བསྒྱུར་ཆོག་པའི་རང་དབང་དེ་ནི་རྒྱལ་སྤྱིའི་ནང་རྩོད་རྙོག་ཧ་ཅང་ཆེ་བའི་གནད་དོན་ཞིག་ཡིན། དོན་དངོས་ལ། མཉམ་སྦྲེལ་རྒྱལ་ཚོགས་ཀྱི་ཚོགས་མི་རྣམས་ཀྱི་ཆོས་ལུགས་བརྗེ་བསྒྱུར་ཐོབ་ཐང་སྐོར་ལ་སྲོལ་ཡིག་གསར་པ་གཏན་འབེབས་གྲོས་འཆམ་བྱེད་ཐེངས་སོ་སོར་ཐོབ་ཐང་དེ་སླ་རུའམ་སྐྱོ་རུ་འགྲོ་གི་ཡོད།

ནང་དོན་བརྗོད་བྱ་སླ་རུ་སོང་ཡོད་ནའང་། ཚོགས་མི་རྒྱལ་ཁབ་ཚོར་སྤྱི་དམངས་དང་ཆབ་སྲིད་ཀྱི་ཐོབ་ཐང་གི་སྤྱི་ཆིངས་དེ་གོ་བ་ཇི་ལྟར་ལེན་དགོས་མིན་ལམ་སྟོན་བྱེད་རྒྱུ་མཉམ་སྦྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཚོགས་ཆུང་གི་ལས་འགན་ཡིན། སྤྱི་ཆིངས་ནང། ཆོས་ལུགས་སམ་དད་མོས་ ’ཡོད་པའམ་མོས་འདེམས་བྱེད་པའི་’ རང་དབང་ཡོད་ཅེས་པ་དེའི་ནང་། སོ་སོའི་ད་ཡོད་ཀྱི་ཆོས་ལུགས་སམ་དད་མོས་གང་ཡིན་པ་དེ་མུ་མཐུད་བྱེད་ཆོག་པའམ་ཉར་ཆོག་པ་དང་། ཆོས་ལུགས་སམ་དད་མོས་བརྗེ་བསྒྱུར་ཆོག་པ། ཡང་ན་ཆོས་ལུགས་ལ་དད་པ་མི་བྱེད་པ་བཅས་གདམ་ཁ་བྱེད་ཆོག་པའི་རང་དབང་ནི་དགོས་ངེས་ཅན་ཞིག་ཡིན་པ་གསལ་འདོན་བྱས་ཡོད།

མདོར་བསྡུས་ན། ཁྱེད་རང་སོ་སོའི་ཆོས་ལུགས་སམ་དད་མོས་ཇི་ཡིན་མུ་མཐུད་བྱེད་པའམ་བརྗེ་བསྒྱུར་བྱེད་པ་ནི་རྩོད་མེད་ཀྱི་ཐོབ་ཐང་ཞིག་ཡིན། གནས་སྟངས་གང་འདྲ་ཞིག་གི་འོག་ཏུའང་དེར་ཚད་བཀག་བྱེད་ཆོག་གི་མེད་ནའང་། སྲིད་གཞུང་ཁ་ཤས་ཀྱིས་ཐོབ་ཐང་དེར་ཚད་བཀག་བཟོ་གི་ཡོད། ནང་མིའམ་སྤྱི་ཚོགས་ཀྱི་སྡེ་ཁག་ཚོར་ཆོས་ལུགས་སམ་དད་མོས་བྱེད་པའམ་བརྗེ་བསྒྱུར་བྱས་པར་ཉེས་པ་འདྲ་མིན་གཏོང་གི་ཡོད།

འགྲོ་བ་མིའི་ཐོབ་ཐང་གི་སྐོར་ཡིག་ཆ་ཁག་ཐེ་བའི་ཆོས་ལུགས་སམ་དད་མོས་ཇི་ཡིན་མུ་མཐུད་བྱེད་པའམ་བརྗེ་བསྒྱུར་བྱེད་པའི་ཐོབ་ཐང་སྐོར་དྲྭ་རྒྱའི་ནང་ཡོད་སྦྱོང་བརྡར་གྱི་ཡིག་ཆ་ཁག་ཏུ་བལྟ་རྒྱུ་ཡོད།

སྐལ་བཟང་ཚེ་རིང་གིས་བསྒྱུར།
འབའ་བ་སྐལ་བཟང་རྒྱལ་མཚན་དང་། སྐལ་བཟང་ཚེ་རིང་གཉིས་ཀྱིས་ཞུས་དག་བཏང་།

 

ཆོས་ལུགས་སམ་དད་མོས་རང་དབང་སྐོར་གྱི་ནང་དོན་སྡེ་ཚན། ཆོས་ལུགས་སམ་དད་མོས་གསལ་སྟོན་བྱེད་པའི་རང་དབང་།  

ཆོས་ལུགས་སམ་དད་མོས་རང་དབང་གི་གཞི་རྩའི་གནད་དོན་གཙོ་བོ་གཉིས་པ་དེ་ནི། སོ་སོའི་འདོད་མོས་ལྟར་གྱི་ཆོས་ལུགས་སམ། དད་མོས་ཇི་ཡིན་ལ་སློབ་སྦྱོང་དང་། ཉམས་ལེན། མཆོད་མཇལ་བྱེད་པ་དེ་ཡིན། འདི་ལ་ཆོས་ལུགས་སམ་དད་མོས་རང་དབང་གི་ཕྱི་ཕྱོགས་ཀྱི་ཚད་གཞི་ཟེར་གྱི་ཡོད།  ཆོས་ལུགས་སམ་དད་མོས་ཇི་ཡིན་མུ་མཐུད་བྱེད་པའམ་བརྗེ་བསྒྱུར་བྱེད་པའི་ཐོབ་ཐང་དང་མི་འདྲ་བར་དད་མོས་གསལ་སྟོན་བྱེད་པའི་ཐོབ་ཐང་ནི་རྩོད་མེད་ཀྱི་ཐོབ་ཐང་ཞིག་མིན། གནས་སྟངས་ཁ་ཤས་སུ་ཐོབ་ཐང་དེ་དག་ལ་ཚད་བཀག་ཡོང་སྲིད།

གསལ་སྟོན་བྱེད་པ་ཞེས་པའི་གོ་དོན་ནི། སོ་སོའི་དད་པ་དང་ཡིད་ཆེས་ཡིག་ངག་གཉིས་ཐོག་ནས་མངོན་པར་བྱེད་པ་ལ་ཟེར་གྱི་ཡོད། རྒྱལ་སྤྱིའི་འགྲོ་བ་མིའི་ཐོབ་ཐང་གི་ཁྲིམས་ཡིག་ནང་འགྲོ་བ་མི་རྣམས་ཀྱིས་ཡོངས་གྲགས་སམ་ལྐོག་ཏུ། ཡང་ན། ཁེར་རྐྱང་ངམ་གཞན་དང་མཉམ་དུ་གསལ་སྟོན་བྱེད་པའི་ཐོབ་ཐང་ཡོད་པ་འཁོད་ཡོད།

ཁྱེད་རང་ལ་ལྐོག་ཏུ་བསྔོ་སྨོན་བྱེད་རྒྱུའི་ཐོབ་ཐང་ཡོད་པ་དང་། དེ་ཡང་ཁྱེད་རང་སྒེར་གྱི་ཆོས་ལུགས་སམ་དད་མོས་དེ་སྤྱི་ཚོགས་ཀྱི་ཆ་ཤས་ཀྱི་ཐུན་མོང་གི་དད་གུས་དང་སྔར་གྱི་ལུགས་སྲོལ་གང་ཡིན་གསལ་སྟོན་བྱེད་ཆོག སྤྱི་ཚོགས་ལ་ཐོབ་ཐང་ཡོད་པ་དེ་ཡང་སྲིད་གཞུང་དང་འབྲེལ་བའི་ཐོབ་ཐང་ཁག་ཡིན་པ་ལས། སྤྱི་ཚོགས་ཀྱི་ཚོགས་མི་མ་ཡིན་པའི་ཐོག་ཐོབ་ཐང་མེད། དེ་ཚོའི་ནང་ནང་གལ་ཆེ་ཤོས་གཅིག་ནི། སྲིད་གཞུང་གི་ངོས་ནས་ཆོས་ལུགས་དང་དད་མོས་བྱེད་མཁན་གྱི་ཚོགས་སྡེ་ཁག་ནས་དངུལ་ཁང་གི་རྩིས་ཁྲ་དང་། མི་མང་ལ་ལས་ཀ་སྤྲོད་རྒྱུ། མཁར་དབང་བདག་འཛིན་བྱེད་པ། ལྟེ་གནས་ཁང་དེ་འདྲ་འགོ་འཛུགས་བྱེད་པ་བཅས་ཀྱི་ཆེད་ཁྲིམས་མཐུན་གྱི་ངོ་སྤྲོད་དགོས་རིགས་ལ་མཁོ་སྤྲོད་བྱེད་དགོས།

མི་སྒེར་དང་ཚོགས་སྡེ་ཁག་ལ་སོ་སོའི་ཆོས་ལུགས་སམ་དད་མོས་ཇི་ཡོད་གསལ་སྟོན་དང་ཉམས་ལེན་ལག་བསྟར་བྱེད་སྟངས་མི་འདྲ་བ་མང་པོ་ཡོད། མཉམ་སྦྲེལ་རྒྱལ་ཚོགས་ཀྱི་ཁྱད་མཁས་མི་སྣ་ཚོས་ལས་འགུལ་གང་དང་གང་སྲུང་སྐྱོབ་བྱེད་པའི་དཔེ་མཚོན་མང་དག་ཅིག་མཁོ་འདོན་བྱས་ཡོད།

• དེ་ཡང་། ཆོས་ཀྱི་བྱེད་སྒོ་སྤེལ་བ་དང་། དུས་སྟོན་སྲུང་བརྩི་བྱེད་པ། གུང་སེང་བཅས་འདུ་འཛོམས་བྱས་ཏེ་མཉམ་སྤྱོད་བྱེད་ཆོག་པ།
• ཆོས་ལུགས་དང་འབྲེལ་བའི་གྱོན་གོས་དང་དམིགས་བསལ་བཟའ་བཅའི་རིགས་བསྟེན་ཆོག་པ།
• ཆོས་དད་བྱེད་སའི་ལྷ་ཁང་དང་། དུར་ཁང། ཆོས་ལུགས་ཀྱི་མཚོན་རྟགས་བཅས་ཡོད་ཆོག་པ།
• དགེ་རྩའི་ཚོགས་པ་ལྟ་བུ་བཙུགས་ཏེ་སྤྱི་ཚོགས་ནང་བཟང་ཕྱོགས་ཀྱི་བྱ་གཞག་སྒྲུབ་ཆོག་པ།
• ཆོས་ལུགས་སམ་དད་མོས་སྐོར་སྐད་ཆ་ཤོད་པ་དང་སློབ་འཁྲིད་བྱེད་ཆོག་པ་དང་། ཆོས་ལུགས་ཀྱི་འགོ་ཁྲིད་བསྐོ་གཞག་གམ་སྦྱོང་བརྡར་སྤྲོད་ཆོག
• སོ་སོའི་དད་མོས་སྐོར་ལ་འབྲི་རྩོམ་དང་དེབ་སོགས་པར་སྐྲུན་བྱེད་པ།
• དད་མོས་དང་འབྲེལ་བའི་གནད་དོན་ཐོག་རྒྱལ་སྤྱི་དང་རྒྱལ་ནང་གཉིས་ཀའི་ནང་འབྲེལ་བ་དང་ཁྱབ་སྤེལ་རིགས་བྱེད་ཆོག་པ།
• དེ་བཞིན་དྭང་བླང་གི་ཞལ་འདེབས་ཀྱང་འདུ་འགོད་ཆོག་པ་ཡིན།

ཐོབ་ཐང་འདིའི་རིགས་ངའི་ཚོགས་སྡེའི་ཆེད་དུ་ངེས་པར་དུ་དགོས་ཀྱི་འདུག་ཅེས་ད་ལྟའི་གནས་སྐབས་འདིར་ཁྱེད་རང་དགའ་པོ་བྱེད་སྲིད།

སེམས་ཁྲལ་ཡང་ཡོང་སྲིད་པ་རེད། སོ་སོའི་ཚོགས་པའི་ཚོགས་མི་རྣམས་ལ་མནར་གཅོད་དང་བཏང་འཛིན་བྱེད་པའམ། ཡང་ན་ཚོགས་ཁག་སོགས་གཞན་ལ་དྲག་སྤྱོད་སྤེལ་མཁན་རིགས་ལ་གང་བྱེད་དགོས་སམ། ཁོང་ཚོ་སོ་སོའི་དད་མོས་ལྟར་རང་དབང་གི་སྒོ་ནས་ཆོས་ལུགས་ཉམས་ལེན་དང་གཞན་ལ་ཁྱབ་སྤེལ་བྱེད་ན་འགྲིག་གམ།

དེ་དང་འབྲེལ་ནས་ལན་འདེབས་གཉིས་བྱེད་འདོད་ཡོད།:

སྤྱི་དམངས་དང་ཆབ་སྲིད་ཀྱི་ཐོབ་ཐང་སྐོར་གྱི་རྒྱལ་སྤྱིའི་སྤྱི་ཆིངས་དོན་ཚན་ ༥ པའི་ནང། ཐོབ་ཐང་གཅིག་གིས་ཐོབ་ཐང་གཞན་ཞིག་མེད་པ་བཟོ་རྒྱུ་བཀག་འགོག་བྱས་ཡོད། དེར་བརྟེན་ཆོས་ལུགས་སམ་དད་མོས་རང་དབང་གིས་སྲིད་གཞུང་ཡིན་ནའང་རེད། དེ་བཞིན་མི་སྒེར་དང་ཚོགས་སྡེ་སུ་ལའང་མི་མང་ལ་བརྙས་བཅོས་བྱེད་པ་དང་། དྲག་སྤྱོད་སྤེལ་བ་སོགས་ཀྱི་ཐོབ་ཐང་སྤྲོད་ཀྱི་མེད།

གང་ལྟར་ཡང་སྲིད་གཞུང་དང་ཚོགས་སྡེ་མང་པོ་ཞིག་གིས་དབང་ཤུགས་སམ་དྲག་གནོན་བེད་སྤྱོད་ཀྱི་ཡོད། འོན་ཀྱང་ཆོས་ལུགས་སམ་དད་མོས་རང་དབང་ལྟར་ན་དེ་རིགས་བྱེད་ཆོག་གི་མེད། དེ་ལས་ལྡོག་སྟེ་དྲག་གནོན་དང་རྩུབ་སྤྱོད་ཕོག་པ་རྣམས་སྲུང་སྐྱོབ་བྱེད་རྒྱུའི་འགན་དབང་ཡོད།

གཉིས་པ་དེར། ཆོས་ལུགས་དད་མོས་ཡོད་པ་དང་གདམ་ཁ་བྱེད་པའི་རང་དབང་ལ་ཚད་བཀག་བྱེད་ཆོག་གི་མེད་ནའང་། ཆོས་ལུགས་སམ་དད་མོས་གསལ་སྟོན་ནམ་ཉམས་ལེན་ལག་བསྟར་བྱེད་པའི་ཐོབ་ཐང་ལ་ཚད་བཀག་བྱེད་ཆོག་གི་ཡོད། དེ་ཡང་སྤྱི་ཆིངས་ཀྱི་དོན་ཚན་ ༡༨ པའི་ནང་ཁྲིམས་སྒྲིག་དོན་ཚན་བཞི་ལག་བསྟར་བྱས་པའི་ཐོག་ནས་ཚད་བཀག་བྱེད་ཆོག་པ་གསལ་སྟོན་བྱས་ཡོད།

ཚད་འཛིན་དེ་དག་ཁྲིམས་ཡིག་ནང་འཁོད་དགོས། དེ་ནི་མི་གཞན་ལ་སྲུང་སྐྱོབ་བྱེད་པ་དང་། མཐོང་ཆུང་ཁྱད་གསོད་བྱེད་མི་ཆོག་པ་མ་ཟད། དཀའ་ངལ་ཅི་ཞིག་སེལ་ཐབས་བྱེད་པའི་ཐག་གཅོད་བརྒྱུད་རིམ་དང་འཚམས་པོ་དང་ངེས་པར་མཁོ་བ་ཞིག་ཀྱང་ཡིན།

ཁྲིམས་སྒྲིག་དེ་དག་ནི་ཤིན་ཏུ་ནས་གལ་ཆེན་པོ་ཡིན། དེ་དག་མེད་པའི་དབང་དུ་བཏང་ན། སྲིད་གཞུང་གིས་སོ་སོའི་འདོད་བློར་མ་བབ་པའི་ཉམས་ལེན་ལག་བསྟར་རིགས་གནད་དོན་གང་ཡིན་དང་སྡེ་ཁག་སུ་ཡིན་ལ་ལྟོས་མེད་ཚད་བཀག་བྱེད་ངེས་པ་རེད།

ཚོད་འཛིན་ནམ་ཚད་བཀག་ནི་ཆེས་མཐའ་མའི་བྱེད་ཐབས་ཤིག་ཡིན་པ་ལས་སྲིད་གཞུང་གིས་རང་མོས་ལྟར་སྤྱད་ཆོག་པའི་ལག་ཆ་ཞིག་མིན། བློ་ཕམ་པ་ཞིག་ལ་སྲིད་གཞུང་མང་པོས་ཁྲིམས་སྒྲིག་དེ་དག་སྣང་མེད་དུ་བཏང་ནས་ཆོས་ལུགས་ལ་དད་མོས་གསལ་སྟོན་བྱེད་པའི་ཐོབ་ཐང་ལ་གདལ་བཤིག་བཏང་བའི་དཔེ་མཚོན་གྲངས་ལས་འདས་པ་ཞིག་ཡོད།

དེབ་སྐྱེལ་ཐོ་འགོད་སྐོར་གྱི་བཏང་འཛིན་བྱེད་པའི་ཁྲིམས་སྒྲིག་ནི་གནད་དོན་གཙོ་བོ་ཞིག་ཡིན། སྲིད་གཞུང་ཁ་ཤས་ཀྱིས་དེབ་སྐྱེལ་ཐོ་འགོད་དེ་དགོས་མཁོ་བཟོ་བ་དང་། དེབ་སྐྱེལ་ཐོ་འགོད་བྱས་མིན་ལ་གཞིར་བཞག་ནས་ཆོས་ལུགས་སམ་དད་མོས་ཐོབ་ཐང་གི་རང་དབང་ལོངས་སུ་སྤྱོད་དུ་འཇུག་གི་ཡོད་པ་འདིས། རྒྱལ་སྤྱིའི་ཁྲིམས་སྒྲིག་ཁག་བརྩི་མེད་གཏོང་གི་ཡོད། དད་མོས་གསལ་སྟོན་བྱེད་པར་དེབ་སྐྱེལ་ཐོ་འགོད་བྱེད་དགོས་པ་ཆ་རྐྱེན་དུ་ནམ་ཡང་བཞག་ན་མི་འགྲིག ཐོ་འགོད་དེ་བཞིན་ཚོགས་པ་དེབ་སྐྱེལ་དགོས་མཁན་ཚོར་ཁྲིམས་ཀྱི་ངོ་བོ་མཚོན་ཆེད་དགོས་ཀྱི་ཡོད།

སྲིད་གཞུང་འགའ་རེས་ཐོ་འགོད་མ་བྱས་ན་ཆོས་དད་གསལ་སྟོན་བྱེད་པར་འགོག་རྐྱེན་བཟོ་ཡི་ཡོད་པ་མ་ཟད། ཚོགས་སྡེ་ཁག་ནས་དེབ་སྐྱེལ་བྱེད་རྒྱུའི་ནུས་པར་ཚད་བཀག་དང་འགོག་རྐྱེན་བཟོ་བའི་ཁྲིམས་ཡིག་ཀྱང་ཡོད། དཔེར་ན། ཀ་ཛཁ་སི་ཏན་ནང་དེབ་སྐྱེལ་མ་བྱས་པར་ཆོས་ལུགས་ཀྱི་བྱེད་སྒོ་སྤེལ་མི་ཆོག་པ་དང་། ཚོགས་སྡེ་མང་པོར་དེབ་སྐྱེལ་བྱེད་པའི་ཆོག་མཆན་ཡང་སྤྲོད་ཀྱི་མེད། སོ་སོ་རང་ཉིད་ཀྱི་ཆོས་ལུགས་ལས་གཞན་པའི་མི་ལ་ཆོས་ལུགས་ཀྱི་སྐོར་ཤོད་པ་ཁྲིམས་འགལ་ཡིན་པ་མ་ཟད། ཆོས་ལུགས་ཀྱི་དཔེ་ཆ་ཚང་མ་བེད་སྤྱོད་བྱེད་པའི་སྔོན་ལ་ཞིབ་བཤེར་བྱེད་ཀྱི་ཡོད། དེས་ཆོས་དད་བྱེད་མཁན་གྱི་སྡེ་ཁག་ཚང་མར་དོ་ཕོགས་བཟོ་ཡི་ཡོད།

སྲིད་གཞུང་གིས་ཕྱོགས་མང་པོ་ཞིག་ནས་ཆོས་ལུགས་དད་མོས་ལག་བསྟར་བྱེད་པར་འགོག་རྐྱེན་བཟོ་ཡི་ཡོད། ཝེཏ་ནམ་སྲིད་གཞུང་གིས་ཧཱོ་ཧཱོ་ཆོས་དད་པ་ཚོར་སོ་སོའི་དགོན་པ་གཅིག་པུ་དེར་འགྲོ་རྒྱུར་དོ་དམ་བྱས་ནས་བཀག་སྡོམ་བྱེད་ཀྱི་ཡོད། སའོ་དྷི་ཨ་རཱ་བྷི་ཡའི་ནང་ཁ་ཆེའི་ཆོས་ལུགས་མ་ཡིན་པ་རྣམས་ཡོངས་གྲགས་ཀྱི་ཕྱག་མཆོད་བྱེད་མི་ཆོག་པ་དང་། ཕྱི་ནས་ཡོང་བའི་ལས་མི་ཁ་ཤས་ཆོས་ལུགས་ཀྱི་འདུ་འཛོམས་བྱེད་སྒོ་བྱས་པ་ལ་བརྟེན་ནས་འཛིན་བཟུང་དང་ཕྱིར་སློག་བྱས་པ་བྱུང་ཡོད། རྒྱ་ནག་དང་ཨིན་ཌོ་ནེ་ཤི་ཡའི་ས་ཆ་ཁ་ཤས་ནང་སྲིད་གཞུང་གི་འབྲེལ་ཡོད་ཚོས་ཡེ་ཤུའི་ལྷ་ཁང་རྣམས་བཤིག་གཏོར་བྱེད་ཀྱི་ཡོད།

ཨུ་རུ་སུའི་དྲག་སྤྱོད་དང་འབྲེལ་བའི་ཁྲིམས་སྒྲིག་གི་འོག་ནས་ཞི་བའི་སྒོ་ནས་ཆོས་དད་གསལ་འདོན་བྱེད་པ་དང་། དཔེ་དེབ་སྟོང་ཕྲག་མང་པོའི་དཔར་སྐྲུན་བཀག་སྡོམ་བྱེད་ཀྱི་ཡོད། དཔེ་ཆ་གང་ཞིག་གི་དཔར་སྐྲུན་བཀག་སྡོམ་བྱས་མིན་ཤེས་རྟོགས་ཐུབ་རྒྱུ་ཧ་ཅང་ཁག་པོ་ཡིན་པས། དཔེ་ཆ་དེ་རིགས་བདག་ཉར་བྱས་ན་ཉེས་ཆད་འགེལ་བའམ། བཙོན་འཇུག ཡང་ན་ཆོས་ལུགས་ཀྱི་སྡེ་ཁག་དེ་བཀག་སྡོམ་ཡང་བྱེད་ཀྱི་ཡོད། ཆོས་ལུགས་དད་མོས་གང་ཞིག་མཉམ་སྤྱོད་བྱེད་པ་དང་། ནམ་ཞིག་དང་སུས་བྱེད་ཆོག་མིན་ལའང་དམ་བསྒྲགས་ཤིན་ཏུ་ཆེན་པོ་ཡོད།

ཕ་རན་སིའི་ནང་གྲོང་སྡེའི་སྤྱི་ཁྱབ་ཁ་ཤས་ཀྱིས་ཡོངས་གྲགས་བཀའ་ཁྱབ་གཞིར་བཟུང་ཁ་ཆེའི་བུད་མེད་ཀྱི་ཆུ་རྐྱལ་གྱོན་གོས་བཀག་སྡོམ་བྱེད་ཐབས་བྱས་ཡོད། ཁྲིམས་གཞི་དེ་བཞིན་ཆེས་མཐོའི་ཁྲིམས་ཁང་གིས་མེད་པ་བཟོས་ནའང་། རང་ཉིད་སོ་སོའི་གདོང་པ་འགེབ་པའི་དུག་ལོག་གྱོན་མི་ཆོག་པ་དེ་མུ་མཐུད་གནས་ཡོད། ཡོ་རོབ་ཀྱི་རྒྱལ་ཁབ་ཁ་ཤས་ནང་ཁ་ཆེ་དང་འཇིའུ་ཡིས་བཤས་རྭ་རྣམས་བཀག་འགོག་བྱས་ཡོད།

སྤྱི་ཚོགས་ཀྱི་སྡེ་ཁག་གི་བྱེད་བབ་ཀྱིས་ཀྱང་ཆོས་དད་གསལ་སྟོན་བྱེད་པའི་རང་དབང་ལ་ཚད་བཀག་བཟོ་ཡི་ཡོད། ཡོ་རོབ་ཀྱི་རྒྱལ་ཁབ་ ༩ ཡི་ནང་ཡོད་འཇིའུ་ ༥༠༠༠ ལ་དཔྱད་ཞིབ་བྱས་པའི་ནང་། འཇིའུ་བརྒྱ་ཆ་ ༢༢ ཀྱིས་བདེ་འཇགས་ལ་ཉེན་ཁའི་དབང་གིས་ཆོས་ལུགས་དང་འབྲེལ་བའི་ཀིཔ་པའི་ཞྭ་མོ་གྱོན་རྒྱུ་གཡོལ་ཐབས་བྱེད་ཀྱི་ཡོད་འདུག དེ་བཞིན་རྒྱལ་ཁབ་ཁ་ཤས་ནང་འཇིའུ་ཡི་དུར་ཁང་རྣམས་ཉམས་དམས་ཁྱད་གསོད་བྱེད་ཀྱི་ཡོད་འདུག

ཨི་ཇཔ་ཊི་དང་། པ་ཀི་སི་ཐན། ནཱ་ཨི་ཇེ་རི་ཡ་ལྟ་བུའི་རྒྱལ་ཁབ་ཁག་ནང་། ཁ་ཆེའི་ཆོས་ལུགས་ཀྱི་མིང་ཐོག་ནས་དྲག་སྤྱོད་ཡོངས་དོགས་ལ་འཇིགས་ནས་ཆོས་ཀྱི་བྱེད་སྒོ་སྤེལ་སའི་ས་ཁུལ་ཁག་ཏུ་འགྲོ་རྒྱུར་ཞེད་སྣང་བྱེད་དགོས་པའི་གནས་སྟངས་དེ་འདྲ་ཡོད།  ཨཕ་རི་ཀ་དབུས་ཁུལ་གྱི་སྤྱི་མཐུན་རྒྱལ་ཁབ་ཁག་ཅིག་ནང་ཁ་ཆེར་དམིགས་སུ་བཀར་ནས་ཡུལ་དམག་གི་འཇབ་རྒོལ་ཡོང་ཉེན་ལ་བརྟེན་གཟའ་པ་སངས་ཉིན་མཉམ་འདུས་ཀྱི་སྒོ་ནས་སྨོན་ལམ་འདོན་རྒྱུ་ནི་རྩ་བ་ནས་ཡོང་ཐབས་མེད་པ་ཞིག་ཡིན།

མདོར་བསྡུས་ན། ཆོས་ལུགས་སམ་དད་མོས་གསལ་སྟོན་བྱེད་པའི་ཐོབ་ཐང་གིས་མི་སྒེར་དང་ཚོགས་སྡེ་གཉིས་ཀའི་ཆོས་དད་ཇི་ཡོད་ཡིག་ངག་གཉིས་ཐོག་ནས་གསལ་འདོན་བྱེད་པའི་རང་དབང་ལ་སྲུང་སྐྱོབ་བྱེད་ཀྱི་ཡོད། དེ་ཡང་ཁེར་རྐྱང་དང་མཉམ་འདུས་གང་རུང་ཐོག་ནས་བྱེད་ཆོག འགྲོ་བ་མིའི་ཐོབ་ཐང་གི་ཁྲིམས་སྒྲིག་ཁག་ནང་ཆོས་དད་དང་འབྲེལ་བའི་ལག་ལེན་སྲུང་སྐྱོབ་བྱས་པའི་དཔེ་མཚོན་མང་དག་ཅིག་བསྟན་ཡོད་པ་དང་། དེ་ཚོའི་ནང་ནས་སྡེ་ཁག་ཚོར་ཁྲིམས་མཐུན་གྱི་ངོ་བོའི་ཐོབ་ཐང་ཡོད་པ་དེ་སྲུང་སྐྱོབ་བྱེད་རྒྱུ་གལ་ཆེ་ཤོས་གཅིག་ཡིན།

ཆོས་ལུགས་སམ་དད་མོས་རང་དབང་གསལ་སྟོན་བྱེད་པར་ཚད་བཀག་ཡོད་སྲིིད། འོན་ཀྱང་སྒྲིག་ཁྲིམས་ཁག་ལ་བརྩི་སྲུང་ནན་པོ་བྱས་པའི་སྒོ་ནས་ཚད་བཀག་བྱེད་པ་དེ་ཁྲིམས་མཐུན་ཡིན་པ་དང་། མི་གཞན་རྣམས་སྲུང་སྐྱོབ་ངེས་པར་དུ་བྱེད་དགོས་པ། མཐོང་ཆུང་རང་བཞིན་མིན་པ་མ་ཟད། ཐག་གཅོད་བྱེད་པའི་གནད་དོན་དེ་དག་དང་མཚམས་པ་དགོས་ཀྱི་ཡོད་པ་དེ་གསལ་བཤད་བྱེད་དགོས།

བློ་ཕམ་པ་ཞིག་ལ་འཛམ་གླིང་ནང་གི་སྲིད་གཞུང་མང་པོས་ཁྲིམས་སྒྲིག་དེ་དག་ལག་ལེན་བསྟར་གྱི་མེད། ཆོས་ལུགས་སམ་དད་མོས་གསལ་སྟོན་བྱེད་པའི་རང་དབང་དེ་དག་སྲིད་གཞུང་དང་སྤྱི་ཚོགས་ནང་གི་སྡེ་ཁག་གཉིས་ཀས་གདལ་བཤིག་གཏོང་གི་ཡོད།

འགྲོ་བ་མིའི་ཐོབ་ཐང་གི་སྐོར་ཡིག་ཆ་ཁག་ཐེ་བའི་ཆོས་ལུགས་སམ་དད་མོས་གསལ་སྟོན་བྱེད་པའི་ཐོབ་ཐང་སྐོར་དྲྭ་རྒྱའི་ནང་ཡོད་སྦྱོང་བརྡར་གྱི་ཡིག་ཆ་ཁག་ཏུ་བལྟ་རྒྱུ་ཡོད།

སྐལ་བཟང་ཚེ་རིང་གིས་བསྒྱུར།
འབའ་བ་སྐལ་བཟང་རྒྱལ་མཚན་དང་། སྐལ་བཟང་ཚེ་རིང་གཉིས་ཀྱིས་ཞུས་དག་བཏང་།

ས་ལུགས་སམ་དད་མོས་རང་དབང་སྐོར་གྱི་ནང་དོན། བཙན་དབང་ལས་སྲུང་སྐྱོབ་བྱེད་པ།  

ཆོས་ལུགས་སམ་དད་མོས་རང་དབང་གི་གལ་ཆེའི་ཚད་གཞི་གཅིག་ནི་བཙན་དབང་ལས་སྲུང་སྐྱོབ་བྱེད་པ་དེ་ཡིན། སུ་ཞིག་གིས་དབང་ཤུགས་སམ་འཇིགས་སྐུལ་གྱི་ལམ་ནས་ལས་དོན་གང་ཡང་རུང་བ་བྱེད་བཅུག་པ་དེར་བཙན་དབང་ཟེར་གྱི་ཡོད།

ཆོས་ལུགས་དང་དད་མོས་རང་དབང་གི་ཚད་གཞི་གཙོ་བོ་གཅིག་ནི། མི་ཚང་མར་རང་དབང་གི་སྒོ་ནས་ཆོས་ལུགས་སམ་དད་མོས་ཡོད་ཆོག་པ་དང་། ཡང་ན། ཆོས་ལུགས་སམ་དད་མོས་བསྒྱུར་ཆོག་པ་བཅས་ཀྱི་རང་དབང་ཡོད། བཤད་སྟངས་གཞན་ལྟར་ན་ཆོས་ལུགས་སམ་དད་མོས་ཇི་ཡོད་རང་མོས་ཀྱི་ཐོག་ནས་གསལ་སྟོན་བྱེད་པ་ཞིག་ལ་ཟེར་གྱི་ཡོད།

བཙན་དབང་ལས་སྲུང་སྐྱོབ་བྱེད་པའི་ཐོབ་ཐང་སྐོར་ཞིབ་ཕྲ་བཤད་ན། མི་སུ་འདྲ་ཞིག་དང་། སྲིད་གཞུང་། ཆོས་ལུགས་ཀྱི་འགོ་ཁྲིད། དེ་མིན་གཞན་གང་ཟག་སྒེར་རམ་ཚོགས་པ་སོགས་སུ་ལ་ཡང་སོ་སོའི་དད་མོས་སམ་ཇི་ཡིན་གཞན་དག་ལ་བཙན་དབང་བྱེད་རྒྱུའི་ཐོབ་ཐང་མེད། ཆོས་ལུགས་མེད་མཁན་ལ་ཆོས་ལུགས་ཉམས་ལེན་བྱེད་བཅུག་པ་དང་། དེ་བདག་ཉར་རམ་ཡང་ན་བརྗེ་བསྒྱུར་བྱེད་པའི་བཙན་དབང་གཏོང་རྒྱུའི་ཐོབ་ཐང་མེད།

སྤྱི་དམངས་དང་ཆབ་སྲིད་ཀྱི་ཐོབ་ཐང་སྐོར་རྒྱལ་སྤྱིའི་སྤྱི་ཆིངས་ཀྱི་དོན་ཚན་ ༡༨ པའི་སྡེ་ཚན་ ༢ པར། “སྐྱེ་བོ་སུ་ཡིན་རུང་སོ་སོའི་འདོད་མོས་ཀྱི་ཆོས་ལུགས་སམ། ཡིད་ཆེས། ཡང་ན་ཆོས་ལུགས་གདམ་ཁ་བྱེད་པར་སུས་ཀྱང་བཙན་དབང་གི་སྒོ་ནས་ཉམ་ཉེས་བཏང་མི་ཆོག” ཅེས་གསལ་ཡོད།

ཕྱོགས་སྟོན་འདིས་སྲིད་གཞུང་གིས་མི་མང་ལ་བཙན་དབང་བྱེད་མི་ཆོག་པ་ཙམ་མ་ཟད། དེ་ལས་ལྡོག་སྟེ་ཚོགས་སྒེར་གཞན་གྱི་སྤྱི་ཚོགས་ཀྱིས་རང་ལས་གཞན་པའི་མི་མང་ལ་འཇིགས་སྐུལ་དང་དྲག་སྤྱོད་ལས་སྲུང་བྱེད་དགོས་པ་སྲིད་གཞུང་ལ་ལས་འགན་བསྐུར་ཡོད།

གང་ལྟར་ཡང་འཛམ་གླིང་གི་ཕྱོགས་གང་སར་འཇིགས་སྐུལ་དང་། དྲག་སྤྱོད། ཡང་ན་དངུལ་དང་བཙོན་འཇུག་གི་ཉེས་ཆད་ལྟ་བུ་རྣམ་པ་འདྲ་མིན་གྱི་བཙན་དབང་གཏོང་བའི་དཔེ་མཚོན་མཐོང་རྒྱུ་ཡོད། ཆོས་ལུགས་བརྗེ་བསྒྱུར་བྱས་ཚབ་ཏུ་ལས་ཀ་སྤྲོད་པ་དང་། ཡང་ན། ཆོས་ལུགས་སམ་དད་མོས་བྱེད་མཚམས་བཞག་པའམ། ཡང་ན་དང་ལེན་མི་བྱེད་པའི་གནས་སྟངས་བྱུང་སྐབས་འཕྲོད་བསྟེན་དང་ཤེས་ཡོན་སློབ་གསོའི་གོ་སྐབས་མེད་པར་བཟོ་བ་ལྟ་བུ་ནི་མངོན་གསལ་མེད་པའི་བཙན་དབང་རིགས་ཀྱང་ཡོང་གི་ཡོད།

སྐབས་འགར་གཞུང་འབྲེལ་ཁྲིམས་སྒྲིག་དང་། ཡང་ན་ས་གནས་སྲིད་གཞུང་གི་ལས་བྱེད་པ་ཚོའི་བྱེད་སྟངས་ཐོག་ནས་སྲིད་གཞུང་གི་ངོས་ནས་ཀྱང་བཙན་དབང་བྱེད་པའི་ལས་དོན་ནང་འཇུག་གི་ཡོད།

ཨི་རན་ནང་ཁ་ཆེ་ལས་གཞན་པའི་གྲངས་ཉུང་ཆོས་ལུགས་ཀྱི་སྤྱི་ཚོགས་རྒྱ་ཆེ་ཤོས་ནི་བྷ་ཧའེ་ཡིན། ཕྱི་ལོ་ ༡༩༧༩ ལོའི་གསར་བརྗེའི་ལས་འགུལ་རྗེས། ཁ་ཆེར་བསྒྱུར་རྒྱུའི་ཐབས་ཤེས་འོག་བྷ་ཧའེ་ཡི་སྤྱི་ཚོགས་ལ་གཞུང་གི་སྲིད་བྱུས་ཤིག་དང་འབྲེལ་ནས་འཆར་གཞི་ལྡན་པའི་ཐོག་ནས་སྡུག་སྦྱོང་གཏོང་གི་ཡོད། གསར་བརྗེ་བྱུང་ནས་ལོ་ ༡༠ ཡི་རྗེས་ལ། ཆོས་ལུགས་དད་མོས་ཁོ་ནའི་རྒྱུ་མཚན་གྱིས་བྷ་ཧའེ་ཆོས་དད་པ་ ༢༠༠ ལས་མང་བ་བསད་པ་དང་། བརྒྱ་ཕྲག་ཁ་ཤས་བཙོན་འཇུག་བྱས་ཡོད། དེ་བཞིན་སྟོང་ཕྲག་མང་པོའི་ལས་ཀ་ཤོར་བ་དང་། ཤེས་ཡོན་སློབ་གསོ་དང་ཐོབ་ཐང་གཞན་སྤྱོད་རྒྱུའི་གོ་སྐབས་མེད་པ་ཆགས་ཡོད།

ཕྱི་ལོ་ ༢༠༡༧ ལོའི་ཟླ་ ༡༢ བར་ལ་མཚོན་ན། རྒྱལ་ཁབ་རིམ་པའི་བྷ་ཧའེ་ཆོས་ལུགས་ཀྱི་འགོ་ཁྲིད་དྲུག་ཐེ་བའི་བྷ་ཧའེ་ཆོས་དད་པ་ ༩༧ ཆབ་སྲིད་བཙོན་པ་ཆགས་ཡོད།

དཔེ་མཚོན་འདིས་དབྱེ་འབྱེད་དང་བཙན་དབང་དབར་གྱི་འབྲེལ་བ་ཇི་ཡིན་སྟོན་གྱི་ཡོད། ཨི་རན་ནང་བྷ་ཧའེ་ཡི་ཆོད་དད་པ་རྣམས་མཐོ་རིམ་སློབ་གྲྭར་སློབ་ཞུགས་མི་ཆོག་པ་དང་གཞུང་གི་ལས་བྱེད་པ་བྱེད་ཆོག་གི་མེད། དབྱེ་འབྱེད་རང་བཞིན་ལྡན་པའི་ཁྲིམས་དེ་ནི་བཙན་དབང་རང་རེད། གལ་སྲིད་སློབ་ཕྲུག་ཞིག་གམ་ལས་བྱེད་པ་ཞིག་བྷ་ཧའེ་ཡིན་པ་ཤེས་རྟོགས་བྱུང་ཚེ། ཁ་ཆེའི་ཆོས་ལུགས་ལ་བསྒྱུར་དང་། སློབ་སྦྱོང་དང་ལས་གནས་མུ་མཐུད་གཉེར་གཉིས་ཀྱི་དབར་གདམ་ཁ་བྱེད་དགོས་པའི་གནས་སྟངས་ཡོད།

སྐབས་རེ་དྲག་སྤྱོད་རིང་ལུགས་སམ་འཇིགས་སྐུལ་ཚོགས་པ་དེ་འདྲས་བཙན་དབང་གིས་ཆོས་ལུགས་སམ་དད་མོས་བརྗེ་བསྒྱུར་བྱེད་འཇུག་གི་ཡོད། དྷ་ཨེཤི་ཟེར་བའི་ཁ་ཆེའི་རྒྱལ་ཁབ་དེས་ཡེ་ཛི་དྷིས་དང་ཡེ་ཤུའི་ཆོས་ལུགས་པ་ཚོར་དབང་ཤེད་ཀྱི་སྒོ་ནས་ཆོས་ལུགས་བསྒྱུར་དུ་འཇུག་གི་ཡོད་པ་དང། དང་ལེན་མ་བྱས་ན་དམར་གསོད་གཏོང་གི་ཡོད། རྒྱ་གར་ནང་ཧིན་དྷུའི་ཆོས་ལུགས་ཞེན་ཁོག་པ་ཚོས་བཙན་དབང་གི་སྒོ་ནས་ཆོས་ལུགས་བསྒྱུར་དུ་འཇུག་སྐབས་ཆོས་ལུགས་ནང་ཁུལ་དྲག་ལས་རྙོག་ཁྲ་བཟོས་པའི་གནས་ཚུལ་པར་ཡིག་སྟེང་ནས་ར་སྤྲོད་བྱེད་ཐུབ་ཀྱི་ཡོད། མི་ཡཱན་མཱར་གྱི་ནང་། དམག་མི་ཚོས་མེ་མདའི་ཁ་འོག་ཏུ་ཡེ་ཤུའི་ཆོས་ལ་དད་པ་བྱེད་པ་ནི་ནོར་འཁྲུལ་དུ་ཁས་ལེན་བྱེད་འཇུག་པ་མ་ཟད། ནང་པར་བསྒྱུར་བཅུག་པ་པར་ཡིག་སྟེང་ནས་ར་འཕྲོད་ཐུབ་པའི་གནས་སྟངས་དེ་འདྲ་ཡོད། ཨཕ་རི་ཀ་དབུས་ཁུལ་གྱི་སྤྱི་མཐུན་རྒྱལ་ཁབ་ཁག་ཅིག་ནང་ཁ་ཆེ་བ་ཚོར་ཡེ་ཤུའི་ཆོས་ལུགས་ལ་མ་བསྒྱུར་ན་མེ་མདའ་རྒྱག་རྒྱུའི་འཇིགས་སྐུལ་ཡང་བྱེད་ཀྱི་ཡོད།

དོན་དངོས་སུ་མི་ཚོར་ཆོས་ལུགས་སམ་དད་མོས་ཀྱི་ནུས་པ་དྭང་ལེན་དང་བསྒྱུར་བར་བཙན་དབང་བྱེད་ཆོག་གི་མེད་ནའང་། ཆོས་ལུགས་ཉམས་ལེན་དང་འབྲེལ་བའི་ཐོག་སྲིད་གཞུང་དང་སྤྱི་ཚོགས་ཀྱིས་བཙན་དབང་བྱེད་ཀྱི་ཡོད་པ་མི་མང་པོར་མྱོང་བ་དངོས་སུ་ཡོང་གི་ཡོད། དེ་དང་འབྲེལ་བའི་བཙན་དབང་གི་དཔེ་མཚོན་གཅིག་ནི་བུད་མེད་ཀྱི་གྱོན་གོས་ཡིན། རྒྱལ་ཁབ་ཁ་ཤས་ནང་ཁྲིམས་ཐོག་ནས་བུད་མེད་རྣམས་ཀྱིས་ཆོས་ལུགས་དང་འབྲེལ་བའི་དུག་ལོག་གྱོན་དགོས་ཀྱི་ཡོད། ཡང་ཁ་ཤས་ཀྱིས་བུད་མེད་ཚོར་དེ་རིགས་མི་ཆོག་པ་བཟོས་ཡོད། དེར་བརྟེན་བུད་མེད་ཚོས་རང་གི་ཆོས་ལུགས་དང་འབྲེལ་བའི་དུག་ལོག་མ་གྱོན་ན་སོ་སོའི་ཆོས་ལུགས་གཅིག་པའི་མི་ཚོས་བརྙས་བཅོས་ཕོག་པ་དང་། གྱོན་པ་ཡིན་ན་སོ་སོའི་ཆོས་ལུགས་གཅིག་པ་མ་ཡིན་པའི་མི་ཚོས་བརྙས་བཅོས་ཕོག་གི་ཡོད།

བཙན་དབང་གིས་མི་མང་པོ་ཞིག་ལ་དོ་ཕོགས་དང་གནོད་སྐྱོན་ཐེབས་སྲིད་པ་རེད། རྒྱལ་ཁབ་མང་པོའི་ནང་། རྒྱལ་ཁབ་དེའི་ལྟ་བ་ལངས་ཕྱོགས་སམ་སྤྱི་ཚོགས་ཀྱི་འགྲོ་ལུགས་དང་མི་མཐུན་པའི་ཆོས་ལུགས་ཀྱི་ལྟ་བ་དང་ཉམས་ལེན་བྱེད་མཁན་ཚོར་བཙན་དབང་ཐེབས་ཀྱི་ཡོད། གྲངས་ཉུང་དང་། ཆོས་མེད་སྨྲ་བ། ཆོས་དད་བསྒྱུར་བ། ཡང་ན་ཆོས་དད་ཡོད་པ་རྣམས་ ‘ཕྱི་མིར་’ བརྩིས་ཏེ་དོ་ཕོགས་གཏོང་གི་ཡོད། ཡང་ཆོས་ལུགས་སོ་སོའི་སྡེ་ཁག་ནང་དུ་ཡང་། དད་ལོག་པ་དང་། ཆོས་ལ་སྐུར་བ་འདེབས་མཁན། ཡང་ན་ཆོས་ལུགས་དད་མོས་ཚུལ་བཞིན་མི་བྱེད་མཁན་ཚོར་ཆོས་དད་དང་ཉམས་ལེན་བརྗེ་བསྒྱུར་བྱེད་རྒྱུར་བཙན་དབང་གི་དོ་ཕོགས་ཐེབས་སྲིད་པ་ཡིན། བཙན་དབང་དེ་ཡང་སྲིད་གཞུང་དང་། སོ་སོའི་ནང་མི། ཡང་ན་སྤྱི་ཚོགས་བཅས་ནས་ཡོང་གི་ཡོད།

བསྡོམས་བརྒྱབ་པ་ཡིན་ན། བཙན་དབང་ཟེར་དུས་འཇིགས་སྐུལ་དང་། དྲག་སྤྱོད། མཐོང་ཆུང་དབྱེ་འབྱེད། དངུལ་ཀྱི་ཆད་པ། ཡང་ན་བཙོན་འཇུག་གི་ཉེས་པ་གཏོང་བ་ལྟ་བུ་བཅས་ཚུད་ཀྱི་ཡོད། བཙན་དབང་ནི་སྲིད་གཞུང་དང་། ཡང་ན་སྤྱི་ཚོགས་ནང་གི་མི་གཞན་དང་ཚོགས་པ་དེ་འདྲས་བྱེད་སྲིད། སུ་གཅིག་ལའང་བཙན་དབང་བྱེད་མི་ཆོག་ཟེར་སྐབས། རྒྱལ་སྤྱིའི་འགྲོ་བ་མིའི་ཐོབ་ཐང་གིས་སྲིད་གཞུང་གི་ངོས་ནས་མི་མང་ལ་བཙན་དབང་བྱེད་མི་ཆོག་པ་མ་ཟད། སྲིད་གཞུང་གིས་ནུས་པ་ལྡན་པའི་བྱེད་ཐབས་ལ་བརྟེན་ནས་སྤྱི་ཚོགས་ནང་བཙན་དབང་ལས་མི་མང་སྲུང་སྐྱོབ་བྱེད་རྒྱུའི་འགན་དབང་སྤྲད་ཡོད།

ཁྱེད་རང་གིས་འགྲོ་བ་མིའི་ཐོབ་ཐང་གི་སྐོར་ཡིག་ཆ་ཁག་ཐེ་བའི་བཙན་དབང་ལས་སྲུང་སྐྱོབ་བྱེད་སྟངས་སྐོར་དྲྭ་རྒྱའི་ནང་ཡོད་སྦྱོང་བརྡར་གྱི་ཡིག་ཆ་ཁག་ཏུ་བལྟ་ཐུབ།

སྐལ་བཟང་ཚེ་རིང་གིས་བསྒྱུར།
འབའ་བ་སྐལ་བཟང་རྒྱལ་མཚན་དང་། སྐལ་བཟང་ཚེ་རིང་གཉིས་ཀྱིས་ཞུས་དག་བཏང་།

 

 

ཆོས་ལུགས་སམ་དད་མོས་རང་དབང་སྐོར་གྱི་ནང་དོན། དབྱེ་འབྱེད་དམ་མཐོང་ཆུང་བྱེད་པ་ལས་སྲུང་སྐྱོབ།  

ཆོས་ལུགས་སམ་དད་མོས་རང་དབང་གི་ཐོབ་ཐང་དང་འབྲེལ་བ་དམ་ཟབ་ཡོད་པའི་ཐོབ་ཐང་གཅིག་ནི་དབྱེ་འབྱེད་དམ་མཐོང་ཆུང་ལས་སྲུང་སྐྱོབ་བྱེད་པ་དེ་ཡིན། མཐོང་ཆུང་དབྱེ་འབྱེད་བྱེད་པ་ནི་ཁོང་ཚོ་སུ་ཡིན་ལ་གཞིགས་ནས་མི་གཞན་དང་གཅིག་མཚུངས་ལྟ་རྟོག་མ་བྱས་པར་གོ་དགོས།

རྒྱལ་སྤྱིའི་འགྲོ་བ་མིའི་ཐོབ་ཐང་གི་ཁྲིམས་ཡིག་གི་རྩ་འཛིན་གཙོ་བོ་ཞིག་ནི། སྲིད་གཞུང་ཚོས་ཆོས་ལུགས་སམ་དད་མོས་ཐེ་བའི་གནས་སྟངས་གང་གི་ཐོག་ལའང་མཐོང་ཆུང་དབྱེ་འབྱེད་བྱེད་མི་ཆོག་པ་དེ་ཡིན། སྤྱི་དམངས་དང་ཆབ་སྲིད་ཀྱི་ཐོབ་ཐང་སྐོར་གྱི་རྒྱལ་སྤྱིའི་སྤྱི་ཆིངས་ཀྱི་དོན་ཚན་ ༢ པ་དང་། འགྲོ་བ་མིའི་ཐོབ་ཐང་གི་ཡོངས་ཁྱབ་གསལ་བསྒྲགས་གཉིས་ཀའི་ནང་ཐོབ་ཐང་དེ་འགྲེལ་བརྗོད་བྱས་ཡོད།

སྤྱི་དམངས་དང་ཆབ་སྲིད་ཀྱི་ཐོབ་ཐང་སྐོར་གྱི་རྒྱལ་སྤྱིའི་སྤྱི་ཆིངས་ཀྱི་དོན་ཚན་ ༢ པའི་ནང་། ཚོགས་མིའི་རྒྱལ་ཁབ་ཁག་གིས་ད་ལྟའི་ཁྲིམས་ཡིག་འདིར་ངོས་ལེན་བརྩི་བཀུར་ཞུ་དགོས་པ་དང་། དེ་བཞིན་མངའ་ཁོངས་དང་ཁྲིམས་ཀྱི་ཁྱབ་ཁོངས་ནང་ཡོད་ཚང་མར་ད་ལྟའི་སྤྱི་ཆིངས་འདིའི་ནང་གི་ཐོབ་ཐང་རྣམས་ངོས་འཛིན་ཐུབ་པ་བཟོ་དགོས། དེ་ཡང་རིགས་དང། རུས། ཕོ་མོ། སྐད་ཡིག ཆོས་ལུགས། ཆབ་སྲིད་ཀྱི་ལྟ་བ་ལངས་ཕྱོགས། མི་རིགས་སམ་སྤྱི་ཚོགས་ཀྱི་ཡོང་ཁུངས།  དཔལ་འབྱོར་གྱི་གནས་བབ་ལྟ་བུ་གནས་སྟངས་གང་གི་ཐོག་ལའང་མཐོང་ཆུང་དབྱེ་འབྱེད་བྱེད་མི་ཆོག་པ་གསལ་ཡོད།

དེ་འདྲ་ཡིན་དུས་ཆོས་ལུགས་སམ་དད་མོས་ལ་གཞི་བཞག་ནས་མཐོང་ཆུང་དབྱེ་འབྱེད་རིགས་བཀག་འགོག་བྱས་ཡོད། མཐོང་ཆུང་དབྱེ་འབྱེད་མི་ཆོག་པའི་ཕྱོགས་གཞན་ཞིག་ནི་བཙན་དབང་བྱེད་མི་ཆོག་པ་ཡིན།  སྲིད་གཞུང་གིས་སོ་སོའི་བྱེད་བབ་ཀྱི་ཐོག་ནས་མཐོང་ཆུང་དབྱེ་འབྱེད་མི་བྱེད་པ་མ་ཟད། ནུས་པ་ལྡན་པའི་བྱེད་ཐབས་ལ་བརྟེན་ནས་སྤྱི་ཚོགས་ནང་མཐོང་ཆུང་དབྱེ་འབྱེད་རིགས་བཀག་འགོག་དང་དེ་ལས་སྐྱོབ་ཐབས་བྱེད་རྒྱུའི་འགན་དབང་སྤྲད་ཡོད།
འོན་ཀྱང་། མཐོང་ཆུང་བྱེད་པ་ནི་ཆོས་ལུགས་སམ་དད་མོས་རང་དབང་གི་ཐོབ་ཐང་ལ་གདལ་བཤིག་གཏོང་བའི་ཆེས་རྒྱུན་ལྡན་གྱི་གནས་སྟངས་ཤིག་དང་། དེས་ཆོས་ལུགས་དང་དད་མོས་བྱེད་མཁན་གྱི་སྡེ་ཁག་ཚང་མར་དོ་ཕོགས་གཏོང་གི་ཡོད།
སུ་ཝེ་ཌན་གྱི་ནང་། ཞིབ་འཇུག་པ་ཚོས་གྲུབ་དོན་ལྟར་ན། འཇིའུ་རྣམས་ལ་ལས་ཀ་རག་རྒྱུའི་གོ་སྐབས་བརྒྱ་ཆ་ ༢༦ གི་ཉུང་བ་དང་། དེ་བཞིན་ཁ་ཆེ་ཚོར་བརྒྱ་ཆ་ ༣༠ ཡི་ཉུང་བ་ཡོད་འདུག ལས་སྤྲོད་པ་ཚོའི་ངོས་ནས་ལས་བྱེད་པ་ཚོར་ཆོས་ལུགས་ཀྱི་མཚོན་རྟགས་ཡིན་པ་དཔེར་ན་ཡེ་ཤུའི་ཀུར་རྟགས་དང་ཁ་ཆེའི་བུད་མེད་ཀྱིས་མགོ་རས་ཧི་ཇབ་སོགས་ལས་ཡུལ་ལ་གྱོན་རྒྱུར་བཀག་འགོག་བྱེད་པ་ནི་དབྱེ་འབྱེད་བྱེད་པ་མ་ཡིན་ནམ། ཡིན་ན། ནམ་ཞིག་ཡིན་ནམ་ཞེས་པའི་དྲི་བ་འདི་ཡང་གལ་ཆེན་པོ་ཡིན། གནད་དོན་དེའི་སྐོར་ཡོ་རོབ་སྤྱི་མཐུན་རྒྱལ་ཁབ་ཀྱི་ཁྲིམས་ཁང་དང་མཉམ་སྦྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ཚོགས་ཆུང་ལ་ལན་མང་འཁྱེར་ཡོད།

མཐོང་ཆུང་དབྱེ་འབྱེད་ཕྱོགས་མང་པོའི་སྒོ་ནས་ཡོང་སྲིད། སྐབས་རེ་སྲིད་གཞུང་གིས་ཆོས་ལུགས་གཞན་མང་པོའི་ནང་ནས་ཆོས་ལུགས་གཅིག་ལ་ཕྱོགས་ཞེན་བྱེད་པའི་སྒོ་ནས་ཡོང་གི་ཡོད། ཡང་སྲིད་གཞུང་གིས་ཚོགས་ཁག་འདྲ་མིན་ལ་མ་དངུལ་མང་ཉུང་བཏང་ནས་བགོ་བཤའ་རྒྱག་པ་ལྟ་བུ་ཡང་དབྱེ་འབྱེད་ཀྱི་དཔེ་མཚོན་ཞིག་ཡིན། སྐབས་འགར་ཁྲིམས་མཐུན་གྱི་ཐོབ་ཐང་མ་སྤྲད་པ་ལྟ་བུ་ནི་མཐོང་ཆུང་དབྱེ་འབྱེད་བྱེད་པའི་གནས་སྟངས་ཛ་དྲག་པ་ཞིག་ཡིན། དེ་ཡང་དཔེར་ན། སྡེ་ཁག་ཁ་ཤས་ལ་ཁྲིམས་མཐུན་གྱི་ངོ་བོ་མི་སྤྲོད་པའམ་ཡང་ན་ཆོས་ཀྱི་བྱེད་སྒོ་སྤེལ་སའི་དགོན་པ་རྒྱག་རྒྱུར་ཆོག་མཆན་མི་སྤྲོད་པ་ལྟ་བུ་ཡིན། སྲིད་གཞུང་གིས་ཆོས་ལུགས་སམ་དད་མོས་གཞིར་བཞག་ནས་དབྱེ་འབྱེད་བྱེད་པ་དེས་ཆོས་ལུགས་ཀྱི་བྱེད་སྒོ་ཙམ་ལ་དོ་ཕོགས་གཏོང་བ་མ་ཡིན་པར། གཉེན་སྒྲིག་དང་། ཕྲུ་གུའི་བདག་དབང་། ལས་ཀའི་གོ་སྐབས། སྡོད་ཁང་། བདེ་དོན་ཞབས་ཞུའམ་ཁྲིམས་ཀྱི་དྲང་སྙོམ་བཅས་ཉིན་རེའི་འཚོ་བ་དང་འབྲེལ་བའི་གནད་དོན་ཚང་མར་དོ་ཕོགས་གཏོང་གི་ཡོད།

རྒྱལ་ཁབ་མང་པོའི་ནང་མི་སོ་སོའི་ཆོས་ལུགས་གང་ཡིན་ངོ་སྤྲོད་ལག་ཁྱེར་གྱི་ཐོག་བཀོད་ཡོད། དེར་བརྟེན་ངོ་སྤྲོད་ལག་ཁྱེར་སྟོན་དགོས་པའི་གནས་སྟངས་ནམ་བྱུང་སྐབས་གྲངས་ཉུང་མི་རིགས་རྣམས་ལ་མཐོང་ཆུང་དབྱེ་འབྱེད་ཡོང་སླ་བ་ཡོད།

ཨིན་ཌོ་ནེ་ཤི་ཡའི་ས་ཁུལ་ཁ་ཤས་སུ་ས་གནས་སྲིད་གཞུང་གི་ལས་བྱེད་པ་ཚོས་ཐོ་འགོད་ཁས་ལེན་བྱེད་ཀྱི་མེད་པའི་རྒྱུ་མཚན་གྱིས། ཧིན་དྷུའི་ཆོས་དད་པ་ཚོར་གཉེན་སྒྲིག་དང་ཕྲུ་གུ་སྐྱེས་པའི་ཐོ་འགོད་བྱེད་ཆེད་འགྲུལ་བཞུད་ཐག་རིང་བྱེད་དགོས་ཀྱི་ཡོད། དེ་བཞིན་ཡེ་ཤུའི་ཆོས་དད་པ་ཚོར་མཆོད་ཁང་གསར་རྒྱག་གམ་ཉམས་གསོ་བྱེད་པར་ཆོག་མཆན་ཐོབ་རྒྱུར་དཀའ་ངལ་འཕྲད་ཀྱི་ཡོད། རྒྱལ་ཁབ་ཀྱི་ཁྲིམས་ཁང་གིས་ཡེ་ཤུའི་ཆོད་དད་པ་ཚོའི་མཐུན་ཕྱོགས་སུ་ཁྲིམས་ཐག་བཅད་ཡོད་ནའང་། ས་གནས་ཀྱི་ལས་བྱེད་པ་ཚོས་ཁྲིམས་ཐག་དེར་སྣང་མེད་དུ་གཏོང་གི་ཡོད། སྐབས་འགར་ཁོང་ཚོ་དྲག་སྤྱོད་ཚོགས་པ་ཁག་ལ་ཞེད་པའི་རྒྱུ་མཚན་གྱིས་ཀྱང་ཡིན།

པ་ཀི་སི་ཐན་གྱི་ནང་། དབྱེ་འབྱེད་རང་བཞིན་གྱི་ཁྲིམས་བཟོའི་དབང་གིས་ཨེཧ་མཱ་ཌིས་རྣམས་ནས་ཆོས་འཆད་པ་དང་། ཁྱབ་སྤེལ་གཏོང་བ། ཆོས་དད་དང་འབྲེལ་བའི་ཡིག་ཆ་འགྲེམས་སྤེལ་བྱེད་པ་ནག་ཉེས་ལ་ངོས་འཛིན་གྱིས་འོས་ཤོག་བླུག་རྒྱུའི་ཐོབ་ཐང་ཤོར་ཡོད།

འགྲོ་བ་མིའི་ཐོབ་ཐང་གི་ཚོགས་པ་ཁག་ལྟར་ན། ཀེན་ཡའི་ནང་འཇིགས་སྐུལ་རིང་ལུགས་པར་རྒོལ་འཛིང་བྱེད་པ་དང་མཉམ་དུ། བདེ་འཇགས་སྲུང་སྐྱོབ་པ་ཚོས་ཁ་ཆེའི་ཆོས་དད་པ་རྣམས་རྒྱ་ཁྱབ་ངང་དམིགས་འབེན་དུ་གྱུར་ནས་སྡེབ་གཅིག་ལ་ཉེས་ཆད་གཅོད་ཡུལ་དུ་གྱུར་ཡོད། དེ་ཡང་གང་བྱུང་འཛིན་བཟུང་དང་། མནར་གཅོད་གཏོང་བ། དམར་གསོད་གཏོང་བ། གར་སོང་ཆ་མེད་དུ་གྱུར་བ་བཅས་ཀྱི་གནས་ཚུལ་ཡོད་རུང་སྲིད་གཞུང་གིས་སྐྱོན་འཛུགས་དེར་ངོས་ལེན་བྱེད་ཀྱི་མེད།

མི་ཡཱན་མཱར་ནང་གི་གྲོང་གསེབ་ ༢༢ ཀྱི་ནང་། ས་གནས་ཀྱི་ནང་པའི་དགེ་སློང་ཚོས་ཁོང་ཚོའི་གྲོང་གསེབ་ནང་ཁ་ཆེ་གཅིག་ཀྱང་སྡོད་མི་ཆོག་པའི་ཁྱབ་བསྒྲགས་བྱས་ཡོད། ཁ་ཆེ་སུ་ཞིག་ཀྱང་གྲོང་གསེབ་ནང་འཛུལ་བའམ་མཚན་སྡོད་བྱེད་པ་དང་། གྲོང་གསེབ་པ་ཚོས་ཁ་ཆེ་དང་གཉེན་སྒྲིག་བྱེད་པ། འཁོན་འཛིན་གྱི་རིགས་ཁྱབ་སྤེལ་བཅས་བྱེད་མི་ཆོག་པའི་སྐོར་སྦྱར་སྤང་ཐོག་ཁྱབ་བསྒྲགས་བྱས་ཡོད། གཞུང་འཛིན་པ་ཚོས་དེ་རིགས་འགོག་ཐབས་གང་ཡང་བྱས་མེད།

མཐོང་ཆུང་དབྱེ་འབྱེད་བྱེད་པའི་རྒྱུ་མཚན་གཅིག་ལས་མང་བ་ཡོད། དཔེར་ན། ཆོས་ལུགས་དང་མི་རིགས་ཀྱི་དབྱེ་བ་གཉིས་ཀ་དང་། ཕོ་མོའི་དབྱེ་བའམ་གྲལ་རིམ་བཅས་གཞི་ལ་བཞག་ནས་ཡང་སེ་ཡོང་གི་ཡོད། འགྲོ་བ་མིའི་ཐོབ་ཐང་གི་ཐ་སྙད་ནང་དེ་ལ་སྡེ་པ་ཕན་ཚུན་གྱི་མཐོང་ཆུང་དབྱེ་འབྱེད་ཟེར་གྱི་ཡོད། དེས་སྡེ་ཁག་ཁ་ཤས་ལ་ཆོས་ལུགས་དང་དད་མོས་རང་དབང་གི་གདལ་བཤིག་ཕོག་སླ་བ་ཡོད། དེ་ཡང་བུད་མེད་དང་། གདོད་མའི་མི་རིགས། གྲངས་ཉུང་མི་རིགས། མཚན་མཐུན་སྤྱི་ཚོགས། གནས་སྤོས་ཡུལ་མི། སྐྱབས་བཅོལ་བ་ལྟ་བུའི་སྡེ་ཁག་རྣམས་ཡིན།

རྒྱ་གར་ནང་སྡེ་པ་ནང་ཁུལ་གྱི་དབྱེ་འབྱེད་ཀྱི་དཔེ་མཚོན་ལ་བལྟས་པ་ཡིན་ན།

ཧིན་དྷུའི་རིགས་རུས་ཀྱི་གྲལ་རིམས་ནི་གཏན་འཇགས་ཀྱི་སྤྱི་ཚོགས་གྲལ་རིམ་ཞིག་ཡིན།  དེ་ཡང་སྤྱི་ཚོགས་ནང་རིགས་མཐོ་བ་དང་། རིགས་དམན་པ། དྷ་ལིཏ་ལྟ་བུའི་རིགས་རུས་མེད་པའི་སྡེ་ཁག དྷ་ལིཏ་ནི་སྤྱི་ཚོགས་ནང་དབུལ་པོའི་ཁྲོད་ནས་ཆེས་དབུལ་ཤོས་ཡིན་པས། སྤྱི་ཚོགས་དང་དཔལ་འབྱོར་འབྲེལ་བའི་བརྙས་བཅོས་དང་མཐོང་ཆུང་ཧ་ཅང་མང་པོ་གདོང་ལེན་བྱེད་དགོས་པའི་གནས་སྟངས་ཡོང་གི་ཡོད། དེའི་རྩ་བ་ཧིན་དྷུའི་ཆོས་ལུགས་ནང་ཡོད་ཀྱང་། རིགས་ཀྱི་དབྱེ་བ་དེ་རྒྱ་གར་གྱི་སྤྱི་ཚོགས་ཁྱོན་ཡོངས་ནང་ཁྱབ་ནས་ཡོད་པ་དང་། ཆོས་དད་ཡོད་མཁན་ཚང་མས་རང་ཉིད་རིགས་རུས་བྱེ་བྲག་ཅིག་གི་ཁོངས་སུ་གཏོགས་པར་ངོས་འཛིན་བྱེད་ཀྱི་ཡོད། དཔེར་ན། རྒྱ་གར་བ་ཡེ་ཤུ་དང་ཁ་ཆེ་མང་པོ་ཞིག་གི་ཡོངས་ཁུངས་དྷ་ལིཏ་རེད།

རྒྱ་གར་རང་བཙན་ཐོབ་སྐབས་གཞུང་གིས་རིགས་རུས་ཀྱི་གྲལ་རིམ་གྱི་དབྱེ་འབྱེད་བཀག་སྡོམ་དང་། རིགས་རུས་དབྱེ་འབྱེད་བྱེད་པ་དེར་རིགས་དམན་རྣམས་ལ་ཁ་གཏད་ཀྱི་ལས་ཀའི་གོ་སྐབས་སོགས་སྔར་ལྷག་ཡར་རྒྱས་གཏོང་རྒྱུའི་ལམ་ལུགས་གཏན་འབེབས་བྱས་ཡོད། ལམ་ལུགས་འདི་ཡི་འོག་དྷ་ལིཏ་ཚོར་གཞུང་གི་ལས་ཀ་དང་། གཞུང་གི་བཏང་འཛིན་འོག་ཡོད་པའི་མཐོ་རིམ་སློབ་གཉེར་ཁང་ཁག་ཏུ་ཟུར་བཅད་རྐུབ་སྟེགས་བཞག་ཡོད་པ་མ་ཟད་བདེ་དོན་མཐུན་རྐྱེན་འགའ་ཞིག་ཀྱང་བསྐྲུན་ཡོད། ཚང་མས་དེ་དཔེ་ཡག་པོ་བྱུང་འདུག་བསམ་གྱི་རེད། འོན་ཀྱང་མཐུན་རྐྱེན་དེ་ཧིན་དྷུ་ཡིན་པའི་དྷ་ལིཏ་ཚོ་དང་། སིཁ། དྷ་ལིཏ་ནང་པར་བསྒྱུར་བ་ཚོ་གཅིག་པུར་སྦྱོར་སྤྲོད་བྱེད་ཀྱི་ཡོད། ཡེ་ཤུ་དང་ཁ་ཆེ་ཡིན་པའི་དྷ་ལིཏ་ཚོར་བདེ་དོན་གྱི་མཐུན་རྐྱེན་དེ་དག་སྤྲོད་ཀྱི་མེད།

ཡེ་ཤུ་དང་ཁ་ཆེ་ཡིན་པའི་དྷ་ལིཏ་ཚོའི་རིགས་རུས་དང་། ཁོ་ཚོ་གྲངས་ཉུང་ཆོས་དད་པ་ཡིན་པའི་རྒྱུ་མཚན་གཞི་རྩར་བཟུང་ནས་སྤྱི་ཚོགས་ནང་མཐོང་ཆུང་དབྱེ་འབྱེད་ཡོང་གི་ཡོད། དེ་བཞིན་སྲིད་གཞུང་གིས་རིགས་རུས་དབྱེ་འབྱེད་བྱེད་པའི་ཁ་གཏད་ཀྱི་ལས་ཀའི་གོ་སྐབས་སོགས་སྔར་ལྷག་ཡར་རྒྱས་གཏོང་རྒྱུའི་ལམ་ལུགས་གཏན་འབེབས་བྱས་ཡོད་པ་དེར་ཡང་ཆོས་ལུགས་གཞི་རྩར་བྱས་ཏེ་ཁོང་ཚོ་དབྱེ་འབྱེད་གཏོང་གི་ཡོད། འདིས་ཡེ་ཤུ་དང་ཁ་ཆེའི་དྷ་ལིཏ་ཚོར་དཔལ་འབྱོར་དང་སྤྱི་ཚོགས་འཕེལ་རྒྱས་ལ་དོ་ཕོགས་གཏོང་གི་ཡོད།

མདོར་བསྡུས་ན། སྲིད་གཞུང་གིས་ཆོས་ལུགས་དང་དད་མོས་གཞི་རྩར་བཞག་ནས་སྤྱི་ཚོགས་ནང་དབྱེ་འབྱེད་གཏོང་མི་རུང་ཞིང་།  དེ་ལས་ལྡོག་སྟེ་སྲིད་གཞུང་གིས་ནུས་པ་ལྡན་པའི་བྱེད་ཐབས་ལ་བརྟེན་ནས་སྤྱི་ཚོགས་ནང་མཐོང་ཆུང་དབྱེ་འབྱེད་སྔོན་འགོག་དང་བཀག་འགོག་བྱེད་རྒྱུའི་འགན་དབང་སྤྲད་ཡོད།

མཐོང་ཆུང་དབྱེ་འབྱེད་ནི་རྣམ་པ་འདྲ་མིན་ཐོག་ནས་ཡོང་གི་ཡོད་པ་དང་དེས་འཚོ་བའི་ཆ་ཡོངས་ལ་དོ་ཕོགས་གཏོང་གི་ཡོད། ཆོས་ལུགས་སམ་དད་མོས་ཐེ་བའི་སྡེ་ཁག་ནང་ཁུལ་བཅས་རྒྱུ་མཚན་མང་དག་ཅིག་ལ་བརྟེན་ནས་མཐོང་ཆུང་དབྱེ་འབྱེད་ལ་ཡང་སེ་གདོང་ལེན་བྱེད་དགོས་ཆགས་ཀྱི་ཡོད།

ཁྱེད་རང་གིས་འགྲོ་བ་མིའི་ཐོབ་ཐང་གི་སྐོར་ཡིག་ཆ་ཁག་ཐེ་བའི་མཐོང་ཆུང་དབྱེ་འབྱེད་ལས་སྲུང་སྐྱོབ་བྱེད་སྟངས་སྐོར་དྲྭ་རྒྱའི་ནང་ཡོད་སྦྱོང་བརྡར་གྱི་ཡིག་ཆ་ཁག་ནས་བལྟ་ཐུབ།

སྐལ་བཟང་ཚེ་རིང་གིས་བསྒྱུར།
འབའ་བ་སྐལ་བཟང་རྒྱལ་མཚན་དང་། སྐལ་བཟང་ཚེ་རིང་གཉིས་ཀྱིས་ཞུས་དག་བཏང་།

ཆོས་ལུགས་སམ་དད་མོས་རང་དབང་སྐོར་ནང་དོན། – ཕ་མ་དང་བུ་ཕྲུག  

སྤྱི་དམངས་དང་ཆབ་སྲིད་ཐོབ་ཐང་སྐོར་གྱི་སྤྱི་ཆིངས་ཀྱི་དོན་ཚན་ ༡༨ པས། ཆོས་ལུགས་སམ་དད་མོས་རང་དབང་དང་འབྲེལ་ནས་ཕ་མ་དང་ཕྲུ་གུ་ཚོར་དམིགས་བསལ་ཐོབ་ཐང་དེ་འདྲ་སྤྲད་ཡོད།

ཕ་མ་དང་ཕྲུ་གུའི་ཁྲིམས་བཀོད་ལྟ་སྐྱོང་བྱེད་མཁན་ལ་སོ་སོའི་ཕྲུ་གུར་ཆོས་ལུགས་དང་། བཟང་སྤྱོད་ཀྱི་སློབ་གསོ་སྤྲོད་རྒྱུའི་རང་དབང་ཡོད་པ་དང་། དེ་བཞིན་རང་ཉིད་ཀྱི་ཆོས་དད་ཡིད་ཆེས་ལྟར་ཁྱིམ་ཚང་གི་འཚོ་བ་གོ་སྒྲིག་བྱེད་པའི་རང་དབང་ཡང་ཡོད།

འགྲོ་བ་མིའི་ཐོབ་ཐང་ཡོད་མཁན་ནི་ནར་སོན་པ་ཚོ་གཅིག་པུ་མིན། བྱིས་པ་ཚོར་ཡང་ཆོས་ལུགས་སམ་དད་མོས་རང་དབང་གི་ཐོབ་ཐང་ཡོད། དཔེར་ན། ཆོས་ལུགས་སམ་དད་མོས་བྱེད་མཁན་གྱི་སྤྱི་ཚོགས་ཤིག་གི་འཚོ་བའི་ཆ་ཤས་བྱེད་པ་དང་། ཆོས་ལུགས་ཀྱི་དུས་སྟོན་དང་བྱ་བར་ཡང་མཉམ་ཞུགས་བྱེད་པའི་ཐོབ་ཐང་ཡོད།

ཕྲུ་གུའི་ཕ་མ་དང་ཁྲིམས་བཀོད་ལྟ་སྐྱོང་བྱེད་མཁན་གྱིས་འདོད་མོས་ལྟར་ཕྲུ་གུ་ཚོར་ཆོས་ལུགས་ཀྱི་སློབ་གསོ་ལེན་པའི་ཐོབ་ཐང་ཡོད། ཕ་མའི་འདོད་པ་མེད་བཞིན་དུ་ཕྲུ་གུ་ཚོར་འགྱོད་བཤགས་རྣམ་པའི་ཆོས་ལུགས་སློབ་གསོའི་ནང་ཆ་ཤས་ལེན་རྒྱུར་དབང་ཡོད་བྱེད་ཆོག་གི་མེད་པ་མ་ཟད། ཕྲུ་གུ་འཚར་ལོངས་དང་མཉམ་དུ་ཁོང་ཚོའི་འདོད་མོས་ཇི་ཡིན་ལ་དེ་མཚུངས་ཀྱི་བསྟུན་དགོས་རྒྱུ་གལ་ཆེ་ཡིན།

ཐོབ་ཐང་དེ་དག་གདལ་བཤིག་བཏང་བའི་དཔེ་མཚོན་མང་པོ་ཡོད། དཀྱིལ་ཤར་ཨེ་ཤི་ཡའི་རྒྱལ་ཁབ་ཁག་ནང་། དེ་སྔའི་ཨུ་རུ་སུའི་ཤུལ་བཞག་གི་སྲིད་བྱུས་རྒྱུན་སྐྱོང་གིས་སྲིད་གཞུང་ཚོས་སྤྱི་ཚོགས་ཀྱི་བྱ་གཞག་ཡོད་ཚད་ལ་བཏང་འཛིན་བྱེད་ཐབས་བྱེད་ཀྱི་ཡོད། དཔེར་ན། ཏ་ཇི་ཀི་སི་ཐན་ནང་རང་ལོ་ ༡༨ མན་ཚོར་གཤིན་ཆོག་ལས་གཞན་པའི་ཆོས་ལུགས་ལ་དད་གུས་དང་ཆོས་ལུགས་ཀྱི་བྱ་བར་མཉམ་ཞུགས་བྱེད་ཆོག་གི་མེད། དཀྱིལ་ཤར་ཨེ་ཤི་ཡའི་རྒྱལ་ཁབ་གཞན་ནང་། སྲིད་གཞུང་གིས་སློབ་ལོ་སོན་པའི་ཕྲུ་གུ་ཚོར་ཁ་ཆེ་དང་ཡེ་ཤུའི་ལྷ་ཁང་ལ་འགྲོ་མཁན་དང་། དབྱར་ཁའི་སློབ་ཕྲུག་གི་འདུ་འཛོམས་ལ་མཉམ་ཞུགས་བྱེད་མཁན་ཚོར་འདྲི་ཞིབ་དང་བརྙས་བཅོས་བྱེད་པ་མ་ཟད། སློབ་ཕྲུག་ཚོར་སློབ་གྲྭའི་ནང་ཡོངས་གྲགས་ཐེར་འདོན་སྐྱོན་བརྗོད་ཀྱང་བྱེད་དུ་འཇུག་གི་ཡོད།

དེ་འདྲ་ཡིན་དུས་སྲིད་གཞུང་ཁ་ཤས་ཀྱིས་ཕྲུ་གུ་ཚོར་ཆོས་ཉམས་ལེན་བྱེད་རྒྱུར་བཀག་འགོག་བྱེད་ཀྱི་ཡོད། ཡང་སྲིད་གཞུང་ཁ་ཤས་ཀྱིས་གྲངས་མང་གི་ཆོས་ལུགས་སུ་བསྒྱུར་རྒྱུའི་དམིགས་ཡུལ་བཟུང་སྟེ་གྲངས་ཉུང་མི་རིགས་ཡིན་པའི་ཕྲུ་གུ་རྣམས་ཆོས་ལུགས་ཀྱི་སྒྲིག་འཛུགས་དེ་འདྲའི་ནང་བཙན་དབང་གིས་མཉམ་ཞུགས་བྱེད་དུ་འཇུག་གི་ཡོད། དེ་ནི་ཕྲུ་གུ་ཚོར་འགྱོད་བཤགས་རྣམ་པའི་ཆོས་ལུགས་སློབ་གསོའི་ནང་དངོས་སུ་ཆ་ཤས་ལེན་རྒྱུ་ཕར་ཞོག་སློབ་འཁྲིད་ཀྱང་བྱེད་ན་མི་འགྲིག་པ་སྲིད་གཞུང་ལ་འགན་ཁུར་ཡོད་བཞིན་དུ་ད་དུང་ཡང་དེ་རིགས་ཡོང་གི་ཡོད།

ཀྲར་ཀི་ཡི་ནང་། བསྐྱར་བཅོས་བྱས་མིན་ལ་མ་ལྟོས་པར་ད་དུང་ཡང་ཆོས་ལུགས་ཀྱི་གོམས་སྲོལ་དང་བཟང་སྤྱོད་ཀྱི་བསླབ་གཞི། དེ་བཞིན་སློབ་གྲྭའི་སློབ་དེབ་ནང་ཕྲུ་གུ་ཚོར་འགྱོད་བཤགས་རྣམ་པའི་ཆོས་ལུགས་སློབ་གསོའི་སྐོར་འཁོད་ཡོད། འཇིའུ་དང་ཡེ་ཤུའི་སློབ་མ་ཚོར་ལྟ་གྲུབ་ཙམ་དུ་ཆག་ཡང་ཡོད་ནའང། དངོས་དོན་ལ་ཆག་ཡང་དེ་དག་ལེན་རྒྱུར་དཀའ་ལས་ཁག་པོའམ་ཡང་ན་ལེན་ཐབས་རྩ་བ་ནས་མེད། ཨ་ལེ་ཝི་དང་། བྷ་ཧའེ། ཆོས་མེད་སྨྲ་བ། ལྷ་དང་སྐྱེ་བ་སྔ་ཕྱི་སོགས་ཁས་མི་ལེན་མཁན་གྱི་ཁྱིམ་ཚང་ཁག་གི་ཕྲུ་གུའམ། དེ་བཞིན་སློབ་ཕྲུག་སོ་སོ་རང་ཉིད་ལ་ལྟ་བ་ཡོད་མཁན་ཚོ་བཙན་དབང་གིས་འཛིན་གྲྭ་ལེན་འཇུག་གི་ཡོད། དཔེ་མཚོན་དེ་ཚོ་ཚང་མའི་ནང་ཕྲུ་གུ་དང་ཕ་མ་གཉིས་ཀའི་ཐོབ་ཐང་བརྩི་མེད་རྡོག་རོལ་བཏང་ཡོད།

བྱིས་པའི་ཐོབ་ཐང་གི་སྤྱི་ཆིངས་གཏན་འབེབས་མ་བྱས་གོང་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཁྲིམས་སྒྲིག་ཁག་གི་ནང་བྱིས་པའི་ཐོབ་ཐང་སྐོར་ལ་དམིགས་བསལ་གླེང་སློང་བྱེད་མྱོང་མེད། བྱིས་པའི་ཐོབ་ཐང་གི་སྤྱི་ཆིངས་ཀྱིས་དེར་འགྱུར་བ་བཏང་ཡོད། དེ་ཡང་ཕྲུ་གུ་ཚོ་ནི་ཐོབ་ཐང་འཛིན་མཁན་ཡིན་པ་ནན་བརྗོད་བྱས་ཡོད་པ་དང་། སྤྱི་ཆིངས་ཀྱི་དོན་ཚན་ ༡༤ པའི་ནང་ཕྲུ་གུ་ཚོར་ཆོས་ལུགས་སམ་དད་མོས་ཀྱི་རང་དབང་ཡོད་པ་འཁོད་ཡོད།

དོན་ཚན་ ༡༤ པ་ལྟར་ན། ཕྲུ་གུ་ཚོ་ནི་རང་དབང་ལྡན་པ་དང་གཉོད་ཆུང་བ་ཡིན་པར་བརྟེན། ལྷག་པར་སྲིད་གཞུང་དང་འབྲེལ་བའི་གནད་དོན་ཁག་ལ་ཆོས་ལུགས་སམ་དད་མོས་རང་དབང་ལག་བསྟར་བྱེད་པར་ཕ་མའི་རོགས་པ་དང་ལམ་སྟོན་དགོས་ཀྱི་ཡོད།

སྤྱི་ཆིངས་ནང་། ལས་དོན་ཚང་མར་མཛུབ་ཁྲིད་བྱེད་པའི་རྩ་དོན་ནི་བྱིས་པའི་ཁེ་ཕན་ཆེ་ཤོས་དེ་ཡིན་ཞེས་གཏན་འབེབས་བྱས་ཡོད། དེས་ད་དུང་བྱིས་པ་ཚོར་སོ་སོར་དོ་ཕོགས་སམ་ཤུགས་རྐྱེན་ཐེབས་པའི་སྐོར་ལ་རང་ཉིད་ཀྱི་བསམ་ཚུལ་ཇི་ཡོད་འདོན་པའི་རང་དབང་ཡོད་པ་ནན་བཤད་བྱས་ཡོད། འོན་ཀྱང་མང་ཆེ་བར་དར་མ་ན་ཚོད་ལོན་པ་དང་། ལྷག་པར་དུ་ཕ་མ་གཉིས་ཀྱིས་ཁེ་ཕན་ཆེ་ཤོས་དེ་གང་ཡིན་ཐག་གཅོད་པ་མ་ཟད། དེའི་ཆེད་སྐད་ཆ་ཡང་ཤོད་ཀྱི་ཡོད།

འོན་ཀྱང་སྐབས་རེ་ཕྲུ་གུ་དང་ཕ་མའི་འདོད་འདུན་མི་འདྲ་བ་ཡོང་སྲིད་ཀྱང་། གནས་སྟངས་དེ་ཚོའི་འོག་ཕྲུ་གུའི་ཆོས་ལུགས་སམ་དད་མོས་རང་དབང་དེ་བཞིན་ཕ་མའི་དེ་མཚུངས་ཀྱི་རང་དབང་དང་དོ་མཉམ་པ་དགོས་ཀྱི་ཡོད། དཔེར་ན། ཕྲུ་གུ་ལོ་ན་ག་ཚོད་སོན་སྐབས་ཆོས་ལུགས་སམ་དད་མོས་སྐོར་ལ་སོ་སོ་རང་ངོས་ནས་ཐག་གཅོད་བྱེད་ཆོག་གམ། ཁོ་ཚོ་ལྷ་ཁང་ལ་འགྲོ་འདོད་ཡོད་མིན་སྐོར་ལྟ་བུ་ཡིན།

བྱིས་པའི་ཐོབ་ཐང་གི་སྤྱི་ཆིངས་ལྟར་ན། ཕྲུ་གུའི་འཚར་ལོངས་འཕེལ་རྒྱས་དང་མཚུངས་པར་ཆོས་ལུགས་སམ་དད་མོས་རང་དབང་གི་གནད་དོན་ཐད་ཕ་མའི་ལམ་སྟོན་བྱེད་དགོས། ཕྱོགས་གཞན་ནས་བརྗོད་ན། ཕྲུ་གུ་ལོ་ན་ཇི་ཙམ་སྨིན་པ་དེ་ཙམ་གྱིས་རང་དབང་ཆེ་བ་ཡོད་དགོས།

རྒྱལ་སྤྱིའི་ཁྲིམས་ལུགས་ཀྱི་ཚད་གཞི་ལྟར་ན་ལོ་ ༡༨ ལ་ནར་སོན་པར་ངོས་ལེན་བྱེད་ཀྱི་ཡོད། འོན་ཀྱང་རང་དབང་ག་ཚོད་དང་སེམས་ཀྱི་འཚར་ལོངས་ཀྱི་ཚད་གཞི་ཇི་ལོན་རིག་གཞུང་དང་གནས་སྟངས་གང་ལ་གཞི་བཞག་དགོས་མིན་ཡང་དྲི་བ་ཞིག་ཡིན། རྒྱལ་ཁབ་མི་འདྲ་བ་སོ་སོར་ཁྲིམས་དང་སྒྲིག་གཞི་ཡང་མི་འདྲ་བ་ཡོད། དཔེར་ན་སུ་ཝེ་ཌེན་ནང་ཕྲུ་གུ་ལོ་ན་ ༡༢ ནས་སོ་སོའི་འདོད་མོས་ལས་ལྡོག་སྟེ་ཆོས་ལུགས་སྤྱི་ཚོགས་ཀྱི་ཚོགས་མི་བཟོ་ཆོག་གི་མེད།

བྱིས་པའི་ཐོབ་ཐང་གི་སྤྱི་ཆིངས་ཀྱིས་ཕ་མས་ཕྲུ་གུ་གསོ་སྐྱོང་བྱེད་ཐབས་སྐོར་ཡོངས་ཁྱབ་ཀྱི་ཚད་གཞི་གཏན་འབེབས་བྱས་ཡོད། ཆོས་ལུགས་སམ་དད་མོས་ལག་བསྟར་བྱེད་པ་དེས་ཕྲུ་གུའི་ལུས་སེམས་གཉིས་ཀའི་འཚར་ལོངས་ལ་གནོད་སྐྱོན་ཐེབས་ན་མི་འགྲིག

ཕ་མའི་ཆོས་ལུགས་སམ་དད་མོས་རང་དབང་དང་ཕྲུ་གུའི་ཐོབ་ཐང་དང་འབྲེལ་བའི་གནད་དོན་སྐོར་གྱི་གྱོད་གཞི་ཁྲིམས་ཁང་ལ་ཡང་སེ་ཐུག་གི་ཡོད། འོན་ཀྱང་། ཇེ་ཧོ་ཝ་སེ་ཝི་ཊི་ནེ་སེ་ཡིས་ཕྲུ་གུར་ཟུང་ཁྲག་བླུག་རྒྱུར་ཕ་མས་བཀག་འགོག་བྱེད་པ་ནི་ཁྲིམས་ཐོག་ནས་ཕ་མའི་ཆོས་ལུགས་སམ་དད་མོས་རང་དབང་གི་ལྡོག་ཕྱོགས་དང་ཕྲུ་གུའི་མི་ཚེའི་རང་དབང་གི་མཐུན་ཕྱོགས་སུ་ཁྲིམས་ཁང་ནས་ཐག་གཅོད་བྱས་ཡོད།

མདོར་བསྡུས་ན། བརྙན་ཐུང་འདིའི་ནང་ང་ཚོས་ཕ་མ་དང་བུ་ཕྲུག་གི་ཐོབ་ཐང་སྐོར་ལྟ་ཞིབ་བྱས་ཡོད།

ཕྲུ་གུར་ཆོས་ལུགས་སམ་དད་མོས་ཀྱི་རང་དབང་ཡོད་པ་དང་། ཕ་མར་ཕྲུ་གུའི་དད་མོས་ལྟར་ཕྲུ་གུ་གསོ་སྐྱོང་བྱེད་པའི་ཐོབ་ཐང་ཡོད། དེ་ཡང་ཕྲུ་གུའི་ལོ་ཚད་ནར་སོན་མིན་དང་འབྲེལ་ནས་བྱེད་དགོས་པ་དང་། ཆོས་ལུགས་སམ་དད་མོས་ལག་བསྟར་བྱེད་པ་དེས་ཕྲུ་གུའི་ལུས་སེམས་གཉིས་ཀའི་འཚར་ལོངས་ལ་གནོད་སྐྱོན་ཐེབས་ན་མི་འགྲིག སྲིད་གཞུང་གིས་ཕྲུ་གུར་ཆོས་དད་བྱེད་རྒྱུར་འགོག་རྐྱེན་བཟོ་བ་དང་། དེ་བཞིན་སྲིད་གཞུང་གི་ཆོས་ལུགས་སྡེ་པ་མང་བས་གྲངས་ཉུང་གི་བུ་ཕྲུག་ལ་བཙན་དབང་གིས་སློབ་ཁྲིད་བྱེད་པ་ནི་ཐོབ་ཐང་བརྩི་མེད་བཏང་བའི་དཔེ་མཚོན་ཡིན།

མདོར་བསྡུས་ན། བརྙན་ཐུང་འདིའི་ནང་ང་ཚོས་ཕ་མ་དང་བུ་ཕྲུག་གི་ཐོབ་ཐང་སྐོར་ལྟ་ཞིབ་བྱས་ཡོད།

ཕྲུ་གུར་ཆོས་ལུགས་སམ་དད་མོས་ཀྱི་རང་དབང་ཡོད་པ་དང་། ཕ་མར་ཕྲུ་གུའི་དད་མོས་ལྟར་ཕྲུ་གུ་གསོ་སྐྱོང་བྱེད་པའི་ཐོབ་ཐང་ཡོད། དེ་ཡང་ཕྲུ་གུའི་ལོ་ཚད་ནར་སོན་མིན་དང་འབྲེལ་ནས་བྱེད་དགོས་པ་དང་། ཆོས་ལུགས་སམ་དད་མོས་ལག་བསྟར་བྱེད་པ་དེས་ཕྲུ་གུའི་ལུས་སེམས་གཉིས་ཀའི་འཚར་ལོངས་ལ་གནོད་སྐྱོན་ཐེབས་ན་མི་འགྲིག སྲིད་གཞུང་གིས་ཕྲུ་གུར་ཆོས་དད་བྱེད་རྒྱུར་འགོག་རྐྱེན་བཟོ་བ་དང་། དེ་བཞིན་སྲིད་གཞུང་གི་ཆོས་ལུགས་སྡེ་པ་མང་བས་གྲངས་ཉུང་གི་བུ་ཕྲུག་ལ་བཙན་དབང་གིས་སློབ་ཁྲིད་བྱེད་པ་ནི་ཐོབ་ཐང་བརྩི་མེད་བཏང་བའི་དཔེ་མཚོན་ཡིན།

ཁྱེད་རང་གིས་འགྲོ་བ་མིའི་ཐོབ་ཐང་ཐེ་བའི་ཕ་མ་དང་ཕྲུ་གུའི་ཆོས་ལུགས་སམ་དད་མོས་རང་དབང་དང་འབྲེལ་བའི་ཐོབ་ཐང་གི་སྐོར་གྱི་ཡིག་ཆ་ཁག་དྲྭ་རྒྱའི་ཐོག་ཡོད་པའི་སྦྱོང་བརྡར་གྱི་ཡིག་ཆ་ཁག་ནས་གནས་ཚུལ་མང་བ་བལྟ་ཐུབ།

སྐལ་བཟང་ཚེ་རིང་གིས་བསྒྱུར།
འབའ་བ་སྐལ་བཟང་རྒྱལ་མཚན་དང་། སྐལ་བཟང་ཚེ་རིང་གཉིས་ཀྱིས་ཞུས་དག་བཏང་།

ཆོས་ལུགས་སམ་དད་མོས་རང་དབང་སྐོར་གྱི་ནང་དོན། - དད་སེམས་ལ་བརྟེན་ནས་དམག་ཞབས་དྭང་ལེན་མི་བྱེད་པ།  

བསམ་བློ་དང་། རྣམ་དཔྱོད་ཀྱི་རང་དབང་ནི་ཆོས་ལུགས་དང་དད་མོས་རང་དབང་དང་མཚུངས་པར་སྤྱི་དམངས་དང་ཆབ་སྲིད་ཐོབ་ཐང་སྐོར་གྱི་སྤྱི་ཆིངས་ཀྱི་དོན་ཚན་ ༡༨ པས་སྲུང་སྐྱོབ་བྱེད་ཀྱི་ཡོད། དེ་འདྲ་ཡིན་དུས་དད་སེམས་ལ་བརྟེན་ནས་དམག་ཞབས་དྭང་ལེན་མི་བྱེད་པ་དེ་ཡང་ཆོས་ལུགས་སམ་དད་མོས་རང་དབང་གི་ཁོངས་སུ་གཏོགས་ཀྱི་ཡོད།

དད་སེམས་ལ་བརྟེན་ནས་དམག་ཞབས་དྭང་ལེན་མི་བྱེད་པ་ནི། སོ་སོའི་ངོས་ནས་གནད་དོན་གང་ཡང་རུང་བ་ཞིག་དྭང་ལེན་བྱས་པའི་དབང་གིས་སོ་སོའི་རྣམ་དཔྱོད་དམ་ཆོས་ལུགས་དད་མོས་བརྩི་མེད་གཏོང་གི་ཡོད་པར་བརྟེན་དྭང་ལེན་བྱེད་ན་མི་འགྲིག་པ་ཞིག་ལ་ཟེར་གྱི་ཡོད།

སྐྱེ་བོ་ཚང་མར་དྭང་ལེན་མི་བྱེད་པའི་རང་དབང་ཡོད་པའི་གནད་དོན་ཁག་ཅིག་གི་དཔེ་མཚོན་ནི། དམག་ཞུགས་བྱེད་རྒྱུ་དང་། མནའ་སྐྱེལ་བྱེད་རྒྱུ། ཟུང་ཁྲག་བླུག་རྒྱུ། ཡང་ན་སྨན་བཅོས་ཀྱི་བརྒྱུད་རིམ་དེ་འདྲའི་ནང་ཞུགས་རྒྱུ་བཅས་ཚུད་ཀྱི་ཡོད།

དམག་མིའི་ནང་ཞུགས་རྒྱུར་མོས་མཐུན་མི་བྱེད་པའི་ཐོབ་ཐང་ཡོད་པ་དེ་ནི་དད་སེམས་ལ་བརྟེན་ནས་དམག་ཞབས་དྭང་ལེན་མི་བྱེད་པའི་གནད་དོན་དམིགས་བཀར་བ་ཞིག་ཡིན་པ་མཉམ་སྦྲེལ་རྒྱལ་ཚོགས་ཀྱི་ཡིག་ཆའི་ནང་དུ་འཁོད་ཡོད། དེ་ནི་ཁྲིམས་ཐོག་ནུས་པ་ཡོད་པའི་རྒྱལ་ཚོགས་ཀྱི་ཁྲིམས་ཡིག་གམ། ཡང་ན་འགྲོ་བ་མིའི་ཐོབ་ཐང་གི་ཡོངས་ཁྱབ་གསལ་བསྒྲགས་གང་དུའང་འཁོད་མེད། དེ་དག་གི་ཚབ་ཏུ་དེ་ནི་མཉམ་སྦྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལས་དོན་ཚོགས་ཆུང་གི་སྤྱིར་བཏང་མཆན་འགྲེལ་ ༢༢ པ་ཞེས་པ་དེའི་ནང་འཁོད་ཡོད།

ཡིག་ཆ་དེ་མཉམ་སྦྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ཁྱད་མཁས་མི་སྣ་ཚོས་བྲིས་པ་ཞིག་ཡིན་པ་དང་། ཡིག་ཆ་དེས་སྲིད་གཞུང་ཁག་གིས་སྤྱི་དམངས་དང་ཆབ་སྲིད་ཐོབ་ཐང་སྐོར་གྱི་རྒྱལ་སྤྱིའི་སྤྱི་ཆིངས་ཀྱི་དོན་ཚན་ ༡༨ པ་དེ་གོ་བ་ལེན་ཕྱོགས་ཇི་ལྟར་ཡིན་པ་བཤད་ཀྱི་ཡོད།  དོན་ཚན་ ༡༨ པ་དེས་དམག་ཞུགས་བྱེད་རྒྱུ་ནི་དད་མོས་དང་འབྲེལ་ནས་དྭང་ལེན་བྱེད་མི་དགོས་ཡིན་པ་དང་། དེ་ཡང་གལ་སྲིད་སོ་སོའི་རྣམ་དཔྱོད་རང་དབང་དང་། ཆོས་ལུགས་སམ་དད་མོས་རང་དབང་རྩ་མེད་བཟོ་བའམ་ནང་འགལ་ཆགས་ཀྱི་འདུག་ན་ཞེས་ཚོགས་ཆུང་དེས་མཐའ་བསྡོམས་བརྒྱབ་ཡོད།

རྒྱལ་ཁབ་མང་པོས་ཐོབ་ཐང་དེ་ངོས་ལེན་བྱས་པའི་སྒོ་ནས་གཞུང་ལ་ཞབས་ཕྱི་ཞུ་རྒྱུའི་གདམ་ཁ་གཞན་ནམ་དམག་ཞུགས་བྱེད་རྒྱུར་ཆག་ཡང་སྤྲོད་ཀྱི་ཡོད། འོན་ཀྱང་སྲིད་གཞུང་མང་པོས་ཆོས་ལུགས་དད་མོས་དང་དམག་འཁྲུག་ལ་མོས་མཐུན་མེད་པའི་རྒྱུ་མཚན་ལ་བརྟེན་ནས་དམག་ཞུགས་མི་བྱེད་མཁན་ཚོར་ད་དུང་བཙོན་འཇུག་གི་ཉེས་ཆད་གཏོང་གི་ཡོད། ཇེ་ཧོ་ཝ་སེ་ཝི་ཊི་ནེ་སེ་སི་ཆོས་དད་ཚོ་ཁག་རྣམས་ལ་ཤུགས་རྐྱེན་ཆེ་ཤོས་ཐེབས་ཀྱི་ཡོད། དཔེར་ན་ཕྱི་ལོ་ ༢༠༡༦ ཟླ་ ༡༢ པའི་ནང་དད་མོས་དང་འབྲེལ་ནས་དམག་ཞུགས་བྱེད་རྒྱུར་དྭང་ལེན་མ་བྱས་པར་ལྷོ་ཀོ་རི་ཡའི་ནང་ཇེ་ཧོ་ཝ་སེ་ཝི་ཊི་ནེ་སེ་སི་ཁོངས་གཏོགས་མི་ ༣༨༩ བཙོན་འཇུག་ཉེས་ཆད་མྱོང་བཞིན་ཡོད།

མཉམ་སྦྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལྷན་ཚོགས་ལྟར་ན། དམག་མིར་ཞུགས་རྒྱུར་དྭང་ལེན་མི་བྱེད་མཁན་ཚང་མར་དབྱེ་འབྱེད་མེད་པའི་སྒོ་ནས་ཞབས་ཕྱི་ཞུ་རྒྱུའི་གདམ་ཁ་གཞན་དགོས་པ་དང་། དེ་བཞིན་དམག་ཞབས་ནང་སྨས་པ་ཚོར་དད་མོས་དང་འབྲེལ་ནས་དྭང་ལེན་མི་བྱེད་པའི་ཐོབ་ཐང་ཡོད་པའི་གནས་ཚུལ་མཁོ་སྤྲོད་བྱེད་པ་དང་ཐོབ་ཐང་ལེན་ཕྱོགས་སྐོར་ཤེས་རྟོགས་ཡོད་པ་བཟོ་དགོས་པ་བརྗོད་ཡོད། དམག་ཁྲལ་རྒྱུགས་བཞིན་པའི་དམག་མི་ཚོ་དང་དྭང་བླང་པ་ཚོར་དམག་ཞབས་ནང་མི་ཞུགས་པའི་སྔ་རོལ་དང་དམག་མིའི་ནང་ཡོད་སྐབས་དགག་བྱ་བྱེད་ཆོག་པ་ཞིག་ཡིན།

དམག་ཞབས་ལ་དྭང་ལེན་མི་བྱེད་པའི་ཐོག རྒྱལ་ཁབ་རིམ་པའི་དད་སེམས་དང་འབྲེལ་ནས་དམག་ཞབས་དྭང་ལེན་མི་བྱེད་པའི་གནས་སྟངས་གཞན་དེ་འདྲའང་ངོས་འཛིན་བྱས་ཡོད། འདི་ནི་མང་ཆེ་བ་འཕྲོད་བསྟེན་ལྟ་སྐྱོང་དང་འབྲེལ་བ་ཡོད། དཔེར་ན། སྐྱེ་གཡོག་དང་སྨན་པས་ཕྲུ་གུ་མངལ་ནས་དབྱུང་རྒྱུའི་གཤག་བཅོས་བྱེད་རྒྱུ་ཁས་ལེན་མི་བྱེད་པ་ལྟ་བུ། རྒྱལ་ཁབ་གཞན་ཁ་ཤས་ནང་། མཚན་མཐུན་གྱི་གཉེན་སྒྲིག་དང་འབྲེལ་ནས་དམག་ཞབས་དྭང་ལེན་མི་བྱེད་པར་དགག་པ་བརྒྱབ་པའི་གནད་དོན་ཡོང་གི་ཡོད། དཔེར་ན་དད་སེམས་ལ་བརྟེན་ནས་དམག་ཞབས་དང་ལེན་མ་བྱས་པ་དང་། བུད་མེད་ཀྱི་ཐོབ་ཐང་ངམ་དབྱེ་འབྱེད་ལ་ངོ་རྒོལ་བྱེད་པའི་ཁྲིམས་ཡིག་དབར་ཕན་ཚུན་འགལ་ཟླ་ཡོང་གི་ཡོད་པས། དེར་བརྟེན་འགལ་ཟླ་བྱུང་སྐབས་གདོང་ལེན་བྱེད་དཀའ་བའི་དྲི་བ་དེ་འདྲ་ཡང་སེ་ཡོང་གི་ཡོད།

དད་སེམས་དང་འབྲེལ་ནས་དམག་ཞབས་དང་ལེན་མ་བྱས་ན་གང་བྱེད་དགོས་མིན་རྒྱལ་སྤྱིའི་ཁྲིམས་ཡིག་གི་ཚད་གཞི་གསལ་པོ་མེད། དོན་དངོས་ཐོག་གནད་དོན་འདི་ནི་རྩོད་གཞི་ཧ་ཅང་ཆེ་བ་ཞིག་ཡིན།

གཤམ་གྱི་སྒྲུབ་བྱེད་གསུམ་ཁྱོད་རང་ལ་ངེས་པར་འཕྲད་སྲིད་པ་ཡིན།:   

མི་ཁ་ཤས་ཀྱིས་དད་སེམས་དང་འབྲེལ་ནས་དམག་ཞབས་དྭང་ལེན་མ་བྱས་པ་ནི་ཆོས་ལུགས་སམ་དད་མོས་ལ་ལྟོས་མེད་ཐོབ་ཐང་གི་ཆ་ཤས་ཤིག་ཡིན་པ་དང་། ཐོབ་ཐང་འདི་རིགས་ལ་ནམ་ཡང་ཚད་བཀག་ཐེབས་མི་སྲིད་པར་བསམ་གྱི་ཡོད། སོ་སོའི་དད་སེམས་ལ་བརྩི་སྲུང་བྱས་ན་ཆད་པ་གང་ཡང་གཅོད་མི་འོས་པ་ཡིན་པ་རྩོད་པ་བྱེད་ཀྱི་ཡོད། གང་ལྟར་ཡང་ཕྱོགས་གཅིག་ནས་ལྷག་བསམ་རྣམ་དག་གི་ཞི་བདེ་རིང་ལུགས་པ་ཞིག་དང་ཕྱོགས་གཞན་ནས་དམག་མི་ཞིག་གཉིས་ཀ་ཡོང་མི་སྲིད་པ་ཡིན། དེ་འདྲ་ཡིན་དུས་ཞི་བདེ་རིང་ལུགས་པར་བཙན་ཤེད་ཀྱིས་དམག་མི་བྱེད་དུ་བཅུག་ནས་ཁོ་ཚོའི་སེམས་ནང་ཡོད་པའི་ཆོས་ལུགས་སམ་དད་མོས་ཀྱི་ལྟོས་མེད་རང་དབང་ལ་བརྩི་མེད་བྱས་པ་ཞིག་རེད།

མི་ཁག་ཅིག་གིས་འདི་ནི་ལྟོས་མེད་ཀྱི་རང་དབང་ཞིག་ཡིན་པར་མོས་མཐུན་བྱེད་ཀྱི་ཡོད་ནའང་། གནས་སྟངས་དང་འབྲེལ་བ་ཡོད་པར་བསམ་གྱི་ཡོད། ཁོ་ཚོས་དམག་ཁྲལ་དང་། བཙོན་པ། དེ་བཞིན་མི་གཞན་དག་གིས་རང་གི་གནས་སྟངས་ཀྱི་རྐྱེན་པས་གདམས་ཁ་གཞན་མེད་པས། ཁོ་ཚོའི་དད་སེམས་ལ་བཙན་དབང་གིས་བརྩི་མེད་ནམ་ཡང་གཏོང་མི་རུང་བ་རྩོད་པ་བྱེད་ཀྱི་ཡོད། འོན་ཀྱང་རང་འདོད་ལྟར་ལས་ཀར་ཞུགས་པ་དང་ལས་མཚམས་འཇོག་མཁན་གྱི་མི་དེ་དག་གིས་རང་འགུལ་ངང་རང་གི་སྦྱིན་བདག་གིས་ཁོ་ཚོའི་དད་སེམས་དང་བསྟུན་རྒྱུའི་རེ་བ་བཅངས་མི་རུང་། བཤད་སྟངས་གཞན་ཞིག་ནི། སོ་སོའི་སེམས་གཏིང་གི་འདོད་མོས་ལྟར་བྱེད་རྒྱུའི་གདམ་ཁ་བྱས་པ་དེ་བསྟུན་གྱོང་གུན་ཞིག་ཡོང་སྲིད།

ཡང་མི་ཁག་ཅིག་གིས་སོ་སོའི་དད་སེམས་དང་འབྲེལ་ནས་དམག་ཞབས་དྭང་ལེན་མ་བྱས་པ་ནི་བྱ་སྤྱོད་ཅིག་ཡིན་པས། དེ་ནི་ཁྱོད་ཀྱི་ལེགས་ཉེས་དཔྱོད་པའི་སེམས་འབྱུང་དང་། ཆོས་ལུགས་སམ་དད་མོས་གསལ་སྟོན་བྱེད་པ་ངོས་འཛིན་བྱེད་ཀྱི་ཡོད། གསལ་སྟོན་བྱེད་པའི་རྣམ་པར་ཚད་བཀག་ཡོད་ཀྱང་། མི་གཞན་གྱི་ཐོབ་ཐང་དང་རང་དབང་དང་། སྤྱི་ཚོགས་ཀྱི་འཕྲོད་བསྟེན། སྒྲིག་ལམ་དང་ཀུན་སྤྱོད་བཅས་ལ་ངེས་པར་དུ་སྲུང་སྐྱོབ་བྱེད་དགོས་ཀྱི་ཡོད། དད་སེམས་ལ་བརྟེན་ནས་དམག་ཞབས་དྭང་ལེན་མི་བྱེད་པ་དང་འབྲེལ་བའི་ཐོག་ནས། དོ་སྣང་བྱེད་དགོས་པའི་གནད་དོན་གལ་ཆེ་གཅིག་ལ། རྒྱལ་ཁབ་ཀྱི་བདེ་འཇགས་སྲུང་སྐྱོབ་ལ་ཁ་གཡར་ནས་ཆོས་ལུགས་དང་དད་མོས་རང་དབང་ལ་ཚོད་འཛིན་བྱེད་པ་ནི་ཁྲིམས་མཐུན་གནས་བབ་ཅིག་མིན།

ཁྲིམས་ལུགས་མཁས་པ་རྣམས་ཀྱིས་ལངས་ཕྱོགས་དེ་ཚོའི་ནང་ནས་གང་ཞིག་ཡང་དག་པ་ཡིན་པའི་བསམ་ཚུལ་མི་འདྲ་བ་ཡོད།

མདོར་བསྡུས་ནས་བཤད་ན། གློག་བརྙན་འདིའི་ནང་ང་ཚོས་དད་སེམས་དང་འབྲེལ་ནས་དམག་ཞབས་དྭང་ལེན་མི་བྱེད་པའི་གནས་སྟངས་སྐོར་བལྟས་པ་རེད། དད་སེམས་དང་འབྲེལ་ནས་དམག་ཞབས་དྭང་ལེན་མ་བྱས་པ་ནི། ཚུལ་དང་མཐུན་པའི་སྒོ་ནས་ལས་དོན་ཞིག་དྭང་ལེན་མི་བྱེད་པའི་རང་དབང་ངམ་ཐོབ་ཐང་ཞིག་རེད། རྒྱལ་སྤྱིའི་འགྲོ་བ་མིའི་ཐོབ་ཐང་སྐོར་གྱི་ཁྲིམས་ཡིག་ནང་དད་སེམས་དང་འབྲེལ་ནས་དམག་ཞབས་དྭང་ལེན་མི་བྱེད་པའི་རང་དབང་དེ་སྲུང་སྐྱོབ་བྱས་ཡོད། རྒྱལ་ཁབ་མང་པོས་ཐོབ་ཐང་འདི་ཁས་ལེན་བྱེད་ཀྱི་ཡོད། འོན་ཀྱང་རྒྱལ་ཁབ་ཁ་ཤས་ཀྱིས་དད་སེམས་དང་འབྲེལ་ནས་དམག་ཞབས་དྭང་ལེན་མི་བྱེད་མཁན་རྣམས་བཙོན་འཇུག་བྱེད་ཀྱི་ཡོད། ཡང་རྒྱལ་ཁབ་མང་པོས་རྒྱབ་ཁབ་སོ་སོའི་ངོས་ནས་དད་སེམས་དང་འབྲེལ་ནས་དམག་ཞབས་དྭང་ལེན་མི་བྱེད་པ་དེེར་ངོས་འཛིན་བྱེད་སྟངས་མི་འདྲ་བ་ཡོད། འོན་ཀྱང་ཐོབ་ཐང་དེ་དག་ནི་རྩོད་གཞི་ཅན་ཞིག་ཡིན་པ་དང་། རྒྱལ་སྤྱིའི་ཁྲིམས་ལུགས་ནང་གནད་དོན་དེའི་ཐོག་ཆ་ལག་ཚང་བའི་གོང་འཕེལ་བྱེད་ཐུབ་མེད།

ཁྱེད་རང་གིས་འགྲོ་བ་མིའི་ཐོབ་ཐང་ཐེ་བའི་དད་སེམས་དང་འབྲེལ་ནས་དམག་བསྐུལ་དང་ལེན་མི་བྱེད་པའི་སྐོར་གྱི་ཡིག་ཆ་ཁག་དྲྭ་རྒྱའི་ཐོག་ཡོད་པའི་སྦྱོང་བརྡར་གྱི་ཡིག་ཆ་ཁག་ནས་གནས་ཚུལ་མང་བ་བལྟ་ཐུབ།

སྐལ་བཟང་ཚེ་རིང་གིས་བསྒྱུར།
འབའ་བ་སྐལ་བཟང་རྒྱལ་མཚན་དང་། སྐལ་བཟང་ཚེ་རིང་གཉིས་ཀྱིས་ཞུས་དག་བཏང་།

ཆོས་ལུགས་སམ་དད་མོས་རང་དབང་ལ་ཚད་བཀག  

ཁྱེད་རང་གིས་གནས་ཚུལ་བལྟ་ཀློག་བྱས་པ་དང་། ཕལ་ཆེར་རང་ཉིད་ཀྱི་མི་ཚེའི་ཉམས་མྱོང་ལས་སྲིད་གཞུང་མང་པོས་ཆོས་ལུགས་དང་དད་མོས་རང་དབང་ལ་ཚད་བཀག་དམ་བསྒྲགས་བྱེད་ཀྱི་ཡོད་པ་ཤེས་རྟོགས་ཡོད་ངེས་རེེད། སྲིད་གཞུང་དེ་དག་གིས་ཚད་བཀག་དམ་བསྒྲགས་བྱེད་དགོས་པའི་རྒྱུ་མཚན་གཅིག་གམ་དེ་ལས་མང་བའི་སྒོ་ནས་སྒྲུབ་ཐབས་བྱེད་ཀྱི་ཡོད། དེ་འདྲ་ཡིན་དུས་ཚད་བཀག་དམ་བསྒྲགས་དེ་དག་རྒྱུ་མཚན་ལྡན་པ་དང་བྱེད་ཆོག་པ་ཞིག་ཡིན་མིན་ང་ཚོས་གང་འདྲ་བྱས་ནས་ཤེས་སམ།

ཆོས་ལུགས་སམ་དད་མོས་ཡོད་ཆོག་པ་དང་། གདམ་ཁ་བྱེད་པ། བརྗེ་བསྒྱུར་བྱེད་པ། ཡང་ན་དད་པ་མི་བྱེད་པ་བཅས་ནི་ལྟོས་མེད་ཀྱི་ཐོབ་ཐང་ཞིག་ཡིན་པ་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཁྲིམས་ཡིག་ནང་ཁ་གསལ་བཀོད་ཡོད་པས་དེ་དག་ནམ་ཡང་ཚད་བཀག་བྱེད་ན་མི་འགྲིག  ཆོས་ལུགས་སམ་དད་མོས་གསལ་སྟོན་བྱེད་པའི་ཐོབ་ཐང་ཕྱོགས་གཞན་ཞིག་ནས་བཀག་སྡོམ་བྱེད་སྲིད། འོན་ཀྱང་དེ་བྱེད་པར་གཤམ་གསལ་གནད་དོན་བཞི་ལ་བརྩི་སྲུང་ངེས་པར་བྱེད་དགོས།

༡། ཚད་བཀག་གང་བྱེད་རྒྱུ་ཡིན་པ་དེ་ཁྲིམས་ནང་གསལ་དགོས། དེའི་དགོས་པ་ནི་སྲིད་གཞུང་དང་། ཉེན་རྟོགས་པ། ཁྲིམས་ཁང་བཅས་ཀྱིས་སྔོན་བརྟག་མི་ཐུབ་པའམ་རྟག་བརྟན་མེད་པའི་སྒོ་ནས་གང་བྱུང་བྱེད་པ་རྣམས་བཀག་སྡོམ་བྱེད་ཆེད་ཡིན་པ་དང།
༢། ཚད་བཀག་དེ་དག་གིས་སྤྱི་ཚོགས་ཀྱི་བདེ་འཇགས་དང་། སྤྱི་ཚོགས་ཀྱི་སྒྲིག་ཁྲིམས། འཕྲོད་བསྟེན། བཟང་སྤྱོད། མི་གཞན་གྱི་རང་དབང་དང་ཐོབ་ཐང་བཅས་སྲུང་སྐྱོབ་ངེས་པར་དུ་བྱེད་དགོས། འདི་གལ་ཆེན་པོ་ཡིན། མི་གཞན་གྱི་དགོས་ངེས་སྲུང་སྐྱོབ་བྱེད་ཆེད་ཚད་བཀག་བཟོ་བ་དང་འོས་ཐོབ་ཆེད་དུ་ཚད་བཀག་བཟོ་བ་གཉིས་ལ་ཁྱད་པར་ཆེན་པོ་ཡོད།
༣། ཚད་བཀག་དེ་དག་དབྱེ་འབྱེད་རང་བཞིན་ལྡན་པ་ཡིན་ན་མི་འགྲིག
༤། ཚད་བཀག་གང་འདྲ་ཞིག་ཡིན་རུང་རང་དབང་གསལ་སྟོན་བྱེད་པ་ལས་བྱུང་བའི་དཀའ་ངལ་དང་ཆ་སྙོམས་ངེས་པར་དུ་དགོས་ཀྱི་ཡོད།

སྒྲིག་ཁྲིམས་དེ་དག་ཤིན་ཏུ་ནས་གལ་ཆེན་པོ་ཡིན། དེ་ཚོ་མེད་ན་སྲིད་གཞུང་རང་ཉིད་ཀྱིས་འདོད་མོས་མེད་པའི་གནད་དོན་དང་། སྡེ་ཁག་གམ་ལག་བསྟར་གང་ཡང་ཚད་བཀག་བྱེད་སྲིད་པ་རེད། ཚད་བཀག་བྱེད་པ་ནི་བྱེད་ཐབས་མཐའ་མ་དེ་ཡིན་པ་ལས་སྲིད་གཞུང་གིས་དབང་འཛིན་བྱེད་རྒྱུའི་ལག་ཆ་ཞིག་མིན།

སྒྲིག་ཁྲིམས་དེ་དག་ཤིན་ཏུ་ནས་གལ་ཆེན་པོ་ཡིན། དེ་ཚོ་མེད་ན་སྲིད་གཞུང་རང་ཉིད་ཀྱིས་འདོད་མོས་མེད་པའི་གནད་དོན་དང་། སྡེ་ཁག་གམ་ལག་བསྟར་གང་ཡང་ཚད་བཀག་བྱེད་སྲིད་པ་རེད། ཚད་བཀག་བྱེད་པ་ནི་བྱེད་ཐབས་མཐའ་མ་དེ་ཡིན་པ་ལས་སྲིད་གཞུང་གིས་དབང་འཛིན་བྱེད་རྒྱུའི་ལག་ཆ་ཞིག་མིན།

དཔེར་ན། གྲོང་ཁྱེར་ཞིག་གི་ནང་ཆོས་ལུགས་མི་འདྲ་བ་ལྔ་ཡོད་པའི་དབང་དུ་བཏང། ཁོང་ཚོ་ཚང་མར་ཆོས་ལུགས་ཀྱི་བྱ་བ་བྱེད་སའི་དགོན་པ་རེ་ཡོད་པ་དང་། དེ་བཞིན་ཁུལ་སོ་སོར་གནས་སྡོད་ཁྱིམ་མཚེས་ཚོར་ཁོང་ཁྲོ་སློང་གཞིའི་སྐད་ཅོར་ངེས་ཅན་ཞིག་ཀྱང་ཚང་མས་བཟོ་གི་ཡོད། ཡིན་ནའང་མང་ཚོགས་ཀྱི་རྒྱབ་སྐྱོར་མེད་པའི་སྡེ་ཁག་ཆུང་ཆུང་ཞིག་གཅིག་པུའི་རྙོག་ཁྲ་བཟོ་ཡི་ཡོད་སྐོར་ཉེན་རྟོགས་པར་བརྡ་ལན་འབྱོར་གྱི་ཡོད།

སྐད་ཅོར་ཆེན་པོའི་རིགས་ནི་འཕྲོད་བསྟེན་ལ་གནོད་ཀྱི་ཡོད་པ་དང་། སྤྱི་ཚོགས་ཀྱི་འཕྲོད་བསྟེན་ལ་གནོད་གཞིའི་རིགས་ཡིན་ན་ཚད་བཀག་དགོས་ངེས་ཅན་གྱི་ཁྲིམས་མཐུན་གནས་བབ་ཅིག་ཡིན། ད་ཡིན་ན། ས་གནས་ཀྱི་དབང་འཛིན་པ་ཚོས་ག་རེ་བྱེད་དགོས་སམ། དེ་ཡང་སྤྱི་ཚོགས་ཀྱི་འཕྲོད་བསྟེན་ལ་སྲུང་སྐྱོབ་བྱེད་པ་དང་སུ་ལའང་དབྱེ་འབྱེད་མེད་པར་གཅིག་མཚུངས་ཀྱི་ཁྲིམས་གཞི་གང་འདྲ་ཞིག་གཏན་འབེབས་བྱེད་དགོས་སམ།

གནས་སྟངས་འདི་འདྲའི་སྐབས། སྤྱི་ཚོགས་ཀྱི་འདུ་འཛོམས་ཚང་མར་སྒྲ་སྐད་ཆེ་ཆུང་ཇི་འདྲ་ཞིག་གཏོང་ཆོག་མིན་སྐོར་གྱི་སྤྱི་ཡོངས་ཀྱི་ཁྲིམས་སྒྲིག་ཅིག་གཏན་འབེབས་བྱས་ན་རན་པོ་ཡོད། དེ་ཡང་ཆོས་ལུགས་ཀྱི་སྡེ་ཁག་དང་གཞན་ཚང་མར་གཅིག་མཚུངས་ལག་བསྟར་བྱེད་པའི་ཁྲིམས་གཞི་དེ་འདྲ་ཞིག་དགོས། སྡེ་ཁག་སུས་ཚད་གཞི་ལས་བརྒལ་བའི་སྐད་ཅོར་བཟོས་ཚེ་སྐད་ཆུང་དུ་གཏོང་རྒྱུ་དང་དེ་མིན་ཁྲིམས་ལྟར་ཉེས་ཆད་གཅིག་མཚུངས་གཏོང་དགོས། འོན་ཀྱང་ཁོ་ཚོར་སྐད་ཅི་ཡང་རྒྱག་མི་ཆོག་པ་བཟོ་བའམ་ཡང་ན་འདུ་འཛོམས་སྦད་དེ་བཀག་འགོག་བྱེད་པ་ནི་འོས་མཚམས་ཤིག་རྩ་བ་ནས་མ་རེད།

མང་ཚོགས་ཀྱིས་སོ་སོའི་རྒྱབ་སྐྱོར་མེད་པའི་སྡེ་ཁག་གཅིག་པུར་སྐྱོན་བརྗོད་ཐོ་འགོད་བྱས་ནའང་། ཉེན་རྟོགས་པས་ཉེ་རིང་མེད་པར་ཚང་མར་ཁྲིམས་སྒྲིག་གཅིག་མཚུངས་ལག་བསྟར་བྱེད་དགོས།

དེ་ནི་དཔེ་མཚོན་གོ་སླ་པོ་དང་ཆུང་ཆུང་ཞིག་རེད།

ཆོས་ལུགས་སམ་དད་མོས་རང་དབང་གི་ཐོབ་ཐང་ལ་གདལ་བཤིག་ཚབས་ཆེན་བཏང་བ་ཁག་ལ་རྟོག་ཞིབ་བྱེད་སྐབས། ཁྲིམས་སྒྲིག་ཁག་བརྩི་མེད་བྱས་པ་ལས་སླ་པོའི་ངང་མཐོང་ཐུབ། གང་ཡིན་ཟེར་ན། འགོག་རྐྱེན་བཟོས་པ་དེ་དག་དགོས་མེད་དང་། དབྱེ་འབྱེད་རང་བཞིན་ལྡན་པ། ཡང་ན་འདྲ་མཉམ་མ་ཡིན་པ་བཅས་མངོན་གསལ་དོད་པོས་མཐོང་ཐུབ།

རྒྱལ་ཁབ་ཁ་ཤས་ཀྱིས་དེབ་སྐྱེལ་ཐོ་འགོད་བྱས་པའི་ཁང་པ་ལས་གཞན་པའི་ས་གནས་གང་དུའང་ཆོས་ལུགས་ཀྱི་བྱེད་སྒོ་སྤེལ་ཚད་བཀག་འགོག་བྱེད་ཀྱི་ཡོད། དེ་ལྟར་ན། རང་ཁྱིམ་དུ་མགྲོན་པོོ་དང་མཉམ་དུ་དགོང་མོའི་ཁ་ལག་མ་ཟ་བའི་སྔོན་ལ་ཐུགས་རྗེ་ཆེ་ཞུའི་སྨོན་ལམ་འདོན་པའང་ཁྲིམས་འགལ་ཆགས་ཀྱི་ཡོད། འདི་ནི་ཁྲིམས་མཐུན་ཞིག་མིན་པ་གསལ་པོ་རེད།

ཡིན་ནའང་རྙོག་འཛིངས་ཅན་གྱི་གནད་དོན་མང་པོ་ཡོད་རེད། ཕ་རན་སིའི་ནང་གི་གྲོང་སྡེའི་སྤྱི་ཁྱབ་ཅིག་གིས་བྷུར་ཀི་ནི་ཟེར་བ་གདོང་པ་དང་རྐང་པ་ལས་གཞན་པའི་ལུས་པོ་ཡོངས་རྫོགས་འགེབ་པའི་ཁ་ཆེའི་བུད་མེད་ཀྱི་ཆུ་རྐྱལ་གྱོན་གོས་དེ་བཀག་སྡོམ་བྱེད་ན་འགྲིག་གམ། དེ་བཞིན། སོ་སོའི་ཡིད་ཆེས་དད་མོས་ཀྱི་སྐོར་གཞན་ལ་ཤོད་པར་རྒྱ་གར་ནང་དབང་འཛིན་པ་ཚོས་བཀག་སྡོམ་བྱེད་པ་དེ་འགྲིག་གམ།

འདིའི་ནང་། ཁྲིམས་ཁང་གི་ངོས་ནས་དྲི་བ་བདུན་བཏང་བའི་སྒོ་ནས་ཐོབ་ཐང་ལ་ཚད་བཀག་བཟོ་བ་དེ་ཁྲིམས་མཐུན་ཡིན་མིན་སྐོར་ང་ཚོས་བལྟ་རྒྱུ་ཡིན། འདི་ཡིས་ཚད་བཀག་གི་རིགས་ཁྱེད་ཀྱི་གདོང་ལེན་བྱེད་དགོས་པ་ཁག་གི་སྐོར་ངོ་སྤྲོད་ཡོང་བའི་རེ་བ་ཡོད།

སྲིད་གཞུང་གིས་དམ་བསྒྲགས་བྱེད་སྐབས། དྲི་བ་དང་པོ་གཏོང་དགོས་པ་དེ། གལ་སྲིད་ཆོས་ལུགས་སམ་དད་མོས་ཡོད་པའམ། ཁས་ལེན་པ། ཡང་ན། ཆོས་ལུགས་དད་མོས་གསལ་སྟོན་བྱེད་པའི་ལྟོས་མེད་ཀྱི་རང་དབང་དེ་ཚོར་ཚད་བཀག་བཟོས་ནས་དོ་ཕོགས་གཏོང་གི་ཡོད་དམ།

གལ་སྲིད་ལྟོས་མེད་ཀྱི་རང་དབང་ཞིག་ལ་ཚད་བཀག་བཟོས་པ་ཡིན་ན་སྲིད་གཞུང་གིས་བྱེད་བབ་དེ་ཁྲིམས་མཐུན་ཞིག་མ་རེད། ཡིན་ནའང་། གལ་སྲིད་ཆོས་ལུགས་དད་མོས་གསལ་སྟོན་བྱེད་པ་དེར་ཚད་བཀག་བཟོ་བ་ལྟ་བུ་ཡིན་ན་ང་ཚོས་དྲི་བ་རྗེས་མ་དེར་བལྟ་གི་ཡིན།

ཆོས་ལུགས་སམ་དད་མོས་གསལ་སྟོན་བྱེད་པའི་བྱ་སྤྱོད་ལ་ཚད་བཀག་བཟོ་བ་ཡིན་ནམ། ཡང་ན་བྱ་སྤྱོད་ཙམ་ཡིན་ནམ།

ང་ཚོས་ལས་དོན་གང་བྱེད་ནའང་མང་ཆེ་བ་ཡིད་ཆེས་དང་དད་པའི་རྒྱུས་སྟོན་བྱས་པ་ཞིག་ཡིན། འོན་ཀྱང་ང་ཚོས་གང་བྱེད་པ་ཡོངས་རྫོགས་ཆོས་ལུགས་སམ་དད་མོས་གསལ་སྟོན་བྱེད་པའི་ཐོབ་ཐང་གིས་སྲུང་སྐྱོབ་བྱེད་ཀྱི་མེད། སུ་ཡང་རུང་བ་ཞིག་གིས་ཁོ་ཚོས་དད་མོས་གསལ་སྟོན་བྱེད་པའི་ཐོབ་ཐང་ལ་ཚད་བཀག་བཟོས་སོང་ཟེར་དུས། ཁྲིམས་ཁང་གི་ངོས་ནས་བྱ་སྤྱོད་དེ་ཆོས་ལུགས་སམ་དད་མོས་གསལ་སྟོན་བྱེད་པ་དང་འབྲེལ་བ་ཡོད་མེད་ཐོག་ནས་ཐག་གཅོད་བྱེད་ཀྱི་རེད། ཁྲིམས་ཁང་གི་ངོས་ནས་བྱ་སྤྱོད་དང་ཆོས་དད་གཉིས་དབར་འབྲེལ་བ་ཇི་ཙམ་་ཟབ་ཡོད་མིན་ཐོག་ནས་བལྟ་གི་རེད།

སྐབས་རེ་འདི་ལས་སླ་པོ་ཡོད་རེད། ཡེ་ཤུའི་ལྷ་ཁང་ལ་འགྲོ་བ་དེ་ཡེ་ཤུའི་ཆོས་ལུགས་དང་གཏིང་ཟབ་པོའི་འབྲེལ་བ་ཡོད་པ་དང་། དེ་བཞིན་སྨྱུང་གནས་བྱེད་པ་དེ་ཁ་ཆེའི་ཆོས་ལུགས་དང་འབྲེལ་བ་གཏིང་ཟབ་ཡོད།

འོན་ཀྱང་དེ་འདི་འདྲའི་སྟབས་བདེ་པོ་མེད། ཀུར་རྟགས་གྱོན་རྒྱུ་དེ་ཡེ་ཤུའི་ཆོས་དད་པ་གཅིག་ལ་གལ་ཆེན་པོ་མིན་ནའང་། གཞན་ཞིག་ལ་དེ་ནི་ཆོས་ལུགས་ཀྱི་དད་པ་ཟབ་པོ་ཡོད་པ་མཚོན་ཆེད་གལ་ཆེན་པོ་ཡིན། དེ་བཞིན་ཁ་ཆེའི་བུད་མེད་ཚོར་མགོ་བོ་འགེབས་རྒྱུའི་སྐོར་ལ་ཡིད་ཆེས་མི་འདྲ་བ་ཡོད།

ཆོས་དད་ཡིད་ཆེས་གང་ཞིག་འགྲིག་པ་ཡིན་མིན་ཐག་གཅོད་རྒྱུ་དེ་ཁྲིམས་ཁང་གི་འགན་མ་རེད། གང་ཞིག་ཆོས་ལུགས་ཀྱི་དད་མོས་གསལ་སྟོན་བྱེད་པ་ཡིན་མིན་ཐག་གཅོད་བྱེད་སྐབས། ཁྲིམས་ཁང་གིས་ལྟ་གྲུབ་ཐོག་ཐག་གཅོད་བྱེད་སྐབས་ཆོས་ལུགས་ཀྱི་རྣམ་གཞག་ཁ་ཤས་ལ་གཞན་དང་མི་འདྲ་བའི་དམིགས་བསལ་གོ་བ་ལེན་ཕྱོགས་ཀྱི་གནས་སྟངས་སྤྲད་པའི་དབང་གིས་ཉེན་ཁའི་ནང་ཚུད་ངེས་རེད། འགྲོ་བ་མིའི་ཐོབ་ཐང་ནི་མི་སྒེར་སོ་སོའི་ཐོབ་ཐང་ཡིན་པར་སོང་ཁྲིམས་ཁང་གི་ངོས་ནས་སྒྲིག་འཛུགས་ཀྱི་ལྟ་གྲུབ་དེ་ལས་འབྲེལ་ཡོད་མི་སྣའི་དད་མོས་ལ་དོ་ཁུར་ཆེ་བ་བྱེད་དགོས་ཀྱི་ཡོད། དེ་ནི་གལ་སྲིད་མི་ཞིག་གི་བྱ་སྤྱོད་དེ་ཆོས་ལུགས་དད་མོས་གསལ་སྟོན་བྱེད་པ་ཞིག་རེད་སྙམ་ན། ཁོ་ཚོར་མཚོན་ན་དེ་ནི་ཆོས་ལུགས་དད་མོས་གསལ་སྟོན་བྱེད་པ་ཞིག་རེད།

ང་ཚོས་དད་མོས་གསལ་སྟོན་སྲུང་སྐྱོབ་བྱེད་པ་དེར་ཚད་བཀག་བཟོས་པ་བསྒྲུབ་ཐུབ་པ་ཡིན་ན། ཚད་བཀག་དེ་དག་ཁྲིམས་ཀྱིས་ཐོག་ནས་ཆོག་མིན་བལྟ་དགོས་པ་རེད།
ཡིག་ཐོག་ནས་ཁྲིམས་ལུགས་དང་། རྗེས་མཐུན་གྱི་ཁྲིམས། ཡང་ན་ལམ་སྲོལ་དང་འབྲེལ་བའི་ཁྲིམས་བཅས་གང་གིས་ཚད་བཀག་གཏན་འབེབས་བྱས་ཡོད་དམ། ཡང་ན། ཁྲིམས་ཀྱི་གཞི་རྩ་གང་ཡང་མེད་པར་དབང་འཛིན་པ་ཚོས་བཙན་པོ་དབང་ཡོད་བྱས་པ་རེད་དམ། ཁྲིམས་ཀྱི་གཞི་རྩ་མེད་ན། ཚད་བཀག་བྱེད་པ་ནི་ཁྲིམས་མཐུན་མིན།
དེ་ནས་གོམ་པ་རྗེས་མ་དེ་ནི་ཁྲིམས་མཐུན་གྱི་གནས་སྟངས་ཤིག་སྲུང་སྐྱོབ་བྱེད་པར་ཚད་བཀག་དགོས་མིན་དཔྱད་ཞིབ་བྱེད་རྒྱུ་དེ་ཡིན། དེ་ལ་ལན་དུ། དང་ཐོག་ང་ཚོས་ཚད་བཀག་བྱེད་སྟངས་དང་ཁྲིམས་མཐུན་གྱི་གཞི་རྩ་གཅིག་གི་དབར་ཐད་ཀའི་འབྲེལ་བ་ཡོད་མེད་བརྟག་ཞིབ་བྱེད་དགོས་པ་དང་། གཉིས་པ་དེར་ཚད་བཀག་བཟོ་བ་དེ་དགོས་ངེས་ཅན་རེད་དམ། དྲི་བ་འདི་ཚོར་རིམ་པ་བྱས་ནས་བལྟ་ཞིབ་བྱེད་ཀྱི་ཡིན།

རྒྱལ་སྤྱིའི་ཁྲིམས་སྒྲིག་གི་འོག་ཏུ། ཁྲིམས་མཐུན་གྱི་སྒོ་ནས་ཆོས་ལུགས་སམ་དད་མོས་རང་དབང་གི་ཐོབ་ཐང་ཚད་བཀག་བྱེད་པའི་གཞི་རྩ་གཅིག་པུ་དེ་ནི། སྤྱི་ཚོགས་ཀྱི་བདེ་འཇགས་དང་། སྤྱི་ཚོགས་ཀྱི་སྒྲིག་ཁྲིམས། འཕྲོད་བསྟེན། བཟང་སྤྱོད། མི་གཞན་གྱི་རང་དབང་དང་ཐོབ་ཐང་བཅས་སྲུང་སྐྱོབ་བྱེད་ཆེད་དུ་ཡིན་དགོས།

འོ་ན་བྱ་སྤྱོད་ལ་ཚད་བཀག་བྱེད་པ་དེས་གང་འདྲ་བྱས་ནས་གཞི་རྩ་དེ་དག་ལ་འཇིགས་སྐུལ་བྱེད་པ་ཡིན་ནམ། དེ་བཞིན་འདིའི་ཁུངས་སྐྱེལ་ཞིག་ཡོད་དམ།

སྲིད་གཞུང་གི་ངོས་ནས་ཚད་བཀག་བྱེད་ལུགས་དང་ཁྲིམས་མཐུན་གྱི་གཞི་རྩའི་དབར་ཐད་ཀའི་འབྲེལ་བ་ཡོད་པ་གསལ་སྟོན་བྱེད་དགོས་ཀྱི་རེད།

ཧིན་དྷུའི་རིགས་རུས་ཀྱི་ལམ་ལུགས་དེས། མི་མང་རྣམས་རིགས་མཐོ་བ་དང་། རིགས་དམན་པ། རིགས་མེད་ཀྱི་སྡེ་ཁག་བཅས་སུ་དབྱེ་ཡི་ཡོད། རིགས་མེད་ཀྱི་སྡེ་ཁག་ཁོངས་སུ་གཏོགས་པ་ཚོར་མཐོང་ཆུང་དབྱེ་འབྱེད་ཚབས་ཆེ་ཕོག་པ་མ་ཟད་སྤྱི་ཚོགས་དང་དཔལ་འབྱོར་གྱིས་གྱོང་གུན་ཡང་ཕོག་གི་ཡོད། དགོན་པ་ཁ་ཤས་ཀྱིས་རིགས་མེད་ཧིན་དྷུ་རྣམས་དགོན་པའི་ནང་ཡོང་འཇུག་གི་མེད། རྒྱ་གར་གྱི་རིགས་རུས་དབྱེ་བའི་ལམ་ལུགས་དེ་ཕྱི་ལོ་ ༡༩༤༩ ལོར་མེད་པ་བཟོས་པ་དང་། དགོན་པར་རིགས་མེད་ཧིན་དྷུ་རྣམས་མཆོད་མཇལ་དུ་ཡོང་སྐབས་བཀག་འགོག་བྱས་ཆོག་གི་མེད། ཚད་བཀག་འདིས་རིགས་རུས་དབྱེ་འབྱེད་བྱེད་པ་དང་མི་གཞན་གྱི་ཆོས་ལུགས་སམ་དད་མོས་རང་དབང་གི་ཐོབ་ཐང་སྲུང་སྐྱོབ་བྱེད་པའི་དབར་གསལ་ལ་ཐད་ཀར་གྱི་འབྲེལ་བ་ཡོད་པ་སྟོན་ཐུབ་ཡོད།

ཡིན་ནའང་ཚད་བཀག་ཚང་མར་དེ་ལྟ་བུའི་འབྲེལ་བ་ཁ་གསལ་མེད་པ་དང་། སྐབས་རེ་སྲིད་གཞུང་གིས་ཁྲིམས་མཐུན་གྱི་རྨང་གཞི་ཁག་ལོག་འགྲེལ་བྱེད་པའམ་བེད་ལོག་བྱེད་ཀྱི་ཡོད།

ཆོས་ལུགས་སམ་དད་མོས་རང་དབང་གི་ཐོབ་ཐང་ལ་ཚད་བཀག་བཟོ་བ་དེ་སྤྱི་ཚོགས་ཀྱི་སྒྲིག་ཁྲིམས་དང་འབྲེལ་བ་བཏགས་ཀྱི་ཡོད། སྤྱི་ཚོགས་ཀྱི་སྒྲིག་ཁྲིམས་ཀྱིས་འཇིགས་སྐུལ་དང་། ཁྲིམས་འགལ་སྙད་འདོགས། དྲག་སྤྱོད་རྒྱུད་སྐུལ་དང་སྐབས་རེ་ཆོས་ལ་སྐུར་བ་འདེབས་པ་སོགས་ཚུད་པའི་གནད་དོན་མང་པོ་ཞིག་བཏང་འཛིན་བྱེད་ཀྱི་ཡོད།

ཆོས་ལུགས་སམ་དད་མོས་གསལ་སྟོན་བྱེད་པའི་རང་དབང་ནི་སོ་སོའི་གང་ལ་དད་མོས་བྱེད་པ་དེ་དངོས་བདེན་ཡིན་པ་བཤད་རྒྱུའི་ཐོབ་ཐང་དང་འབྲེལ་བ་ཡོད། དད་མོས་ནི་ཞི་བའི་སྒོ་ནས་སམ། ཡང་ན་དྲག་ཤུགས་ལ་ངན་སྐུལ་བྱེད་པའི་ཐབས་ལ་བརྟེན་ནས་གསལ་འདོན་བྱས་ཆོག་པ་གསལ་པོ་རེད། བློ་ཕམ་པ་ཞིག་ལ་མི་ཁ་ཤས་ནི་སོ་སོའི་དད་མོས་མ་ཡིན་པ་གཞན་ཞིག་ཞི་བའི་སྒོ་ནས་གསལ་སྟོན་བྱས་པ་དེས་ཕོག་ཐུག་ཕྱིན་ནས་དྲག་ཤུགས་ཀྱིས་ཡ་ལན་སློག་གི་ཡོད།

རྒྱལ་ཁབ་ཁ་ཤས་ཀྱིས་དད་མོས་རིགས་ཅིག་ཞི་བའི་ངང་གསལ་སྟོན་བྱེད་པར་བཀག་འགོག་བྱེད་ཀྱི་ཡོད། དེ་འདྲ་བྱེད་དོན་ནི་དྲག་པོའི་ཟིང་ཆའི་ཉེན་ཁ་ལས་གཡོལ་ཐབས་སུ་ཁོ་ཚོར་ལུགས་མཐུན་གྱི་སྤྱི་ཚོགས་སྒྲིག་ཁྲིམས་ཡོད་པ་ཁུངས་སྐྱེལ་བྱེད་ཀྱི་ཡོད། ཨིན་ཌོ་ནེ་ཤི་ཡས་རྒྱུ་མཚན་དེ་ལ་བརྟེན་ནས་ཨེ་ཧ་མའེ་དྷིའམ་ལྷ་མེད་སྨྲ་བ་རྣམས་ཀྱི་ཡིད་ཆེས་ཡོངས་གྲགས་སུ་གསལ་འདོན་བྱེད་ཆོག་གི་མེད། དེར་བརྟེན། བྱས་ཉེས་གསོག་མཁན་ལ་ཉེས་པ་གཏོང་རྒྱུའི་ཚབ་ཏུ་དྲག་སྤྱོད་ཀྱིས་གནོད་འཚེ་ཕོག་མཁན་ཚོར་ཁྱད་གསོད་དམ་ངན་སྐུལ་གྱི་ཉེས་པ་བསགས་པར་ཁྲིམས་གཅོད་བྱེད་ཀྱི་ཡོད།

འདི་འདྲའི་ཁྲིམས་ལུགས་ཀྱིས་དྲག་སྤྱོད་རིགས་ཇེ་ཉུང་དུ་གཏོང་མི་ཐུབ། དེ་ལས་ལྡོག་སྟེ། “ནོར་འཁྲུལ་” ཅན་གྱི་དད་མོས་འཛིན་མཁན་རིགས་ལ་ཆད་པ་གཅོད་དགོས་པའི་ལྟ་བར་ཤུགས་སྣོན་རྒྱག་འགོ་བཙུགས་ཡོད།

སྤྱི་ཚོགས་ཀྱི་སྒྲིག་ལམ་ལག་ལེན་བསྟར་བར་གཡོ་ཐབས་ཀྱི་རྒྱུ་རྐྱེན་གཞན་ཞིག་ནི། མི་ཚང་མར་གཅིག་མཚུངས་ཀྱི་ཀུན་སྤྱོད་ཅིག་ཡོད་པ་དང་། སུ་ཡི་ཀུན་སྤྱོད་‘སྤྱི་པའི་’ཀུན་སྤྱོད་ཡིན་ནམ། མཉམ་སྦྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ཁྱད་མཁས་མི་སྣ་ཚོས། སྤྱི་པའི་ཀུན་སྤྱོད་ཀྱི་མཚན་ཉིད་དེ་ “སྤྱི་ཚོགས་མང་པོ་དང་། མཚན་ཉིད་རིག་པ། ཆོས་ལུགས་ཀྱི་སྲོལ་རྒྱུན་” བཅས་ལ་ངེས་པར་དུ་གཞི་འཛིན་དགོས་པ་བརྗོད་ཡོད། བཤད་སྟངས་གཞན་ཞིག་ལ། ཁྱོད་ཀྱིས་མི་མང་ཆེ་བའི་ཀུན་སྤྱོད་དེ་གཅིག་པུ་ཚད་བཀག་གི་རྨང་གཞིར་འཛིན་མི་རུང་།

རྒྱལ་ཁབ་ཀྱི་བདེ་འཇགས་དེ་བཞིན་ཆོས་ལུགས་དང་ཆོས་དད་རང་མོས་ལ་ཚོད་འཛིན་བྱེད་པའི་ཁྲིམས་མཐུན་གྱི་རྒྱུ་མཚན་ཞིག་མིན་པ་དེར་ཁྱེད་རང་ཧང་སངས་མདོག་ཁ་པོ་རེད།

སྲིད་གཞུང་ཁ་ཤས་ཀྱིས་སོ་སོའི་དགྲ་བོའི་རྒྱལ་ཁབ་དང་ཆོས་ལུགས་མཉམ་སྤྱོད་བྱེད་མཁན་གྱི་སྤྱི་ཚོགས་ཀྱི་སྡེ་ཁག་ལ་རྒྱལ་ཁབ་ཀྱི་བདེ་འཇགས་ལ་ཉེན་ཁ་བཟོ་མཁན་རེད་ཅེས་གདོན་འདྲེ་ལྟ་བུར་ངོས་འཛིན་བྱེད་ཀྱི་ཡོད། སྤྱི་ཆིངས་འབྲི་མཁན་གྱིས་མང་ཚོགས་ཀྱི་འཕྲོད་བསྟེན་དང་། བདེ་འཇགས། སྒྲིག་ལམ་བཅས་ཀྱིས་ཚད་བཀག་བྱེད་པར་འདང་ངེས་ཀྱི་གོ་སྐབས་ཤིག་སྤྲོད་ཀྱི་ཡོད་པ་དང་། དེའི་ཐོག་རྒྱལ་ཁབ་ཀྱི་བདེ་འཇགས་ཁ་སྣོན་བྱས་ན་ཆོས་ལུགས་སམ་ཡང་ན་ཆོས་དད་རང་མོས་དེ་དགོས་མཁོ་ཆེ་ཤོས་ཀྱི་དུས་སུ་བེད་སྤྱོད་བྱེད་ཐབས་བྲལ་བ་ཚིག་ཡོང་རྒྱུར་ངོས་འཛིན་བྱེད་ཀྱི་ཡོད།

དེ་འདྲ་སོང་ཙང་། སྲིད་གཞུང་གི་ངོས་ནས་ཚད་བཀག་བྱས་པའི་གནད་དོན་དེ་དག་གིས་རྒྱུ་མཚན་གང་གི་ལམ་ནས་འཇིགས་སྐུལ་བྱེད་ཀྱི་ཡོད་སྐོར་ངེས་པར་དུ་དེ་གཉིས་དབར་གྱི་ཐད་ཀའི་འབྲེལ་བ་ངོ་སྤྲོད་བྱེད་དགོས་པ་བསྟན་ཡོད། ང་ཚོས་ད་དུང་མཐོང་གསལ་ལ། གལ་ཆེ་ཤོས་ནི་ཁྲིམས་མཐུན་གྱི་གཞི་རྩ་དེ་དག་གོ་བ་ཏག་ཏག་བླངས་པ་དང་བེད་སྤྱོད་ཡང་དག་པ་བྱེད་ཡོད་མིན་ལ་ཞིབ་བཤེར་བྱེད་དགོས།

ད་ནི་ང་ཚོས་དྲི་བའི་ཆ་ཤས་གཉིས་པ་དེར་བལྟ་ཡི་ཡིན། ཚད་བཀག་ནི་དགོས་ངེས་ཅན་ཞིག་ཡིན་ནམ། ཆབ་སྲིད་དང་ཡང་ན་མི་མང་ཆེ་བའི་ངོས་ནས་རན་པོ་མཐོང་གི་མེད། འོན་ཀྱང་དེ་ནི་དགོས་ངེས་ཤིག་རེད།

སྲིད་གཞུང་གིས་ཁོ་ཚོས་གྲོས་འཆར་བཏོན་པའི་ཚད་བཀག་དང་མི་གཞན་གྱི་རང་དབང་དང་ཐོབ་ཐང་དབར་ལ་ཐད་ཀའི་འབྲེལ་བ་ཡོད་པའི་དབང་དུ་བཏང་།

འཇིགས་སྐུལ་དེ་བཞིན་ཚད་བཀག་བཟོ་རྒྱུར་སྐུལ་སློང་བྱེད་པའི་གནད་དོན་ཚབས་ཆེན་ཞིག་ཡིན་ནམ།
གྲོས་འཆར་བཏོན་པའི་ཚད་བཀག་དེ་དག་གིས་མི་གཞན་ཚོས་ཐོབ་ཐང་སྲུང་སྐྱོབ་བྱེད་པར་ནུས་པ་ཇི་ཙམ་ཐོན་ནམ།
ཐོབ་ཐང་ཚད་བཀག་མ་བྱས་པར་དཀའ་ངལ་སེལ་ཐབས་གཞན་འདུག་གམ།

གལ་ཏེ་གནད་དོན་ཚབས་ཆེན་པོ་རང་མེད་ན། གལ་ཏེ་གྲོས་འགོ་བཏོན་པའི་ཚད་བཀག་གིས་གནད་དོན་ཐག་གཅོད་པར་ཕན་གྱི་མེད་པའམ། ཡང་ན་ཐོབ་ཐང་ཚད་བཀག་མ་བྱས་པར་བྱེད་ཐབས་གཞན་གྱི་ཐོག་ནས་གནད་དོན་ཐག་གཅོད་བྱེད་ཐུབ་ན་ཚད་བཀག་བྱེད་དགོས་དོན་མེད།

རྒྱ་ནག་གཞུང་གིས་སློབ་གཉེར་བ་ཤིན་ཏུ་མང་པོ་ཡོད་པའི་ནང་བསྟན་སློབ་གཉེར་ཁང་དེ་ཚོའི་བདེ་ཐང་དང་བདེ་འཇགས་ཐད་སེམས་ཁྲལ་ཡོད་ཅེས་བརྗོད་ཀྱི་ཡོད། བདེ་ཐང་དང་བདེ་འཇགས་ནི་ཁྲིམས་མཐུན་གྱི་རྒྱུ་རྐྱེན་ཞིག་ཡིན། བྱེད་ཐབས་གཅིག་ནི་སློབ་གཉེར་ལྟེ་གནས་དེ་དག་བསྐྱར་བཟོ་དང་རྒྱ་སྐྱེད་དུ་གཏོང་རྒྱུ་དེ་རེད། བྱེད་ཐབས་འདི་ཚོས་ཐོབ་ཐང་ལ་ཚད་བཀག་བཟོ་གི་མ་རེད། དེ་ལས་ལྡོག་སྟེ། སྲིད་གཞུང་གིས་སློབ་གཉེར་ལྟེ་གནས་ཆ་ཚང་གཏོར་བཤིག་བཏང་བ་དང་བཙུན་མ་ ༡༠༠༠ བཙན་ཤེད་ཀྱིས་ཕྱིར་འབུད་བྱས་ཡོད། དེ་ནི་དགོས་ངེས་ཤིག་མ་རེད།

རྒྱ་ནག་གཞུང་གིས་སློབ་གཉེར་བ་ཤིན་ཏུ་མང་པོ་ཡོད་པའི་ནང་བསྟན་སློབ་གཉེར་ཁང་དེ་ཚོའི་བདེ་ཐང་དང་བདེ་འཇགས་ཐད་སེམས་ཁྲལ་ཡོད་ཅེས་བརྗོད་ཀྱི་ཡོད། བདེ་ཐང་དང་བདེ་འཇགས་ནི་ཁྲིམས་མཐུན་གྱི་རྒྱུ་རྐྱེན་ཞིག་ཡིན། བྱེད་ཐབས་གཅིག་ནི་སློབ་གཉེར་ལྟེ་གནས་དེ་དག་བསྐྱར་བཟོ་དང་རྒྱ་སྐྱེད་དུ་གཏོང་རྒྱུ་དེ་རེད། བྱེད་ཐབས་འདི་ཚོས་ཐོབ་ཐང་ལ་ཚད་བཀག་བཟོ་གི་མ་རེད། དེ་ལས་ལྡོག་སྟེ། སྲིད་གཞུང་གིས་སློབ་གཉེར་ལྟེ་གནས་ཆ་ཚང་གཏོར་བཤིག་བཏང་བ་དང་བཙུན་མ་ ༡༠༠༠ བཙན་ཤེད་ཀྱིས་ཕྱིར་འབུད་བྱས་ཡོད། དེ་ནི་དགོས་ངེས་ཤིག་མ་རེད།

གནས་ཚུལ་མང་པོ་ཞིག་གསལ་པོ་མེད་པ་དངོས་བདེན་རེད། འོན་ཀྱང་ཚོད་འཛིན་བྱེད་པ་ནི་དགོས་ངེས་ཀྱི་འགན་འཁྲི་ཞིག་ཡིན་པ་ར་སྤྲོད་བྱ་རྒྱུ་དེ་སྲིད་གཞུང་ལ་འགན་ཡོད།

ང་ཚོས་སྲིད་གཞུང་ལ་ཁྲིམས་མཐུན་གྱི་རྒྱུ་མཚན་ཡོད་པ་དང་ཚད་བཀག་བྱེད་དགོས་ངེས་ཡིན་པ་གཏན་འཁེལ་བྱས་པའི་རྗེས། ཚད་བཀག་བྱེད་པ་དེ་དག་དབྱེ་འབྱེད་བྱེད་པ་ཡིན་མིན་ཞིབ་བཤེར་བྱེད་དགོས།

ཁྱེད་རང་གི་བསམ་པར་ཁྲིམས་སྒྲིག་དང་། སྲིད་བྱུས། ཡང་ན་བྱེད་སྟངས་རིགས་མཐོང་ཆུང་རང་བཞིན་ཡིན་མིན་ལས་སླ་པོའི་ཐོག་ཤེས་ཀྱི་རེད་བསམ་སྲིད། དེ་ཡང་མི་ཁ་ཤས་ལ་མངོན་གསལ་དོད་པོས་བཀོལ་སྤྱོད་བྱེད་པ་དང་མི་གཞན་ལ་དེ་ལྟར་མིན་ན། དེ་ལ་ཐད་ཀར་དབྱེ་འབྱེད་བྱེད་པ་ཟེར་བ་དང་དེ་ནི་རྩ་བ་ནས་ཆོག་གི་མེད།

ཡིན་ནའང་། སྐབས་རེ་མི་ཚང་མའི་ཐོག་ལག་བསྟར་བྱས་པའི་ཁྲིམས་སྒྲིག་དེས་འགའ་རེར་ཤུགས་རྐྱེན་ཐེབས་པ་དང་གཞན་འགར་ཤུགས་རྐྱེན་ཐེབས་ཀྱི་མེད། འདི་ལ་བརྒྱུད་ནས་དབྱེ་འབྱེད་བྱེད་པ་ཟེར།

ང་ཚོའི་བསམ་པའི་འཆར་སྒོའི་ནང་བཀོད་པའི་གྲོང་བརྡལ་ཆུང་ངུ་དེ་དང་འུར་ཟིང་ཆེ་བའི་ཆོས་ཀྱི་བྱེད་སྒོ་སྤེལ་ཡུལ་དེར་ཕྱིར་ལོག་བྱེད་ཀྱི་ཡིན། ཆེས་མཐོའི་འཛིན་སྐྱོང་ལས་ཁུངས་ཀྱིས་སྒྲ་ཤུགས་ལ་ཚོད་འཛིན་བྱེད་པའི་ཁྲིམས་སྒྲིག་ངོ་སྤྲོད་བྱས་པ་དང་། མི་མང་གི་འདུ་འཛོམས་དང་ཆོས་ལུགས་ཀྱི་ཚོགས་པ་ཁག་གིས་དེ་མཚུངས་སྒྲ་ཤུགས་སྙོམ་སྒྲིག་བྱས་ཡོད། ཡིན་ན་ཡང། ཡེ་ཤུའི་ཆོས་ཁང་གི་དྲིལ་བུའི་སྒྲ་ཤིན་ཏུ་ནས་ཆེན་པོ་ཡོད་པ་དེ་དག་གི་སྐད་ཆུང་དུ་གཏོང་ཐུབ་ཀྱི་མེད། དེར་བརྟེན་ཆོས་ཚོགས་ཀྱིས་སྲོལ་རྒྱུན་གྱི་ལམ་ལུགས་ཤིག་མི་བསྐྱུར་ཀ་མེད་རེད། འོན་ཀྱང་སྡེ་ཁུལ་གཞན་དག་ལ་དཀའ་ངལ་གང་ཡང་མེད།

འདི་ནི་བརྒྱུད་ནས་དབྱེ་འབྱེད་བྱེད་པ་ཞིག་རེད།

སྤྱིར་བཏང་གི་ཁྲིམས་སྒྲིག་འོག་བརྒྱུད་ནས་དབྱེ་འབྱེད་བྱེད་པའི་དཔེ་ཧ་ཅང་མང་པོ་ཡོད།:

རྒྱལ་ཁབ་མང་པོས་མི་མང་འདུ་སར་གྲི་འཁྱེར་མི་ཆོག་པ་བཟོས་ཡོད། འདིས་སིཁ་ཆོས་ལུགས་ཕུད་པའི་ཆོས་ལུགས་དང་དད་མོས་སྡེ་ཁག་ལ་ནུས་པ་ཅི་ཡང་ཐེབས་མེད། སིཁ་གི་སྐྱེས་པ་ཚོས་སྟོད་གོས་ཀྱི་འོག་ཏུ། ཀིར་པན་ཞེས་ཆོ་གའི་གྲི་ཞིག་ལུས་ལ་གྱོན་དགོས་ཀྱི་ཡོད། དེར་བརྟེན། ཁྲིམས་ཀྱི་ཐོག་ནས་སིཁ་ཆོས་ལུགས་ཀྱི་སྐྱེས་པས་ཆོས་ལུགས་ཀྱི་དགོས་དོན་སྒྲུབ་པའི་ནུས་པར་ཚད་བཀག་བྱས་ཡོད།

རྒྱལ་ཁབ་ཁ་ཤས་སུ་འཆར་འགོད་ཀྱི་སྒྲིག་སྲོལ་ནང་དུ། ཁང་པ་གསར་རྒྱག་གི་འཛུགས་སྐྲུན་ལ་ངེས་པར་དུ་ཉེ་འགྲམ་གྱི་མཁར་དབང་བདག་པོ་ཚོའི་ཆོག་མཆན་འཐོབ་དགོས་ཀྱི་ཡོད། འོན་ཀྱང་ཁྱིམ་མཚེས་རྣམས་ཕྱོགས་རིས་ཅན་ཡིན་སྲིད་པར་བརྟེན། སྲོལ་རྒྱུན་གྱི་ཚོགས་པ་ཁག་ལ་སྲོལ་རྒྱུན་མ་ཡིན་པའི་ཚོགས་པ་ཆུང་ཁག་ལས་འཆར་འགོད་ཀྱི་ཆོག་མཆན་ཐོབ་སླ་བ་ཡོང་གི་ཡོད།

སྲིད་བྱུས་དང་ལམ་ལུགས་ཀྱིས་ཀྱང་དཀའ་ངལ་སྤྲོད་སྲིད། གལ་ཏེ་གཙུག་ལག་སློབ་ཆེན་ཞིག་གིས་རྒྱུན་དུ་གཟའ་སྤེན་པར་སློབ་ཞུགས་རྒྱུགས་ལེན་གྱི་ཡོད་ན། འཇིའུ་ཡི་ཆོས་ལུགས་སྡེ་ཁག་ཨེ་ཌི་ཝེན་ཀྲིས་དང་ཨོབ་ཛོར་ཝེན་ཀྲེ་གཉིས་གྱོང་གུན་ཕོག་མཁན་དུ་གྱུར་ཡོད། དེ་བཞིན་གྲངས་ཉུང་ཆོས་ལུགས་ཁོངས་སུ་གཏོགས་པའི་ལས་བྱེད་པ་རྣམས་སོ་སོའི་ཆོས་ལུགས་དུས་ཆེན་གྱི་གུང་སེང་གི་ཚབ་ཏུ་གྲངས་མང་ཆོས་ལུགས་ཀྱི་ཆོས་ལུགས་དུས་ཆེན་སྐབས་གུང་སེང་ལེན་དགོས་པ་ཆགས་ཀྱི་ཡོད།

དབྱེ་འབྱེད་ནམ་ཡང་བྱེད་ཆོག་གི་མེད། འོན་ཀྱང་ཁྲིམས་ཁང་གིས། བརྒྱུད་ནས་དབྱེ་འབྱེད་བྱེད་པ་དེར་དངོས་ཡོད་ཀྱི་དཀའ་ངལ་ལ་ངོས་འཛིན་གྱིས་གང་ཐུབ་ཀྱི་ཐག་གཅོད་དྲང་པོ་བྱེད་དགོས། ཡང་སེ་ཐག་གཅོད་ཀྱི་བྱུས་གཞི་སྟབས་བདེ་པོ་དེ་ཡང་རྙེད་ཡོང་། ང་ཚོའི་བསམ་བློའི་འཆར་སྣང་གི་གྲོང་བརྡལ་ནང་། ཆེས་མཐོའི་འཛིན་སྐྱོང་ལས་ཁུངས་ཀྱིས་ཆོས་ཁང་གི་དྲིལ་བུའི་ཅོང་སྒྲ་དེ་གཟའ་ཉི་མ་དང་ཆོས་ལུགས་དུས་ཆེན་ལ་དམིགས་བསལ་བཏང་ཡོད།

སུ་ཝེ་ཌེན་ནང་སློབ་ཆེན་གྱི་སློབ་ཞུགས་ཡིག་རྒྱུགས་དེ་སྔ་ནས་གཟའ་སྤེན་པར་གཏོང་གི་ཡོད། ཡིག་རྒྱུགས་དེ་དེང་སང་གཟའ་པ་སངས་ལ་ཡང་གཏོང་གི་ཡོད། གཞན་ཡང་ལས་ཡུལ་གྱི་སྒྲིག་ཆས་ཡུལ་དུས་དང་བསྟུན་ཐབས་ཀྱིས་མགོ་རས་གྱོན་ཆོག་པའི་འགྱུར་ལྡོག་ཚུད་ཡོད།

འོན་ཀྱང་ཁྲིམས་ཁང་གིས་དེ་ནི་གཏན་ནས་ཡོང་མི་སྲིད་པ་ཞིག་མ་རེད་ཅེས་ངོས་འཛིན་བྱེད་ཀྱི་ཡོད། གལ་ཏེ་རྒྱུ་མཚན་ཡང་དག་ཅིག་ཡོད་པའི་ར་སྤྲོད་བྱེད་ཐུབ་ན་བརྒྱུད་ནས་མཐོང་ཆུང་དབྱེ་འབྱེད་བྱེད་པ་ནི་ཁྲིམས་དང་མཐུན་པ་ཆགས་ཐུབ།

དཔེར་ན། སྨན་ཁང་གི་འགོས་ནད་སྟངས་འཛིན་སྲིད་བྱུས་ཀྱིས་ལས་བྱེད་ཚོས་རྒྱན་ཆ་བཏགས་མི་ཆོག་པ་བཟོས་པ་དེས་ཚོགས་ཁག་ཅིག་ལ་གྱོང་གུན་ཕོག་པའི་གནས་སུ་གྱར་གྱི་ཡོད། འོན་ཀྱང་སྤྱི་ཚོགས་ཀྱི་འཕྲོད་བསྟེན་གཞིར་བཞག་ན་དེ་ནི་གནས་ལུགས་ཡོད་པ་ཞིག་རེད།

སྤྱི་ཚོགས་ཀྱི་འཕྲོད་བསྟེན་ནི་ཆོས་ལུགས་སམ་ཡང་ན་དད་མོས་རང་དབང་ལ་ཚད་བཀག་བྱེད་པའི་ཁྲིམས་མཐུན་གྱི་རྒྱུ་མཚན་ཡིན། འོན་ཀྱང་བརྒྱུད་ནས་མཐོང་ཆུང་དབྱེ་འབྱེད་བྱེད་པའི་ཐད་ཁྲིམས་ཁང་གིས་ཀྱང་རྒྱུ་མཚན་གཞན་དག་དྭང་ལེན་བྱེད་ཀྱི་ཡོད། དཔེར་ན། ཚོང་གཉེར་བཟོ་གྲྭ་ཞིག་གིས་རང་གི་སྲིད་བྱུས་ལ་འགྱུར་བ་བཏང་ན་བཟོ་གྲྭའིཁེ་ཕན་ལ་གནོད་སྐྱོན་ཕོག་གི་རེད་ཅེས་རྩོད་གླེང་བྱེད་སྲིད། གལ་ཏེ་གྱོན་ཆས་ཚོང་ཁང་ཞིག་གིས་ཚོང་གཉེར་བྱེད་མཁན་ལ་ཚོང་ཁང་དེ་རང་གི་ནང་ཚོང་རྒྱུའི་ཐོན་རྫས་གྱོན་དགོས་ཀྱི་ཡོད་པ་དང་། ཆོས་ལུགས་ཀྱི་རྐྱེན་པས་མི་གྱོན་པའི་གནས་སྟངས་བྱུང་ན་ལས་ཀར་མུ་མཐུད་འཇོག་དགོས་ཀྱི་མེད།

དེར་བརྟེན་མཐོང་ཆུང་དབྱེ་འབྱེད་ཐད་ཀར་བྱེད་པ་ཆོག་གི་མེད། ཡང་བརྒྱུད་ནས་མཐོང་ཆུང་དབྱེ་འབྱེད་བྱེད་པ་ལས་གཡོལ་ཐབས་བྱེད་ཐུབ་ཀྱི་ཡོད། དེ་ཡང་ལུགས་མཐུན་གྱི་བྱེད་ཐབས་ཤིག་བཙལ་ནས་མི་སྒེར་རེ་ཟུང་དང་ཚོགས་པའི་དགོས་མཁོ་ལ་ལྟ་རྟོག་བྱེད་པའི་སྒོ་ནས་ཡོང་ཐུབ།

དེར་བརྟེན་མཐོང་ཆུང་དབྱེ་འབྱེད་ཐད་ཀར་བྱེད་པ་ཆོག་གི་མེད། ཡང་བརྒྱུད་ནས་མཐོང་ཆུང་དབྱེ་འབྱེད་བྱེད་པ་ལས་གཡོལ་ཐབས་བྱེད་ཐུབ་ཀྱི་ཡོད། དེ་ཡང་ལུགས་མཐུན་གྱི་བྱེད་ཐབས་ཤིག་བཙལ་ནས་མི་སྒེར་རེ་ཟུང་དང་ཚོགས་པའི་དགོས་མཁོ་ལ་ལྟ་རྟོག་བྱེད་པའི་སྒོ་ནས་ཡོང་ཐུབ།

ཆོས་དད་གསལ་སྟོན་བྱེད་པའི་རྣམ་པ་དེ་ཚད་གང་འདྲ་ཞིག་བར་ཚད་བཀག་བྱ་དགོས་ཀྱི་རེད་དམ། ག་རེ་བཀག་བསྡོམས་བྱེད་དགོས་པ་དང་། དེ་ཡང་སུ་ཞིག་དང་། ཡུལ་དུས་གནས་སྐབས་གང་ཞིག་ཏུ་བཀག་བསྡོམས་བྱེད་དགོས་རེད་དམ།

ཆོས་ལུགས་བྱེ་བྲག་པ་ཞིག་གིས་ཆོས་ལུགས་དང་འབྲེལ་བའི་གྱོན་གོས་ཆེད་ལས་བྱེ་བྲག་པ་ཞིག་དང་ལས་ཡུལ་བྱེ་བྲག་པ་ཞིག་ཏུ་གྱོན་མི་ཆོག་པ་དང་། མི་ཚང་མར་ཁྲོམ་ལམ་དུ་ཆོས་ལུགས་ཀྱི་གྱོན་ཆས་གྱོན་རྒྱུ་བཀག་འགོག་བྱེད་པགཉིས་དབར་ཁྱད་པར་ཧ་ཅང་ཆེན་པོ་ཡོད།

དེར་བརྟེན། རྒྱལ་སྤྱིའི་ཁྲིམས་ཁང་གིས་དོ་ཁུར་བྱེད་པ་ནི་དོ་མཉམ་རང་བཞིན་ཡིན། ཨ་རིའི་ཁྲིམས་ཁང་གིས་ཀྱང་ཞིབ་བཤེར་ནན་པོ་བྱེད་པའི་ཐོག ཚད་བཀག་དེ་དག་ངེས་པར་དུ་ཆེས་ཉུང་བའི་ཚོད་འཛིན་གྱི་རྣམ་པས་བེད་སྤྱོད་བྱེད་དགོས།

ཁྲིམས་ཁང་ཁ་ཤས་ཀྱིས་མཐའ་མའི་ལྟ་ཚུལ་ནི་བསམ་ཞིབ་བྱེད་པའི་སྒོ་ནས་ལམ་ཁ་གཞན་ཡོད་མེད་བརྡར་ཤ་གཅོད་རྒྱུ་དེ་རེད། འཛམ་གླིང་འདི་ནི་སྣ་མང་ཞིག་ཡིན་པ་ལྟར་འགྲོ་བ་མིའི་ཐོབ་ཐང་གི་གཞི་རྩའི་གནད་དོན་ལག་བསྟར་བྱེད་ཕྱོགས་ཀྱང་མི་འདྲ་བ་མང་པོ་ཡོང་ཆོག་པ་མ་ཟད། རྒྱལ་ཁབ་སོ་སོའི་རྨང་གཞིར་ཡང་འཛིན་དགོས།

དེར་བརྟེན། རྒྱལ་སྤྱིའི་ཁྲིམས་ཁང་ཁ་ཤས་ལ་བསམ་ཞིབ་བྱེད་པའི་སྒོ་ནས་“བརྡར་ཤ་གཅོད་ས་”བེད་སྤྱད་འཐུས་པ་འདིས་གཞི་རྩའི་ཐོག་རྒྱལ་ཁབ་ཀྱི་དབང་འཛིན་པ་ཚོས་སོ་སོའི་རྒྱལ་ཁབ་ཀྱི་གནས་ཚུལ་རྒྱུས་མངའ་ཆེ་ཤོས་ཡོད་པ་དང་། དེའི་དབང་གིས་རྒྱལ་ཁབ་སོ་སོའི་ཁྲིམས་སྒྲིག་གཏན་འབེབས་བྱེད་པའི་གནས་སྟངས་ཀྱང་ཡག་ཤོས་ཡོད། དེ་འདྲ་སོང་ཙང་། རྒྱལ་སྤྱིའི་ཁྲིམས་ཁང་གིས་རྒྱལ་ཁབ་སོ་སོར་གནས་སྟངས་ལ་གཞིགས་ནས་ཐག་གཅོད་བྱེད་པའི་དབང་ཆ་ངེས་ཅན་ཞིག་སྤྲད་ཡོད།

རྒྱལ་ཁབ་ཅིག་གིས་གནས་བབ་དང་བསྟུན་ནས་ཐག་གཅོད་བྱེད་དབང་ཇི་ཙམ་ཡོད་མེད་དང་། ཁྲིམས་ཁང་གི་ངོས་ནས་སྤྲད་པའི་ཚད་གཞི་ཆེ་དྲགས་པའི་གནས་ཚུལ་ཞིག་ཡིན་མིན་དེ་ནི་བགྲོ་གླེང་བྱེད་དགོས་པའི་གནད་དོན་གལ་ཆེ་ཞིག་ཡིན།

མདོར་བསྡུས་ན།
ཚོད་འཛིན་བྱེད་ཆོག་མིན་ལ་བསམ་བློ་གཏོང་སྐབས། ང་ཚོས་གཤམ་གྱི་བརྒྱུད་རིམ་རྣམས་བེད་སྤྱོད་བྱེད་ཀྱི་ཡོད།
༡) ཁྲིམས་སྒྲིག་གང་ཞིག་གིས་ཁྱོད་ཀྱི་ཆོས་ལུགས་སམ་དད་མོས་ཡོད་པ་དང་། ཆོས་ལུགས་དད་མོས་བསྒྱུར་བ། ཡང་ན་གསལ་སྟོན་བྱེད་པའི་ལྟོས་མེད་ཀྱི་ཐོབ་ཐང་ཁག་ལ་ཚོད་འཛིན་བྱེད་མིན་ཐག་གཅོད་བྱེད་དགོས་པ་དང།
༢) ཚད་བཀག་བྱས་པའི་བྱ་སྤྱོད་དེ་དད་མོས་གསལ་སྟོན་བྱེད་པ་སྲུང་སྐྱོབ་བྱས་པར་ངོས་འཛིན་བྱེད་མིན་གཏན་འཁེལ་བྱེད་དགོས།
༣) ཚད་བཀག་དེ་ལ་ཁྲིམས་ཐོག་གི་གཞི་འཛིན་ས་ཡོད་མེད་ལ་ཞིབ་བཤེར་བྱ་དགོས།
༤) ཁྲིམས་མཐུན་གྱི་ཐོག་ནས་མི་གཞན་གྱི་ཐོབ་ཐང་དང་རང་དབང་ལྟ་བུར་ཚད་བཀག་བྱེད་པ་དེས་ཚད་གཞི་ཅི་ཞིག་གི་བར་དད་མོས་གསལ་སྟོན་བྱེད་ཚུལ་ལ་ཉེན་ཁ་བཟོ་ཡི་ཡོད་མེད་ཐག་གཅོད་བྱེད་དགོས་ཀྱི་ཡོད།
༥) ཚོད་འཛིན་ནམ་ཚད་བཀག་དེ་རིགས་ཐད་ཀར་རམ་བརྒྱུད་ནས་དབྱེ་འབྱེད་ཀྱི་རང་བཞིན་ལྡན་མིན་ཞིབ་བཤེར་བྱ་དགོས།
༦) ཚད་བཀག་དེ་རིགས་ནི་དེས་རྐྱེན་གྱི་ཉེན་ཁ་བསྐྲུན་པ་དེ་དག་དང་དོ་མཉམ་ཡིན་མིན་དང་ནུས་པ་ལྡན་པའི་སྒོ་ནས་མངོན་འགྱུར་ཐུབ་མིན་ཐད་བསམ་ཞིབ་བྱེད་དགོས་པ་ཡིན།

ཇི་ཙམ་གྱི་ཁྲིམས་ཁང་གིས་འགྲོ་བ་མིའི་ཐོབ་ཐང་ལ་བརྩི་སྲུང་བྱེད་ཆེད་བེད་སྤྱོད་བྱ་དགོས་པའི་སྒྲུབ་བྱེད་རྣམས་ཤེས་པ་དེ་ཙམ་གྱིས་ང་ཚོས་སོ་སོའི་ཐོབ་ཐང་རྣམས་ནུས་པ་ལྡན་པའི་སྒོ་ནས་ལེན་ཐུབ། དེ་བཞིན་ཁྲིམས་ཁང་དང་སྲིད་གཞུང་གིས་ཡང་དག་པའི་སྒོ་ནས་ལས་དོན་སྒྲུབ་མིན་དང་། ཡང་ན་དེ་ཚོས་དངོས་སུ་ཆོས་ལུགས་དང་དད་མོས་རང་དབང་བདལ་བཤིག་གཏོང་གི་ཡོད་མེད་ལ་གནས་ཚུལ་ཆ་ཚང་ཤེས་པའི་སྒོ་ནས་ང་ཚོས་སྤྱི་ཚོགས་ཀྱི་བགྲོ་གླེང་ནང་མཉམ་ཞུགས་བྱེད་ཆོག །།

སྐལ་བཟང་ཚེ་རིང་གིས་བསྒྱུར།
འབའ་བ་སྐལ་བཟང་རྒྱལ་མཚན་དང་། སྐལ་བཟང་ཚེ་རིང་གཉིས་ཀྱིས་ཞུས་དག་བཏང་།